Adat Tấc Ka Coong daok ieu lac harei pataom kakuh yang ceik di urang Cơ tu hu padang ngak veik tui dom jalan ngak lac: adat lam phun nêu, adat kak kubao, adat klauk kubao saong adat pok kakuh yang Ceik.

Dah mesup, dom taha palei haong akaok but pajaih ba gauk ngak adat Lam phun nêu. Phun nêu lac panuac ieu tuai tapa jalan mai haong harei pataom. Caong ka phun nêu khang kajap, oh mbleing oh jaleih tuk kak kubao, brei ka bruk ngak adat hu jak jeng siam mekre…

Patui di nan lac adat kak kubao. Drei kubao lac athur ginreih di harei pataom bo urang Cơ tu pok tagok Yang Ceik, Yang glai, Yang kraong, Yang craoh. Hadei di nan lac adat Klauk kubao. Anek kamuan dalam palei, lambaok ka taong abih dom baoh sang, but pajaih dalam plaei, hu mbaok tame ngak adat klauk kubao brei mboh bruk jum pataom gauk.

Peih mbaok adat kakuh yang ceik lac bruk pok salao pandap paling dom po yang. Urang pok salao lac dom likei, kumei Cơ tu hu thaik thaok mekre iek, hu hatung hatian hadah hadai hu palei pilih ruah. Dom pandap mbang hu ngak meng dom labik bingi abih di dom athur paling yang, lac kubao, lamo, pabe, pabui, menuk. Patui di nan, dom taha palei ngak adat pok kakuh piah dhar phor dom po yang brei ka anek taco, puk palei urang Cơ Tu hu raidiuk sron mbon, ginup meda, praong tagaok jeng menuac urang. Amuk Hồ Thị Tư, Pasak Ilamu, Brei thau saong Thể thao huyện A Lưới khan lac: “Dua thun dahlau, kol dahlak padang ngak veik adat di bangsa Pa Cô, bangsa Tà Ôi. Thun ini, kol dahlak padang ngak veik adat di bangsa Cơ Tu piah patui bruk khik ramik patagok yaom glaong ilamu, adat cambat meng kan di urang Cơ Tu”.

Dom adat kakuh paling dom po yang hu ginup abih. Taha palei haong anek kamuan puk palei ba drei tame tui sap chiêng, sap hagar, pok sap daoh takơ, brei ka gauk dom hatai anit ranam kak kajap talei jum pataom puk palei. Sa-ai Lê Thị Diệu, daok di xã Hồng Hạ, huyện A Lưới brei thau:  “Tuk hu mbaok tame ngak adat Tấc Ka Coong di urang Cơ Tu, adei mboh biak hadah mbaok mata ka dom adat bo muk kei drei caik veik ka rai ini. Kol adei caong hu bac megru piah harei hadei hu khik veik, khik miat miat ka rai hadei”.

Ong Phan Thanh Hải, Yam ndok Sở Ilamu Thể thao tỉnh Thừa Thiên Huế khan lac: Tukvak tapa, huyện A Lưới hu biak rilo kham merat saong jak jeng dalam bruk padang ngak veik, khik ramik, patagok yaom glaong ilamu meng kan di bhap bini dom bangsa pambuak haong patagok du lịch: “Kol dahlak caong lac meng bruk padang ngak veik dom adat meng kan, hu daong khik ramik ilamu meng kan, piah ka mikva dom bangsa takik thau jang ka ilamu di drei. Kol dahlak caong lac anak tal, ini jeng lac jalan piah kol drei yaih khan thaot binguk, yaih khan du lịch biak lagaih piah cakrok A Lưới jeng labik dui pachreih di Huế dalam bruk patagok du lịch, dịch vụ”.

Adat Tấc Ka Coong- kakuh Yang Ceik lac ilamu siam mekre meng kan di urang Cơ Tu gam haong ceik, glai, kraong, craoh. Puk palei urang Cơ Tu tuk halei jeng diukrai thau dhar phor, pok kakuh saong miat miat kak kajap haong langik tasik, kayau patau, abih janih di labik drei menek tabiak, praong tagok saong jeng menuac jeng urang./.