Adat thaur dhar phol amaik ame di urang RagLai bhian hu ngak tuk anek bhik praong saong hu diuk hu pasang. Tui hatai sahaneng di urang Raglai, diuk pasang bahrau tok gauk njauk ngak adat piah thau thar phol amaik ame sangka iek glang drei praong tagok blaoh kuhria diuk kuhria pasang ka drei. Urang RaGlai maong adat ini oh lac bruk dalam sa baoh sang bo lac bruk di abih bhap bini. Tukvak peih ngak adat thau dhar phol tui bruk jien padai di dua diuk pasang, bhian lac meng 3 tal 5 thun hadei di tuk tok gauk. Ong Ka tơ Hòa daok di xã Phước Bình, huyện Bác Ái, brei thau: "Amaik ame hu prein raong anek bhik, anek bhik praong tagok hu diuk hu pasang, tal tuk ginup jien padai ye ngak adat ka amaik ame mbang. Adat lac brei mboh hatai anit ranam thau dhar phol amaik ame”.

Pandap ngak adat thau dhar phol hu dua drei manuk, sa drei pabui, sa caik alak tapai. Pandap ieu yang hu manuk tuk saong ralaow pabui. Anek bhik caga ka amaik sa bộ khan aw, talei takuai brei mboh bruk cakak pasak, sa blah khan, sa baoh jaluk manyum ia; caga ka ame sa bộ khan aw, sa baoh karah brei mboh ein ngai di amaik ame manek tabiak. Hadei di tuk caga ginup salau ieu yang, gru ieu yang pok panuac kamroi. Adat thau dhar phol hu peih ngak dahlau hadei tui yaok urang dalam sang. Nan lac, thei tok diuk tok pasang dahlau ye urang nan ngak adat thau dhar phol ka amaik ame dahlau. Min, jeng hu bruk lac, mayah dua diuk pasang ranaih hu jien meda peih ngak adat dahlau jang dom adei saai karei dalam sang hu tok diuk tok pasang dahlau di nan.

Meng dom rai ini mai, urang Raglai hadei di tuk tok diuk tok pasang, tuk halei jeng peih ngak adat thau dhar phol piah ka amaik ame bui sambai tuk umo taha, haniem phul tapen anek taco, jang yau hadah mbaok mata haong mikva puk palei. Kayua tui adat cambat di urang Raglai, adat thau dhar phol hu ginup mbaok adei saai, gauk gar, puk palei. Urang mai daong uan tabuan ka dua diuk pasang, ka urang ame, urang amaik di dom urang ini. Anek bhik thau dhar phol meng bruk alin pandap, ngak dom pandap mbang meng kan daa amaik ame. Tapa nan brei mboh hatai iek praong saong thau dhar phol praong glaong amaik ame. Pandap alin jeng tui jien padai di dua diuk pasang dang tabiak ngak adat. Ong Pi Năng Chắc daok di xã Phước Hòa, huyện Bác Ái, brei thau: "Dalam adat thau dhar phol amaik ame ye sang hu jien hu peih ngak praong. Mayah yau drei, anek likai di drei nao tok diuk tui diuk, ye drei brei drei limo, drei kubau piah ka diuk pasang cak rok bruk ngak mbang. Amaik ame dua gah di anek likei, anek kumei jeng hu daong jien padai ka anek bhik di drei. Daok gah kumei brei taneh riya, sang danaok, gah likei brei kubau, limo piah ka diuk pasang ngak mbang.

Dalam adat thau dhar phol amaik ame, urang RagLai likau muk kei sraong daong ka bangsa, ka sang ngak tangei hu tangei, ngak padai hu padai. Hadei di tuk tamat adat, lac tal bruk ma-in sambai, urang Raglai saong tuai ba drei tame dom kadha taih mã la (lac sa janih alat ragam biak gheih di urang Raglai), daoh tamia saong tadhau ayuh ka gauk hu raidiuk trei sir, haniem phul, ngak mbang kaya mada.

Adat thau thar phol amaik ame lac adat cambat biak gheih, brei mboh  ilamo bangsa RagLai, kakei tal rahra brei thau dhar phol ein ngai di amaik ame raong pato anek bhik di dom amaik ame. Ini jeng lac tuk piah ka dua gah nội, ngoại hu taom gaok gauk, kak kajap jang talei rohim anit ranam gauk di dua gah./.