Khan ao di urang kumei Mông jhuk hu: khan ma-om akaok, ao, yếm, khan, talei ka-ing, xà cạp. Ao di adei sa-ai kumei Mông jhuk bhian hu 3 binah, 2 nẹp ao mbar tagaok takuai ao. Labik jhik pagam rup gah anak haong rup gah likuk piah xẻ tà labaih 1 cagam tangin meng jih ao tagok. Nẹp ao, jih tangin ao, nẹp xẻ tà saong xà cạp hu ngak mekre meng baoh bingu praong 3-4 cm meng tanyiak pagam veik haong merai sambo pet. Tuk cuk, jih ao oh padauk tame dalam khan bo cuk xòe tabiak langiu, ao oh hu bingu ao bo tambak gar tagok gauk, hadei di nan mek khan talei ka-ing kak gar piah khik ka ao oh xòe tabiak.

Amuk Dương Thị Noọng daok di palei Ka Liệng, xã Thụy Hùng, huyện Thạch An brei thau, lac ao blah cada nan ye urang kamei Mông jhuk bhian cuk yếm. Takuai yếm pet bingu hadah ngak ka khan ao mboh mekre jang. Khan bhian lac khan jhuk yau di urang Mông mbong, min katut tal akaok ta-uk, hu xếp ly hasit, ngak brei mekre jang ka khan ao. “Dahlau daih tuk nao ngak metau ye urang anek kamei bangsa Mông jhuk eng drei brei ngak hu 3 bộ khan ao. Urak ini tok hu lakhah, nyaom biai, nyaom roya jum pataom bangsa, dom kamuan nao bac tuk sang bac peih ngak bruk praong ieu cuk khan ao bangsa ye urang meng cuk, meng duah tal sang piah blei. Tuk amaik ame palang lahik ye dom anek jeng brei cuk khan ao bangsa ginup abih.”

Bingu la angaok khan ao di urang kamei Mông jhuk rilo meng lac bingu xoắn ốc, 4 mata, chữ nhật, hình thoi saong klau kieng..., min hu pablak tame haong dom talei bingu saong jalan pet tagok gauk. Ong Hà Văn Thiện, akaok palei Ka Liệng, xã Thụy Hùng brei thau, urang Mông jhuk sahneng lac dom bingu pet dak tani tanat, dak brei mboh bruk gheih tangin di urang kamei dalam bruk pabak haniem phul saong ngak brei kaya meda ka sang danaok. “Bangsa Mông jhuk daok di tỉnh Cao Bằng tok hu mboh di palei Ka Liệng, xã Thụy Hùng, huyện Thạch An, abih tih hu 64 sang, langiu huyện Thạch An ye oh hu labik halei hu. Dahlau daih, mikva takik caik hatai tal khan ao bangsa, min dom thun mai ini, mikva mboh hu bruk khik ramik ilamu di bangsa drei nan ye dalam ndam lakhah atau harei rija, roya, mikva jeng cuk khan ao bangsa.”

Urak ini, dom menuac thau jhik khan ao saong gheih pet bingu la angaok khan ao urang kumei Mong jhuk di xã Thụy Hùng daok dom urang min. Dalam raidiuk yaok harei, urang cuk khan ao yau dom bangsa karei, min tuk rija, roya, mikva ba gauk cuk tagok rup blah khan ao meng kan di bangsa drei. Biak uan tabuan lac urak ini, yaok sang urang Mông jhuk hu anek kamei jeng hu 1 bộ khan ao meng kan piah cuk dalam dom bruk praong atau harei bui sambai di bhap bini. Min ngak habar piah ka rai ranaih thau jhik khan ao di urang Mông jhuk jeng daok lac bruk suh sah di pak ini. Gam haong nan, brei hu rilo jang dom jalan ngak cambaih laih jang piah daong ka bhap bini ngak veik, khik ramik saong patagok ilamu gheih mekre, dalam nan hu bruk khik ramik khan ao meng kan di yaok bangsa./.