Meng kan mai, urang Pà Thẻn thau pala kapah, manyim khan bai, jhik pet. Abih di nyu nan lac adei saai kumei meng tuk daok dara hu dom amuk, dom amaik pato manyim khan bai, jhik pet khan aw ngui cuk. Nan ye, urang kumei Pà Thẻn meda lac thei jeng thau manyim khan bai saong jhik khan aw ngui cuk.

Khan aw ngui cuk di urang kumei Pà Thẻn hu ngak biak tani tanat,  haong sambo bhong, jhuk, mbong. Piah ngak sa bo khan, aw lac abih tal 3 bilan, meng manyim, nhuom, jhik tangin, hadei di nan lac pet dom bingu la.

Aw hu dua janih lac aw katut saong atah. Aw katut blah di cada, takoi aw bier, sambo màu chàm, takoi ngak gam haong dua vạt anak. Aw ini bhian hu cuk haong khan praong, hu rilo labik lauk, sambo màu chàm.

Aw atah lac janih aw blah di cada, takoi aw bier gam dua vạt anak, tuk cuk, vạt gah hanuak kateik gar vạt gah ieu, gah mala di vạt haluak trun ngak jeng vạt praong di anak aw. Tangin aw saong aw hu pet meng dom sambo mau hadah.

Urang kumei Pà Thẻn mek yếm anak cada piah pacang sre rup, gheih mekre. Yếm hu pak mata, pet bingu sambo bhong, kanjik gam haong dom jalan mbong ngak brei hadah jang di blah aw langiu. Bingu la bhian hu pet tagok  atau manyim meng tangin, hu ngak gheih meng dom bingu hala di mangaok aw saong khan.  

Langiu di nan lac sa talei kak vil eo anak tung, ngak brei mekre jang ka blah khan aw ngui cuk. Langiu di aw, khan daok hu siuk ma-aom akaok hu rilo tal mblo tabiak yau ta-mo, adei saai daok ngak gheih meng dom pandap cuk ka nyu mekre yau talei takoi, kaong tangin.  

Saai Phù Thị Thiên daok di palei Mỹ Bắc, xã Tân Bắc, huyện Bắc Quang, Hà Giang khan lac, adei saai kumei tok pasang blaoh bhian kak mbuk tagok, ma-aom siuk sambo chàm jhuk, dom anai kumei ma-aom siuk sambo bhong hu pet sambo mau hadah, dua akaok siuk hu pagam dua chùm tua rua sambo kanjik, bhong biak mekre mata.

Maong rah tapa, blah khan aw meng kan di urang kamei Pà Thẻn brei mboh ilamo pagam khan bai saong pet marai samo biak lagaih. Pablak tame dom labik menyim bingu hala, lac dom bingu hala hu pet meng tangin hu rilo sambo mau hadah biak gheih, ngak ka dom sambo mau hadah tagok jang, ngak brei mekre jang di urang kumei.

Saai Phù Thị Thiên daok di palei Mỹ Bắc, xã Tân Bắc, huyện Bắc Quang, tỉnh Hà Giang daok brei thau lac: “Khan aw ngui cuk di urang Pà Thẻn biak gheih, manyim karei jang bingu la di dom bangsa karei. Manyim bingu la di mangaok kik manyim, manyim tapak di khan bai, manyim jeng dom blah khan bai, hadei di nan cacak pagam haong dom janih khan bai piah ngak tabiak sa bo khan aw ngui cuk, daok khan di labik karei. Taeng manyim blah khan bai ini jeng lahik abih sa bilan".

Meng dom rai ini mai, khan aw ngui cuk meng kan di urang kumei Pà Thẻn hu adei saai kamei cuk tame di dom harei hu makna praong, yau harei lễ, tết, harei rija roya, harei pataom ilamo bangsa saong dom harei pataom darak. Meng plak tangin gheih di drei, yaok mbang adei saai kumei Pà Thẻn cuk khan aw bangsa drei ngan haong dom blah khan biak gheih hu dui pachreih bruk caik hatai di rilo urang kayua nyu gheih mekre, ndung mbak ilamo di bangsa.