Dom mbang pasram di Kalup kapul daoh then - capi tính xã Mường Cang, huyện Than Uyên (Lai Châu) rilo thun ini mai jeng daok khik tani tanat 3 var sa adit. Ini lac kalup kapul hu rilo ilamo ka bruk khik ramik, patagok dom yaom glaong ilamo bangsa Thái di puk palei.

Ong Lò Văn Chơn, Akaok Kapul kapul khan lac: meng hatai takre, anit ranam dom ragu tamia meng kan, dom kadha daoh then saong capi tính di bangsa, dom urang dalam kalup kapul meng nan dak harei dak tagok rilo jang. Hadei di jaik 17 thun ngak bruk, tal urak ini, kalup kapul hu jaik 30 urang, ngan haong 2 kapul daoh tamia di umo praong thun saong umo taha daok hu khik ramik.“Kalup kapul kol dahlak ma-in yaok harei, kayua dom kadha daoh, tamia then ye oh klaak hu. Urak ini, kol dahlak daok pambuak haong adei saai cak rok patagok jang, paneh tabiak dom kadha daoh karei piah pablak tame labik daoh then capi tính. Bruk ini daok hu kol dahlak ginum biai haong gauk piah dak harei dak cak rok patagok jang”.

Xã Mường Cang, huyện Than Uyên lac labik manek tabiak ilamo di urang Thái jhuk pak Tây Bắc. Rah tapa rilo trun tagok di tukvak, min mikva pak ini jeng daok brei mboh labik manek tabiak di bhum taneh meng kan, ngan haong rilo yaom glaong ilamo meng kan hu khik ramik, yau dom ilamo siam gheih ka adat cambat tanarakun, daoh tamia, kiến trúc labik sang danaok, harei rija roya, adat kakuh muk kei, ragu tamia, kadha daoh, alat ragam meng kan, pandap ngak nong saong pandap pandar dalam sang.

Than Uyên – bhum taneh hu rilo sajarah ilamo, lac labik pataom labaih 10 bangsa takik. Piah khik ramik saong patagok jang yaom glaong ilamo di bangsa, huyen hu peih ngak siam sarak ka 04 di Ndang bộ tỉnh ka bruk khik ramik, patagok dom yaom glaong ilamo meng kan siam gheih di dom bangsa. Amuk Lê Thị Kim Ngân, Phó Bí thư Thường trực Huyện ủy Than Uyên brei thau lac: huyện biak caik hatai sangka tal bruk padang ngak veik, khik ramik, patagok dom yaom glaong ilamo siam gheih di 4 bangsa angan je lac Thái, Mông, Dao, Khơ Mú, khik ramik labaih 130 kapul daoh tamia di puk palei; pachreih dom xã, ban sit padang dom kalup kapul ilamo, khik ramik saong paglaong bruk ngak di dom kapul daoh tamia di puk palei.“Kol dahlak hu padang veik 4 rija roya jak jeng, dalam nan hu 2 rija roya di urang Mông. Gam haong nan, kol dahlak jeng padang ngak hu 4 labik ilamo, piah tapa nan brei mboh veik ilamo ka sang daok saong dalam dom baoh sang nan padang ngak veik 1 binah dom yaom glaong ilamo meng kan di dom gah, meng bruk peih ngak tal bruk daoh tamia blaoh dom kadha ma-in meng kan, dom pandap panda pabak ka bruk ngak mbang, pala drak”

Langiu di hatai sahaneng khik ramik ilamo di bangsa, bruk Tỉnh ủy Lai Châu patabiak sarak ka khik ramik, patagok dom yaom glaong ilamo dom bangsa dak harei dak daong ka bruk khik ramik ilamo bangsa di puk palei peih ngak hu rilo siam mekre jang. Tal urak ini Lai Châu hu 5 labik inem krung ilamo oh maong mboh di mata pakat negar. Rilo adat cambat tanarakun siam gheih, dom harei rija roya, adat cambat meng kan, sap ndem, akhar vak, khan aw ngui cuk, dom bruk ngak meng tangin meng kan, dom ragu daoh, ragam tamia bhap bini jeng daok hu khik ramik, cak rok patagok, daong pabak parilo janih dalam bein ilamo dom bangsa Việt Nam./.