Dalam baoh tapuk meng kan di phật giáo Nam tông, “Kathina” hu makna lac khang kajap, suai lavik. Adat dâng y di phật tử Khmer meda ba mai rilo phúc đức saong bruk urang taduan aw cà sa lac dom ong bhik hu bak, ginup dalam tuk tu, pasram. Adat Kathina được hu ngak hadei di 3 bilan an cư kiết hạ saong dahlau di harei Ok Om Bok ieu yang ia bilan. Tui adat meng kan di Phật giáo Nam tông Khmer, dom baha ba tabiak sa harei cambaih blaoh pathau khan ka Phật tử dalam phum sóc thau piah peih ngak adat Kathina.

Bruk pilih ruah urang dang tabiak ngak adat dâng y cà sa oh neh rabha kaya meda atau kan kathaot, bo ngak tui dahlau hadei nan ye urang halei jeng hu tut angan peih ngak. Sa bilan dâng y meda hu sa atau rilo sang dang tabiak ngak. Sang urang hu pilih ruah, brei caga pandap piah pok tagok Tam bảo (Phật, Pháp, Tăng) 4 janih pandap, abih di nyu nan lac dom pandap pandar yaok harei dalam baha saong pandap pandar yaok harei di chư tăng yau ye aw cà sa, bình bát piah sư khất thực, pandap mbang huak, siphau… Ini lac dom pandap piah ka chư tăng pandar dalam bruk bac taa saong sinh hoạt yaok harei, dalam nan blah aw cà sa lac pandap hu makna biak praong oh kurang hu.

Patui di nan lac peih ngak dom adat hu makna praong, lac: adat quy y Tam Bảo, adat pok bingu cúng dường Tam Bảo saong thọ trì quy giới, chư Tăng saong Phật tử ngak adat kakuh Tam Bảo, pang langyah ka “Quả báu dâng y Kathina”, hadei di nan meng dâng y cà sa, pok 4 janih pandap tal tăng đoàn... Hadei di dom adat ini, chư tăng tụng kinh likau hu salamat, tadhau ayuh tal sang dom Phật tử, klah rabha patuah jamo tal gauk gar.

Hadei di dom adat dâng y cà sa, dalam baha hu rah tabiak rilo bruk ilamo meng kan, yau ye daoh dù kê, tamia ginang Sadăm, Chằn, tadhau ayuh, phleing ngũ âm… Rilo bruk main sambai karei di melam jeng hu peih ngak, pamere rilo mikva Phật tử saong tuai damuai.

Dâng y Kathina lac ilamo siam mekre meng kan dalam raidiuk di urang Khmer Nam bộ, ngan haong rilo adat cambat meng kan saong dom bruk daoh tamia, dom kadha main meng kan di bhap bini, tapa nan rik daong khik ramik, pok mayaom dom yaom glaong ilamo meng kan di bangsa, paglaong bruk jum pataom di chư tăng, phật tử dalam phum, sóc./.

Urang lang: Thu Thảo