Adat likau hajan di bhap bini bangsa Lô Lô hu peih ngak di dalam bilan 3 saka aia bulan yaok thun, oh lac ngak di harei akaok bilan atau puac bilan, bo kayua gru ieu yang di puk palei rami ramik tukvak khan thau. Tui hatai saneng di mikva bhum ini ye harei hu ruah piah ngak adat khin harei anek ine girai, kayua tui urang Lô Lô ieu lac hu Yang di Glai meng brei hajan trun dunya daong ka bhap bini angin siam hajan laghaih, taneh riya, hamu padai siam makre.

Adat likau hajan hu peih ngak meng sa Po gru, sa ong gru daong saong sa kapul duh ka bruk ngak adat ngan haong abih mikva bangsa Lô Lô dalam palei hu mbaok di harei ni.

Hadei tuk Po gru ieu yang palih ruah hu harei piah ngak adat, urang akaok palei pandar dom urang dalam palei kuhria caga pandap kaya paling, dom urang likei dam tame glai piah bah ramik saong kuhria caga dom janih pandap pandar caong khin ka bruk ngak adat ngak yang.

Meng kan dahlau, urang bangsa Lô Lô juk daok di tinh Cao Bang, yaok puk palei jeng hu glai karei di drei. Glai nan biak ginreih labik daok di dom yang piah pacang khik saong daong mikva dalam puk palei. Kayua yau nan ye, tui adat caik mai mikva dalam palei njauk jak gauk pacang iek, khik ramik saong oh brei ka thei kaoh phun kayau dalam glai. Caik di hatai, dom baoh sang hu urang kamei ndih di apui ye oh brei nao tame dalam glai ini.

Tal harei ngak adat, kapul urang hu palih ruah piah tame glai hu mai mbang panal di sang po gru. Dahlau di tuk mai, palei hu kuhria caga blaoh dom drei: limo, menuk, pabui, sa salao ndiuk, lime baoh panyin, lime thaong duh, sa jaluk brah saong pagam tui hasit jien ngak adat ndua dhal phon po gru caik dalam ba-ar bhong hu lauk caik blaoh di ngaok salao kayau atau phun kreim truc.

Tuk nao tal glai yang, manuac urang dak ramik janih pandap ngak adat tui meng gah hanuk tapa gah ieu: akaok camereip lac salao dak pandap paling yang, patui di nan hu limo, pabui, asau saong menuk hu ba caik di gah lingiu di abih. Hadei di samlaih blaoh dom manuk ada ngak yang, dom gru ngak adat paling that sa mbang tra jeng hu makna dreh yau di ngaok, dak pok tagok ka yang saong dom janih bhut bhaong abilih dalam glai. 

Binah rilo daok veik gam haong dom drei manuk ada ye mikva dalam palei ba tabiak ngak mbang haong gauk di glai. Sa bruk pandar ngak dalam adat ini lac, mikva pandar phun dalam glai piah ngak patau ghing apui, oh njauk lac hu kuhria caga saong ba gieng meng sang nao tui.

Yaok baoh sang hu mbaok sa urang piah mbang dahlau gam haong po gru. Kadha pakuak oh brei ngak tuk ini nan lac, tuk mbang manuac urang oh ndom biai bo njauk mbang tui bruk tacei pato di gru ieu yang.

Tuk adat mbang gam haong po yang blaoh blai, gru ieu yang dang tagok puac sunau saong manuac urang dang tagok, nao tabiak truh labik daok di drei tal dom salao hu kuhria caga blaoh ka mbang huak manyum.  

Langiu di salao gru ieu yang saong kapul urang daoh adat daok karei, nan dom urang karei dalam palei mbang menyum ndom mayai haong gauk saong dom urang tuai damuai hu da-a mai.

Dalam tuk manuac urang daok mbang menyum bui sambai, di salao gru ieu yang, kapul urang ngak adat daoh nao mai haong gauk tui kadha daoh bhap bini di urang Lô Lô. Tamat blaoh dom kadha ngak adat, mikva bhap bani bangsa Lô Lô meda pok sap daoh dom kadha daoh bhap bini hu makna da-a alak adei sa-ai dalam palei jeng yau dom urang tuai damuai.

Hadei di tuk mikva dalam palei mbang menyum saong daoh tamia dom kadha adaoh bhap bini meng kan di bangsa drei, ye manuac urang jak gauk bah ramik labik glai ngak adat nan saong gilac veik haong rai diuk bhian harei ngan haong hatai jia tame sa raidiuk trei sil jang, sa thun angin siam hajan lagaih, pala hagait hu nan, ngak hagait jeng hu siam./.