Bangsa Mường daok di tinh Son La hu 8% rahra dalam tinh. Kayua diukrai di rilo bhum karei, yau nan ye khan ao bangsa di urang kamei Mường hu dom yaom kom karei. Bhum Mộc Châu, Vân Hồ, urang kamei cuk ao pắn (ao katut rup) tal ka-ing, hu pacalah di kreh tada piah ngak gheih meta. Dalam nan bruk ngak gheih meta abih ieu lac hu ao yếm saong tanyak kak akaok. Tanyak kak akaok ieu lac sa blah khan bai patih oh hu jalan bien viền, praong labaih sa cagam tangin, atah tapa likuk akaok piah pak gauk, oh glaoh di ala mbuk, pandar piah khik mbuk hu tani tanat, khik pandiak tuk langik la-an di bhum ceik bhum glaong.

Daok khan ao urang kamei bangsa Mường bhum Phù Yên, Bắc Yên, lac hu bruk muluk haong khan ao urang kamei bangsa Thái Patih. Ao bhian hu jhik meng janih khan bai kapah cih ca-ro, haong banah rup ao katut, ganik gap di ngaok tada, tangin ao atah. Ao oh hu takoi tok hu ao vil taom dal takoi, hu talei kacing ngak meng asar keim ngak ganik rup brei mboh thaik thaot rup pabhap gheih ghang di anek kamei, ngak jeng bruk tani tanat, siam mekre gheih ghang ka urang kamei.

Khan ngui di urang kamei bangsa Mường dreih gauk di 3 banah pasak lac akaok khan, rup khan saong ka-ing khan. Dalam nan, akaok khan biak hu makna, kayua ini lac bruk ngak gheih meta maong brei mboh ka bruk hadah krah, bhian lac dom hala bingu hu jhik jeng thaik thaot ciim. Rup khan pandar meng dom janih khan bai satanh, atau khan bai nyung, bar juk lac bar hu pandar rilo abih. Ka-ing khan hu hu jhik dalam khan bhian hu bar bhong merah atau sambo juk. Tuk cuk khan, ka-ing khan ngak ganik rup brei mboh bruk gheih siam ka urang kamei bangsa Mường saong brei mboh bruk karei di drei bo dom bangsa karei tukik si hu.

Khan bai piah jhik khan ao bhap bini bangsa Mường hu ngak meng bruk pala phun yau, raong dam, pak kapah, bilik gar, menyim khan bai. Patui thun umo, urang kamei brei pambuak dom sambo bar haong gauk ka nyu gheih meta. Meyah lac urang kamei Mường daok dalam thun umo cuak yut yau ye brei ruah jih dalah hu sambo bar hadah, jhik dom hala bingu gheih ghang, siam mekre, gheih mata. Urang kamei praong thun umo ye brei mek sambo bar mesup.

Urak ini, anak dang bruk patagok ekonomi ayat rahra, daok rah tabiak rilo janih menyim, khan bai karei di gauk, kayua nan, khan ao bhap bini di urang kamei Mường jang hu salih hadah krah, jhik njuel njac, mbuan cuk jang, min jeng khik hu ilamo bangsa. Khik ramik ilamo di bangsa drei, urak ini, urang kamei bangsa Mường praong thun umo jeng bhian cuk khan ao bhap bini yaok harei, daok rilo meng lac bhian cuk khan ao bhap bini dalam dom harei nyaom pataom, harei raya Tet, harei ilamo.

Piah khik ramik khan ao ngui cuk bhap bini di bangsa, tinh Son La peih ngak rilo danak dak yaih khan, pachreih jirah rivang main, piah ngak khan ao bhap bini di bangsa drei jeng pandap panda jirah rivang, pagam haong khik ramik dom bruk siam gheih ilamo, jeng yau patagok kinh te, xa hoi. Dom jabat, kapul, sang bac pachreih dom urang jakar, urang ngak bruk, anek saih bhian cuk khan ao bhap bini, khik ramik ilamo bangsa drei./.