Tapa labaih 30 thun ngak then, amuk then Bế Thị Chau thun ini umo 80 thun, daok di xã Đạp Thanh, huyện Ba Chẽ mek hu pakat glaong abih dalam 15 pakat di gru Then. Tui nghệ nhân Then Bế Thị Chau, urang ngak then hu angan je lac urang hu ginup 15 cầu then atau tapa blaoh 15 pakat then. Ndol me-om di gru then hu 15 blah khan bai, pagap ka 15 pakat bo gru then mek hu. Tuk nao ngak adat, gru Then brei ba tui dom janih pandap biak hu yaom glaong lac mbaik capi tính, chùm xóc nhạc, hòm then, siuk tanjiak, panjin aia phun thanh thảo... 

Pandap paling yang jeng oh hu hagiat prong, lac: akaok pabui, menuk tuk, ndiuk, brah, alak, har bánh giầy, baoh kayau, khan bai saong ba-ar màu piah cakak khan ao.... Dalam tuk mbang akaok padai bahrau, talam salao caik pandap ngak adat daok hu 3 tangi padai hu kahaong tasak piah pok tagok ka ong akaok ong kei saong dom po yang piah brei mboh hatai thau dhal thau phol. Dahlau di tuk peih ngak adat, gru Then pal panjin aia, hala đào, phun thanh thảo njah dom njoh ia ngan haong hatai caong khin ngak brei par abih dom kadha oh siam di bàn thờ then, dalam sang danaok...

Adat ngak then peih tabiak, gru then angui cuk khan ao then puac kadha kakuh then, tangin ieu pan kadik, tangin hanuk pan chùm xóc nhạc, gam tamia kadik, gam srau yava ragam, kuk pabiar rup tui sap yava di capi tính. Sa-ai Phương Nga, biên đạo tamia Sang daoh tuồng Việt Nam khan lac: "Dahlak mboh biak mekre, dahlak biak takre nao tal dom lễ hội yau ini piah duah thau jang ka dom kadha di dom bangsa piah meda cak rok patagok jeng dom kadha tamia duh ka bruk ngak di drei. Dahlak jeng hu dom mbang mong iek tamia chầu then min mboh di dom bhum Tây Bắc karei jang bhum Đông Bắc. Ini lac mbang akaok meti dahlak nao tal bhum Đông Bắc di tỉnh Quảng Ninh saong hu mong iek kadha tamia lẩu then di urang Tày biak karei".

Tapa adat ngak then, urang Tày brei mboh hatai caong khin hu sa rai diuk trei sil, haniem phol, dom hagait kanjah jhak hu nao tapa, caong khin hu angin siam hajan laghaih, piah bruk ngak mbang pala drak hu siam mekre... Gru Then yau ba drei tame suan yava di langik tasik, lac talei pambuak bruk ginreih di anek manuac saong langik tasik, po yang po mebhang.

Piah daong khik ramik ilamo urang Tày jeng yau adat ngak then, huyện Ba Chẽ peih bruk padang ngak gilac rilo lễ hội ilamo bangsa pachreih hu bruk sangka di rilo bhap bani. Ong Hà Ngọc Tùng, Akaok Jabat ilamo – Brei thau huyện Ba Chẽ, tỉnh Quảng Ninh khan lac: "Meng bruk nao dalam tame janih ilamo biak karei yau labik sinh hoạt meng kan di urang Tày, adat daoh then, adat likau ka angin siam hajan laghaih, adat cầu an, ilamo mbang menyum, dom bruk ngak meng kan di urang Tày piah ka bhap bani rahra mong mboh hu lac drei hu sa bein ilamo biak karei njauk khik ramik veik, pato gilac ka rai rah harei hadei, hu jeng pandap panda rivang ma-in pambuak pagam haong cak rok patagok bruk ngak mbang kinh tế di huyện".

Adat kakuh then di bhap bani Tày nan lac bruk ba pataom dom ilamo meng kan biak karei di urang Tày yau daoh then, capi tính, ragu ragam, khan ao, adat cambat tanarakun. Kakuh then daok brei mboh hatai caong khin di anek manuac ka rai diuk bui sambai, trei sil, lac bruk thau dhal phol tal langik tasik, po yang po mebhang, thau dhar phor prein yava di muk kei, hu urang Tày di labik ini payua tame dalam bruk ngak adat./.