Harei uan padai bahrau di urang Gia Rai bhian hu ngak di bilan 12 saka ia harei, hadei di tuk mikva yuak kuak blaoh kaya nong. Piah caga ka adat ieu yang, yaok baoh sang rik tame 1 kg brah bahrau, 1 caik alak tapai. Adat ieu yang uan padai bahrau hu peih tabiak di rilo labik:

Adat ini bhian hu peih ngak di sang rông di palei. Pandap ieu yang hu 1 drei pabui atau sa drei manuk mano (mayah ieu yang meng manuk ye lisei sa panyin, alak sa caik), 3 caik alak tapai, 3 panyin lisei, 3 cavan alak, 1 phun nêu, 1 chòi padai, 1 paok padai daok tamo asal, 1 li-i padai, 1 mbaik nia, 3 baoh pareng, 6 baoh jaluk, vang,  baoh yot, li-i… hadei di tuk caga blaoh pandap ieu yang, urang taha di palei meroi likau po yang saong suan yava ong muk ong lei mai mbang lisei bahrau daong ka mikva dalam palei pala drak hu siam, hajan siam hangin lagaih, thun hadei ngak hu rilo jang thun dahlau.

Adat uan padai bahrau di hamu puh hu dom pandap ieu yang lac 1 caik tapai alak, sa drei manuk. Gru ieu yang gaok 7 mbang tame caih alak, pok pandap ieu yang saong daa 7 po yang ( lac yang taneh, yang tasik, yang ia, yang raong glang, yang pajak pajeng, yang khik caga, yang padai) brei ka padai samar tathak, brei ka padai pahe bingi. Harei ini, sang po padai likau pok tagok dom po yang 1 caih alak, 1 drei manuk piah thau dhar phol dom po yang hu brei ka po padai hu prein yava, brei ka puh cakak padai tathak kanjik, brei ka bilan padai pala hu biak rilo padai.

Adat ieu yang padai bahrau di kadom padai hu pandap ieu yang lac 1 caih alak, 1 akaok manuk. Gru ieu yang gaok 7 mbang tame caih alak saong pok pandap ieu yang saong ieu daa 7 po yang mai piah thau dhar phol dom po yang hu pacang caga ka phun padai, pacang caga ka sang po padai hu khang kadang, likau dom po yang brei ka po padai hu yuak kuak, likau hu rok suan padai tame kadom piah khik piah. Hadei di tuk ieu yang di kadom blaoh, taong abih dom urang likei, urang kumei ba gauk paoh padai piah ba padai tame jaruk padai.

Adat ieu yang padai bahrau di sang po padai haong pandap ieu yang lac 3 caih tapai alak, 1 drei pabui. Gru ieu yang gaok 7 mbang tame caik alak saong likau 7 po yang brei ka sang hu rok suan padai haong padai mai sang. Harei ini, dalam sang likau pok tagok dom po yang 1 caih tapai alak saong 1 drei pabui.

Hadei di tuk ieu yang lac tal bruk daa alak, mikva Gia Rai tui darah gah amaik, nan ye dahlau di abih lac urang diuk, amaik di diuk, amaik di po padai … manyum alak dahlau blaoh meng tal dom urang likei. Adat ieu yang tamat blaoh, mikva Gia Rai gam ma-in sambai, taih tagok sap cồng chiêng saong dom ragam tamia, dom ragu daoh bhap bini piah ba gauk pamaong tal sa bilan ngak hu biak rilo padai brah, raidiuk trei sil saong khik ramik hu dom ilamo meng kan siam makre di bangsa drei./.