Tuk yam takai tal dom bhum ceik glaong di Lao Cai yau ye: Sa Pa, Bắc Hà, Si Ma Cai, Văn Bàn... oh kan piah maong mboh thaik thaot urang kamei Mông, Dao, Tày, Nùng, Xa Phó daok tari taring jhik, menyim jih dahlah di sang, dalam darak atau dalam kadai pandap panda di tapen jalan.

Urang Mông hijao hu biak takik rahra, urak ini daok diuk rai rilo di nậm Xé, huyen Văn Bàn. Cro lanh, menyim pataih khan bai lac sa dalam dom bruk ngak meng kal di urang bangsa Mông meng rilo rai dahlau mai. Khan ao urang Mông hijao hu tok sa sambo bar lac bar hijao juk lac sambo bar hu takre rilo abih, oh hu rilo sambo bar yau urang bangsa Mong bingu, Mông patih… Khan ao hu ngak meng janih khan bai lanh, kayua urang kamei eng pala phun lanh, menyim khan bai, nyaom juk blaoh menyim, jhik meng tangin.

Sa-ai Vàng Thị Hoa, daok di palei Tu Thượng, thun ini umo 21 thun min thau ngak tani tanat piah ngak jeng sa blah pataih khan ao urang bangsa. Sa-ai M’Hoa brei thau: Ngan haong hatai caong eng drei ngak hu dom blah khan ao bhap bini di bangsa drei, meng tuk daok sit, sa-ai hu tui dom muk, dom amaik piah bac megru bruk pala phun lanh, ngak talei mrai, menyim jeng pataih khan bai…

Ngan haong urang bangsa Mông, khan ao oh lac sa pandap piah cuk bhian blaoh nyu daok ieu lac sa raidiuk adat cambat. Nao mbang ndam klaoh panuac, ndam lakhah blaoh tal tuk nao ndam padhi jeng brei hu khan ao bhap bini bangsa piah cuk… Bruk nan brei mboh, urang bangsa Mông iek praong khan ao bangsa drei yau halei. Jeng piah mboh lac, bruk krah hadah, tani tanat di bingu hala jhik menyim, cih sap, pagam khan bai… oh lac tok brei mboh bruk ngak gheih meta, bo daok lac sa bruk dalam adat cambat meng kal caik rai bo urang bangsa Mông oh hu tuk halei var pabak.  

Jih dahlah yau ye sa baoh gilang drap ar ilamo haong rilo yaom kaom siam gheih, ngak jeng sa bruk mbuan hadar, ngak jeng prein dui pachreih tuai damuai tuk mai jirah tal Lao Cai. Piah pok meyaom yaom kaom saong bruk siam gheih di jih dalah khan bai pataih dalam raidiuk adat cambat di mikva dom bangsa, Lao Cai hu saong daok peih ngak rilo jalan langyah piah khik ramik bruk jhik menyim khan bai, dalam nan hu bruk jhik menyim jih dalah.

Tui amuk Giàng Thị Dung, Phaok akaok UB Bhap bini tinh Lao Cai, meng thun 2021 - 2023, dom bhum palei dalam tinh hu peih ngak labaih 30 tal pato ilamo, bruk ngak tabiak khan ao, bingula meng kal jamnan dahlau di dom bangsa daok di dalam tinh, pandar dom nghe nhan dalam bhap bini piah pato ka rahra dalam bhum palei. Tinh Lao cai jeng hu padang 6 bruk khik ramik thait thaot bingu hala, kaong nyuk, khan ao bangsa.

Tui jalan asal kadha “Salih drap ar jeng mbang ngui”, rilo danak dak pok meyaom, yaih khan bruk siam gheih di khan ao mikva dom bangsa jeng hu peih ngak piah yaih khan tal dom tuai damuai jirah dalam saong langiu taneh ia. Bilan 11 meng blaoh, Lao Cai peih ngak Festival “Jih dalah Lao Cai – Sambo bar ilamo” di ban sit Sa Pa ngan haong asal kadha “Sa Pa jih dalah bhum kakuer taginum”. Dalam danak dak di Festival hu rah tabiak bruk parang iek ka jih dalah saong yaih khan jih dalah di dom bangsa Mông, Dao, Tày, Giáy, Xá Phó pagam haong jhul samar bruk yaih khan ka gah jirah rivang, yaih khan palei jirah rivang, jirah rivang bol bhap rahra, jirah rivang palei bruk ngak meng kal di tinh; parang dom blah khan ao, khan bai, bingu hala jih dalah di dom bangsa; nghe nhan ngak iek dom bruk ngak jeng khan bai jih dalah meng kal di dom bangsa./.