![Urang lang: Thu Thao](/themes/custom/vov_4/images/avatar.png)
Tui hatai sahaneng di urang Dao, adat cấp sắc lac adat siam gheih saong hu khik veik meng yaok rabau thun ini mai dalam bhap bini urang Dao bhong daok pak tỉnh Lào Cai. Urang Dao sahaneng lac, adat cấp sắc lac sa adat oh kurang hu ngan haong urang likei. Tok dom urang hu cấp sắc meng hu maong lac urang likei dam, daok mayah ka oh ngak adat cấp sắc ye yaom lac urang nan taha jeng ka oh hu maong lac urang trưởng thành, saong oh hu mbaok tame dom bruk praong di puk palei, di rahra. Tui nan, yaom lac umo daok sit min tapa ngak adat cấp sắc blaoh jeng hu rahra pok taduan, hu daong bruk ka gru ieu yang. Urang halei bac hu akhar Nôm Dao ye hu thau ka adat ieu yang.
![Urang bangsa Dao Bhong](https://vov4-media.solidtech.vn/sites/default/files/styles/large/public/2024-03/dao-do-3.jpg)
Yaok thun, adat cấp sắc hu peih tabiak di bilan 11, bilan 12 atau bilan Sa di tukvak urang ngak nong lahaiy bruk. Urang Dao bhong meda peih ngak adat cấp sắc ka sa mbang rilo abih lac 13 urang, mayah takik jang njauk ngak tui số lẻ (tui jalan lac thờ số lẻ 3, 5, 7...). Pandap pandar dalam ngak adat hu ralaow pabui, manuk piah ieu yang kakuh ong muk ong kei saong tuan rup cih dom Bàn Vương, dom po yang di urang Dao.
Dahlau di tuk ngak adat ieu yang, dom ong gru ieu yang (Chẩu chiếu) brei ngak hacih sa-at sang danaok di urang hu cấp sắc, hadei di nan taong sa sap ginang daa ong muk ong kei mai hu mbaok di adat, patui di nan ong gru ieu yang meng ngak adat khai đàn pathau khan haong muk kei makna peih ngak adat. Adat cấp sắc njauk ngak meng mangaok trun tui talei but pajaih, ralaow darah haong gauk, urang likei hu diuk blaoh bhian hu ngak adat cấp sắc dahlau. Adat ini hu peih ngak di sang urang akaok but pajaih. Urang kumei Dao hu pasang tuk ngak adat cấp sắc njauk ma-om sir blah siuk bhong luac tukvak ngak adat. Daok dom urang dam hu ngak cấp sắc njauk cuk khan aw meng kan. Dom urang ini biak caik hatai tal tamo ma-om angaok akaok, kayua tui hatai sahneng, labik nan lac labik po yang daok dalam yaok urang hu cấp sắc.
Dalam adat cấp sắc ini hu biak rilo adat cambat hu peih ngak dalam sang saong gah langiu. Dalam sang hu rah tabiak adat truyền phép tapa dom kadha hu cih vak dalam tapuk Nôm Dao saong tapa dom pandap panda ngak adat yau ye gai jare, súc xắc, chiếu, dấu ấn, pok brah, dhin… Anak labik ngak adat, gru ieu yang hadei di tuk ieu yang meda likau âm dương piah ka urang taduan sắc hu po yang taduan lac urang likei trưởng thành. Adat cấp sắc di urang Dao hu rilo pakat, pakat camriep lac pakat 3 gom saong 36 binh mã; pakat dua lac pakat 7 gom saong 72 binh mã; pakat puac abih lac 12 gom saong 120 binh mã. Tukvak ngak adat cấp sắc bhian meng 1 tal 5 harei.
Hadei di dom adat, dom panuac likau patuah jamo ka urang hu cấp sắc hu ong gru vak tabiak baar, papaok veik saong am cuh hadei di tuk ngak adat cấp sắc. Patui di nan lac dom urang likei taduan sắc meng Chẩu chiếu, meng urak ini, dom urang ini lac dom urang likei trưởng thành dalam bol bhap rahra./.
Viết bình luận