Tui sap Cơ Tu, "tung tung" lac ragu tamia di urang likei, makna lac mbeik drei tagok glaong, chreih chrai, khang kadang saong kajap jang; daok "da dá" lac ragu tamia di urang kumei, makna lac tapak talei, ragu samu gauk, ndung bak hatai sahneng cang taduan mek riski langik tasik…

Tung tung da dá hu thau tal lac "ragu tamia pok tagok po langik", bhian hu dalam mbang pataom mbaok bhap bini saong dom adat cambat praong di urang Cơ Tu yau ye: adat klauk kubao, adat uan padai bahrau, adat padang palei, padang sang Gươl... ragu tamia pambuak haong prein khang di urang likei saong bruk lamin lamuac di urang kumei, brei mboh bruk âm - dương samu gauk, bilan pala siam mekre, raidiuk trei sir saong haniem phul.

Tapa tukvak padang tabiak, praong tagok, ragu tamia Tung tung da dá yau sa danak dak nghệ thuật hu kuah, thah, pilih, halang tani tanat, gam yao klak, ginreih, gam bahrau bahrang, chreih chrai. Janih ilamu hu yaom gah sajarah ini, lac bruk hadah mbaok meta di bangsa Cơ Tu.

Dom harei kreih bilan 7 ini, di labik ravang me-in mblang bein Suối khoáng pandiak Ceik Thần Tài di palei Phú Túc, xã Hòa Phú, huyện Hòa Vang, ban Đà Nẵng, tuk halei jeng mboh dom kumei dara bangsa Cơ Tu cuk ngui khan ao bangsa hadah tanyak, bara luai saoh, takuai cuk talei baoh njuk, takai yam limin lamuac… daok pasram tamia haong tuai mai ravang me-in. Sa-ai Phan Văn Nam mai meng ban Cần Thơ khan lac, mehit labik ravang me-in Ceik Thần Tài hu danak dak daoh tamia Tung tung da dá, nan ye kol dahlak mai chip piah maong iek.

Hu mbaok dalam kapul pamere tuai, anai Za Râm Nguyệt, akaok kapul tamia palei Phú Túc brei thau, biak uan tabuan, hadah mbaok meta tuk ragu tamia di bangsa drei hu yaih khan di dom labik du lịch hu angan saong khan lac, gam haong dom urang dalam kapul, kham merat tamia ka nyu mekre jang piah ngak brei ilamu gheih mekre di bhap bini Cơ Tu hu pambak praong, rik daong ngak brei mekre jang ilamu di dom bangsa Việt Nam. 

Amuk Lê Thị Bích Hương, Yam ndok Truyền thông saong Marketing labik ravang me-in Ceik Thần Tài brei thau, kol dahlak caong khik ramik hu ilamu siam mekre meng kan mai di bhap bini. Tuk kol dahlak ba ragu tamia Tung tung da dá tame parang me-in ye tuai biak takre saong ba drei tame tamia ragu ini, urang biak chreih chrai haong ilamu gheih mekre di bhap bini Cơ Tu.

Tui ong Tán Văn Vương, Phaok Yam ndok Sở Du lịch ban Đà Nẵng, ragu tamia Tung tung da dá brei mboh bruk gheih mekre di ilamu tạo hình, ragu ragam, hình thể, khan ao ngui cuk, gam haong nan, lac brei mboh hatung hatian saong hatai caong raidiuk trei sir, haniem phul di bhap bini Cơ Tu. Bruk dom labik du lịch di Đà Nẵng ba danak dak ragu tamia Tung tung da dá tame duh ka tuai du lịch hu daong khik ramik saong patagok yaom glaong ilamu di bhap bini Cơ Tu./.

Urang lang: M.Phuong