Đoàn Sĩ – urang vak di rayo sap ndom Viet Nam daok di ban raya HCM hu kadha vak brei thau bruk chreih chrai di harei roya jum pataom di bhum bhap bini Cam huyen Tuy Phong, tỉnh Bình Thuận. 

Mikva Cam daok di palei Tuy Tịnh 2, xã Phong Phú, huyện Tuy Phong, tỉnh Bình Thuận bahrau peih Harei roya Jum pataom bangsa thun 2022. Tuy Tịnh 2 lac palei hu 2 bangsa Kinh – Cam daok haong gauk, urak ini dalam palei hu 302 sang, 1.115 menuac, dalam nan bangsa Cam hu 208 sang. Patagok bruk jum pataom, rilo thun tapa, bhap bini dom bangsa di palei Tuy Tịnh 2 kham merat hu mbaok tame dom bruk ngak, bruk jak ba kayua karja palei ba tabiak. Mikva hu rik tame haong jien di karja ngak 5 jalan palei atah 1.000m, praong 5m haong yaom jien ngak abih tih 1 tỷ 400 triệu đồng. Dalam palei hu 294 dalam abih tih 302 sang hu brei angan lac baoh sang ilamu. Ong Mai Văn Bình, Akaok palei Tuy Tịnh 2 brei thau: “ Karja daong brei hu sarak daong phun jien ka baoh sang kathaot ngak sang, phun jien ngak mbang…”

Daok di palei Lạc Trị, xã Phú Lạc, thun ini, “harei roya Jum pataom bangsa” rah tabiak chreih chrai haong ragu tamia Cam ndung bak ilamu bangsa saong dom panuac daoh pok meyaom puk paga, palei negar. Pak ini, mikva jeng hu brei rilo panuac abih hatung hatian pambuak tal peih ngak dom bruk pakacah gauk anit ranam taneh ia, khik ramik sron mbon, khik hacih sa-at alam môi trường…, saong hatai caong khin dak padang puk palei dak harei dak kaya meda, siam mekre. Ong Trương Công daok di palei Lạc Trị, xã Phú Lạc chreih chrai lac: “ Jalan mbak, alam moi truong hu mikva dalam palei biak njauk hatai ngak tui..”

Palei Lạc Trị urak ini hu 940 sang, 4.199 menuac, dalam nan urang Cam hu tal 80% dom menuac sia. Patagok ilamu siam mekre saong meng dom kham merat yam tagok dalam raidiuk, dom sang kaya, meda dom thun tapa gam gam tagok, sang kan kathaot tal harei ini trun daok 3,5%.

Ong Nguyễn Trung Trực – akaok UB bhap bini huyện Tuy Phong brei thau, mikva Cam dalam huyện rilo meng ngak nong, dalam nan rilo meng ngak padai. Dom thun tapa, mikva Cam daok pak ini tuk halei jeng thau jum pataom gauk, ngak siam tui dom sarak di Đảng, hukum di Karja saong adat palei. Gam haong nan, bruk ilamu dak harei dak hadah, mikva Cam tuk halei jeng khik talei rohim puk paga, daong ba gauk dalam raidiuk.

 Meng dom jak jeng ngak hu blaoh, anak tal, mikva Cam huyện Tuy Phong, tỉnh Bình Thuận daok patagok prein khang jum pataom bhap bini, khik ramik ilamu bangsa./.