Hadah page, lingik hajan trak asar, yaok ratuh mikva dalam palei saong tuai damuai hu mbaok di Mo hinh jirah rivang bhum palei Klong Trao 1 (mo hinh ni hu pakak dalam harei). Mikva bangsa K’Ho bui sambai angui cuk ao meng kan di bangsa, hu mai ma-in harei raya praong di bangsa drei dalam sap kong chieng yava danei.

Di labik ngak harei Mbang akaok padai, sa phun neu hu padang tagok di kreh pusak taneh, ala phun nêu hu sa salao kaya piah ieu yang saong caih alak tapai. Hu sa drei kabao ikak jaik nan piah ngak Adat klauk kabao. Peih adat, ong taha akaok palei dang ala phun nêu pusak, yuk klau yava danei tuva saong lang kar raok da-a Yang, likau di po yang brei ka mikva dalam mbuan palei ngak adat. Panuac lang kar yau: “Ey Yang!...Mikva khol dahlak, hadei sa thun ngak apuh pakak glaih glar, harei ni padai brah hu caik bak sang, alak tapai jang tal harei manyum. Khol dahlak pajum pataom gauk mai pak ni piah khan panuac ndua phol grauk po yang sa thun tapa hu daong iek anek tacaow dalam mbuan palei hu prein yava salamat, ngak hamu ngak apuh hu siam makre…”

Hadei panuac langkar, kapul Chieng saong tamia Xoang hu yaok pluh urang angui cuk ao khan bangsa K’Ho gam nao gam tamia vil tam dal phun neu. Di tuk nan ong taha akaok palei saong dom urang thik sa drei manuk tano; hadei di nan mek darah manuk uak tagok phun nêu, tagok mbaok chieng saong ngaok dhei mikva mbuan palei tadhau ayuh hu hanim phol, prein yava.

Hadei di nan, urang ngak adat klauk kabao yau sa adat meng kan di bangsa saong ong taha akaok palei ngak adat peih caih alak tapai, tuh alak pok tagok da-a Yang, blaoh da-a alak, cuk talei kanyuk, kaong haban ka mikva, ka tuai damuai.

Kapul kong chieng, tamia xoang tamia saong nao vil phun nêu. Peih akaok harei raya haong dom danak dak tamia adaoh di mikva bangsa K’Ho yau adaoh tamia “Trun ceik”, “Hòi Yang Kòi”, Òi Mi – That tiak adei sa-ai”, “Bản giao hưởng Tay Nguyen”…kayua kapul adaoh tamia saong dom mbuan palei mikva bangsa K’Ho di xa Gung Ré ngak chreih bui…

Ong Trần Thanh Hoài, Phaok Yam ndok So Ilimo, Padhih saong Jirah rivang Lam Dong khan lac, dalam tuk hu mayut pajum pataom, peih praong mblang ma-in piah ngak krein ilimo saong patagok gah jirah rivang di nagar drei urak ni, dom adat cambat meng kan di dom bangsa takik dak harei dak hu makna praong glaong, rik prein tame bruk khik ramik ilimo siam gheih di bangsa; ngan haong nan dom bruk khik ramik adat cambat pagam haong patagok jirah rivang jang ba mai ralo siam makre, daong ngak oh daok baoh sang kathaot rambah ieik lapa veik tra, mek jien tame ka mikva bangsa takik pak Tay Nguyen hu ralo.

Harei Mbang akaok padai lac sa adat meng kan caik veik di dom bangsa pak Tay Nguyen, tui thun bilan ngak hamu taneh, hadei di yuak kuak, mikva Tay Nguyen bhian peih ngak adat mbang akaok padai, gam khan panuac ndua phol tagok  grauk po yang nan hu daong ka mikva ngak padai siam baoh, hu ralo jien padai, ngan haong nan jang lac sa tukvak piah mikva pajum pataom ma-in bui sambai hadei di tuk ngak bruk…Ni lac sa adat ginup mada adat cambat langik tasik taneh riya hu suan sap po yang, lac sa ilimo di mikva bangsa takik pak bhum ni./.