Adat uan lisei bahrau di bangsa Bru Vân Kiều daok di xã Ngân Thủy bhian hu peih ngak hadei di tuk yuak blaoh padai puh di bilan 10 saong bilan 11 saka ia bilan. Hadei di bilan padai puh yaok thun, mikva peih bruk ngak adat uan lisei bahrau piah thau dhar phol langik tasik, likau ka hajan siam hangin lagaih, ngak padai hu padai, ngak tangei hu tangei, raidiuk trei sil, ginup meda.

Adat gam hu yaom glaong gah sajarah saong ilamo bangsa, gam rik daong dui pachreih dom urang roh duah, tuai damuai mai duah thau raidiuk ilamo di rahra pak ini.

Adat urak ini daok khik ramik dom adat cambat pambuak tal tuk bahrau drak pajaih tal tuk yuak padai, lac adat cambat piah thau dhar phol langik tasik, po yang hu brei ka mikva hajan siam, hangin lagaih, raidiuk hu trei sil, haniem phul.

Hadei di sa tukvak lahik nao, tỉnh Quảng Bình daok jhul khang bruk daong padang veik, peih ngak bruk parang iek adat uan lisei bahrau di urang Bru-Vân Kiều di dua huyện Lệ Thủy saong Quảng Ninh piah daong ka mikva khik ramik adat siam gheih ini piah pabak ka raidiuk ilamo di rahra saong pambuak haong bruk cak rok patagok du lịch sinh thái ba drei tame raidiuk di mikva bangsa Bru Vân Kiều di tapen talei ceik Trường Sơn.

Dalam dom harei rija, mikva hu mbaok tame peih ngak dom adat cambat, dom bruk daoh tamia, kadha ma-in meng kan saong pasram ngak, pato veik dom yaom glaong ilamo meng kan di bangsa drei. Sở Du lịch Quảng Bình daok kham marat peih ngak du lịch ilamo rahra. Dalam nan hu ba dom rija, ragu ragam di mikva Bru-Vân Kiều tame duh ka tuai damuai.

Bruk adat uan lisei bahrau di urang Bru Vân Kiều xã Ngân Thủy hu pok brei angan Inem krung ilamo oh mboh di mata pakat negar meda ba mbuan lagaih ka bhum palei khik ramik ilamo meng kan di mikva bangsa, gam haong nan, tuk ba Harei ngak adat jeng sa pandap du lịch, mikva meda hu jien mek tame piah paglaong raidiuk./.