Thun ini, urang bangsa Pako daok di bhum ceik glaong A Lưới pataom gauk mai Palei Ilamo dom bangsa huyen A Lưới, dak di pasak xa Hồng Thượng, chreih chrai parang iek harei raya tet Aza Koond. Nyu ieu lac sa harei ilamu harei raya tet bangsa praong di abih di bangsa Pako brei lakau di yang po hu trei sir, ginup meda praong abih di urang Pako saong rahra urang bangsa daok di bhum ceik Trường Sơn. Dahlau tuk si rah tabiak ngak rija raya tet, dom urang taha palei dalam but pajaih mai tal yaok baoh sang piah tadhau ayuh lakau du a brei ka salamat ka dom urang dalam sang. Hadei ngak blaoh dom adat cambat di dalam sang, dom baoh sang saong but pajaih dalam palei ba pandap kaya du a paling yang tame Sang Atah piah ngak adat duh yang palei. Ong taha palei Lê Tuấn Mỏ, daok di palei Ky Ré, xa Hồng Thượng, huyen A Lưới brei thau:

“Bhian di nyu tame dom harei jaik si abih thun, urang ginum biai njauk gauk taong abih dom pandap srap gap paling du a brei ka raya tet A Za Koonh. Di dalam baoh sang sang ye ngak yang meng rilo menuk atau pabui, hadei di nan pok tagok sang Rông piah likau di po dan saong da-a taong abih dom baoh sang, anek taco piah ngak raya tet ini.”

Ngan haong rahra bhum cek glaong A Lưới, harei Aza ieu lac harei raya Tet tui adat ilamu meng kal lawik caik mai, ndung bak ilamo di bangsa hu peih ngak yaok thun. Rahra dom bangsa Pa Cô, Tà Ôi di huyen bhum cek glaong A Lưới bhian peih ngak tet A za dalam puac thun, bhian lac tame bilan 12 saka ia bulan yaok thun, tuk mikva yuak kuak hamu apuh blaoh. Dalam masa tukvak nan, yaok palei brei ruah sa harei siam tuh tanuah gheih lagaih di abih piah ngak harei raya tet A Za.

 Raya tet Aza oh lac sa janih adat likau brei ka bruk pala hu yaom njauk bilan blaoh nyu daok ndung bak hu rilo asal kadha karei yau ye du a likau di po yang brei ka mikva palei pala hu daok dang bui sambai, oh ruak hakik pandik harao. Raya tet Aza Koonh ieu lac labik brei pataom ginup mbiah dom janih ilamo nghe thuat bhap bini yau ragu ragam, tamia, cih thaik thaot… ndung bak ilamo meng kal di bangsa Pa Cô. Amuk Lê Thị Thêm, Akaok Jabat Ilamo khau tin huyen A Lưới, tinh Thừa Thiên Huế brei thau: raya tet ini hu daong brei khik ramik tamo brei ka yaom kaom ilamu dalam bhap bini.

“Dalam bruk khik ramik dom harei raya, dom urang hu mbaok tame dom raya jeng ieu lac dom urang thau tani tanat ka adat ilamu di bangsa. Dom urang bo meng dahlau mai jeng hu tame ngak pambuak tui dom bruk di adat piah parang iek bruk ngak raya adat ilamu ini di dalam huyen”.

Harei tet Aza daok ieu lac harei brei piah rahra mbon palei caik sa gah dom kadha oh njauk gauk dalam raidiuk, daong prein, sa hatai padang mbon palei hu trei sir, ginup meda. Raya tet Aza daok hu ieu lac harei dhar phol tal phun padai. Kayua hu phun padai lac lambaok ka taong abih dom pajaih phun pala karei hu brei ka mikva trei sir. Ong Nguyễn Văn Hải, Phaok Akaok UB Bhap bini huyen A Lưới brei thau:

“Urak ini hu dua bruk ngak, ka sa di nyu hu bruk A Za Kăn saong yang ka dua tal bruk A Za Koonh. A Za Kăn ye yaok thun jeng hu peih ngak min dom adat ye takik jang. A Za Koonh ye hu peih ngak yaok thun, 5 thun atau 10 thun sa mbang, tuk mikva hu dom bilan njauk padai, raidiuk di rahra dalam palei hu trei sir, selamat haniem phol, prein yava ye tuk nan urang dom bangsa takik jeng yau dom palei, peih ngak harei dhar phol amaik padai jeng yau dom po yang brei ka rahra raidiuk trei sir”.

Raya tet Aza di bangsa bhum ceik A Lưới hu rah tabiak gam tui adat gam tui ilamu brei taom mbaok gauk me-in. Taong abih jeng hu makna ilamo duh yang saong bruk bhap bini karei di bhum ceik Trường Sơn./.