Bram guh subuh, saai Ngân kuria brah ndiuk bingi di hamu apuh drei ngak jieng, piah ngak lasei kreim lam. Saai khan lac sa adat yang palei yau nan ye drei ngak ka siam lagaih. Brah ndiuk hu rao hacih, tram ginup ia tani tanat, blaoh buh tame raok kreim, trong tagok ging apui.

“Dahlak hulin biak uan tabuan kayua hu tanek dom kaya mbang meng kan haong mikva dalam palei. Thun bahrau mai tal dahlak jang caong ka mikva hu prein yawa piah ngak mbang saong tapa thun jang hu ngak haong gauk piah uan thun bahrau. Thun ni padai brah pablei hu yaom glaong nan mikva biak chreih bui”.

Sang muk Tah, jang yau sang karei, oh tok kuhria caga lasei lam saong ralaow am, blaoh daok hu sa kaya mbluak jang abih: Ralaow takuh glai. Muk Tah khan lac, tui ilimo di urang Xê Đăng, anek takuh lac jit pamaoh di padai, bhian kaik palai padai. Kayua yau nan, mikva chap mek takuh piah palin mbuan ka Yang, lakau di po yang pacang khik hamu taneh klah di takuh ngak srau dau.

“Hu manuk mek manuk, hu ikan mek ikan, hu takuh mek kakuh kayua thun bahrau mbang ikan lac hu patuah jamaow kayua ikan diuk di ia siam gheih, tapa thun bahrau hu patuah jamaow. Takuh ye ngak srau dau, drei mbang nyu ye tame thun bahrau klah di nyu palai lahik pandap panda di drei”.

Hadei di caga blaoh kaya kan tui adat cambat di baoh sang palei, hu mbaok ong taha palei hu nasei meng raok kreim, ralaow am, alak tapai…brei pok tagok ka Yang. Ong Vi Voan, akaok palei Kon H'ring,brei thau lac:  

“Thun barau biak chreih, mikva biak sambai uan raok harei bui hadei di ngak mbang glaih glan, thei hu hagait ye ba mai brei ka harei raya blaoh daok khik ilimo di urang bangsa drei Xê Đăng meng mukkei caik mai:".

Barau ieu Yang blaoh, abih gauk dalam palei trah win taom dar salao lasei, huak haong gauk, kaya mbang meng kan: lasei kreim, ralaow am, ia bai njam glai, abih di nyu tanek meng padai barau meng baoh karaoh njam patam di glai cek Tay Nguyen.

Adat mbang akaok padai uan raok thun barau di mbuon palei Kon H’ring oh tok lac sa war huak, bo lac sa guan piah mikva payak tuai damuai, pajum pataom gauk gar saong bhap bini ndom mayai haong gauk. Dom kaya kan oh tok lac drap ar pala drak, bo daok lac hatai kham marat ngak mbang saong dom makna ilimo lavik di rai bhap bini. Saai Nguyễn Thị Yên, daok di Mbuon Sang, xa Ea H’Đing khan lac:

“Sang dalak hulin oh daok atah di ini, min mbang camareip tame harei raya biak chreih. Hu ralo kadha ma-in jeng ye yang adat jeng biak chreih tuk ba rup tame”

Muk H’Lúi Niê, Phaok Bi thu Ndang uy xa Ea H’Ding brei thau lac, yang mbang akaok padai oh lac sa harei raya ilimo di bhap bini, nyu daok jieng harei brei ka drei yaih khan ilimo adat cambat di urang bangsa Xê Đăng brei ka tuai damuai jang ye bhum palei karei. Karja xa tuk halei jeng caik hatai brei ka bruk khik caga harei raya ilimo, kayua lac nyu ndam gam asal kadha brei ka bruk pambuak hatai bhap bini haong gauk jang ye brei ka bruk padang ilimo siam makre di bhum taneh Tay Nguyen./.