Adat uan umo thun taha di urang M’nông di huyện Lắk lac sa dalam dua inem krung ilamo di tỉnh Đắk Lắk hu Mintri Ilamo, Thể thao saong Du lịch brei ba tame angan dom Inem krung ilamo oh maong mboh pakat negar di thun 2022.

Adat uan umo thun taha bhian hu peih ngak di bilan 12 saka ia harei yaok thun, hadei di tuk yuak kuak blaoh. Tui adat meng kan di urang M’nông, tuk amaik ame umo labaih 60 thun, anek bhik dalam sang meda peih ngak adat uan umo thun taha piah brei mboh hatai thau dhar phol amaik ame hu manek tabiak saong raong pato.

Pandap ngak adat lac sa drei pabui, klau panyin lisei, sa drei manuk, sa baoh kadaoh thu caik bak ia, sa ghing pui dhang meriak bhong, sa ché tapai alak praong saong 3 ché tapai alak sit. Hu mbaok tame ngak adat hu gru ieu yang, gru daong bruk ieu yang, urang hu ngak adat uan umo thun taha, kapul urang taih chieng, kapul daong bruk, sang hu mbaok tame ngak adat uan umo thun taha, urang taha palei, rahra di dalam puk Đung.

Peih bruk ngak adat uan umo thun taha, gru ieu yang daok la anak pandap ieu yang, daok tapen  nan, lac urang hu ngak adat uan umo thun taha. Gru ieu yang pok panuac ieu dom Yang lac: Yàng ceik, yang glai, yang ia piah likau peih ngak adat uan umo thun taha. Hadei di nan, gru ieu yang pok panuac likau dom po yang daong ka urang hu ngak adat uan umo thun taha hu prein yava, diuk lavik haong anek taco. Amaik ame (di urang hu peih ngak adat uan umo thun taha) pan mbaik gai menyum tapai alak saong pok panuac likau po yang tuk halei jeng pacang caga, sraong daong brei hu dom bruk siam makre di abih.

Dom anek taco dalam sang patui gauk kandiuk pandap mbang, daa alak tapai, alin pandap panda ka urang hu ngak adat uan umo thun taha (lac amaik, ame, ong, muk). Pandap alin bhian lac sa bộ khan aw manyim meng kan, dua blah khan bai, ché alak tapai, baoh kaong ban… Patui di nan, anek taco pok panuac tadhau ayuh ka urang hu ngak adat uan umo thun taha.

Hadei di tuk hu tadhau ayuh uan umo thun taha saong alin pandap, urang anek pok panuac daa gauk gar, adei sa-ai dalam sang, daa mikva tame huak lisei hu parang tabiak blaoh. Dalam luac tukvak ngak adat, kapul taih chieng ba gauk taih gam gam mbiah tal tuk tamat bruk ngak adat.

Tuk peih ngak adat Uan umo thun taha, mikva dalam palei likau ka urang hu ngak adat hu prein yava biak khang kadang, diukrai bui sambai haong anek taco saong lac kreih camin piah pato pakai anek taco dalam bruk ngak mbang saong kakei anek taco bac taa piah hu raidiuk siam makre jang, ba gauk dak padang puk palei kaya mada siam makre jang. Adat uan umo thun taha di urang M’nông hu peih ngak mbuan mbiah min ndung bak rilo makna. Ini lac tuk piah ka anek taco brei mboh hatai thau dhal phol ong muk, amaik ame.

Ilamo meng kan thau dhar phol di anek taco dalam sang, di menuac sia dalam palei hu pamadeih tagok tapa adat biak gireih brei mboh hatai anit ranam, iek praong urang praong thun saong hatai thau dhar phol di anek taco brei ka ong muk, amaik ame manek drei tabiak.

Tui Sở Ilamo, Thể thao saong Du lịch tỉnh Đắk Lắk, Adat uan umo thun taha di urang M’nông lac sa adat oh kurang hu dalam raidiuk di urang M’nông, lac sa ilamo siam gheih di rahra njauk hu khik ramik, patagok.

Bruk Sở Ilamo, Thể thao saong Du lịch tỉnh Đắk Lắk padang ngak veik Adat Uan umo thun taha di urang M’nông piah brei mboh ilamo meng kan di urang M’nông, jeng yau di urang bangsa takik.

Tapa nan, rik tame bruk pachreih ba saong daong ka rahra thau cambaih jang ka dom adat cambat tanarakun, paglaong hatai sahaneng, bruk ngak dalam khik ramik, patagok dom yaom glaong ilamo siam gheih meng kan mai di 49 bangsa adei saai daok dalam tỉnh./.