Urang Raglai iew dom kadha daoh bhap bani di drei lac Ma-nhi. Iek tui ragu daoh saong asal di kadha daoh, dom urang roh duah parabha ragu daoh bhap bani Raglai jeng rilo janih karei di gauk yau: Sử thi – trường ca Raglai, ragu daoh Hari saong K’thơn, daoh khan brei thau hatung hatian atau daoh mbuan kan, daoh dam dara, daoh ru ana, ru adei; daoh kakei.

 Meng kan mai urang Raglai biak takre pang daoh sử thi, kayua sử thi lac labik ndung bak dom yaom glaong ilamo di bangsa; lac suan yava di rai diuk, haong hatai caong khin yam tal rai diuk trei sil. Nan lac dom dalikan atah khan brei thau ka dom anh hùng mesruh pacang kaol khamang piah khik caga puk palei. Yaok sử thi bhian biak praong, urang daoh bhian daoh rilo melam atau luac bilan meng blaoh. Dom kadha praong dalam sử thi Raglai meda hu khan tal sử thi Sa-ơ atau sử thi U-đai.

Sử thi Raglai hu daoh tui jalan gam daoh gam tamia. Tui dalikan bo urang khan meda hu pandar dom ragu daoh bhap bini ka nyu laghaih piah daoh. Dalam nan rilo meng lac ragu daoh Sari – lac ragu daoh hu rilo urang takre. Dalam tuk rija, roya, urang taha urang ranaih dalam palei bhian pataom gauk dalam baoh sang tol piah daoh sử thi. Saong dom sử thi Raglai meng nan hu patoa veik tapa cambuai meng rai ini tapa rai hadei.

 Daok dalam dom kadha daoh dam dara di urang Raglai, Ai-lơi – ragu daoh anit ranam hu rilo urang takre saong hu daoh rilo ragu tui dom labik. Dalam dom bruk bui sambai tuk halei dom kadha Ai-lơi jeng hu daoh tagok.

 Meyah Sari lac ragu hu pandar rilo dalam daoh sử thi ngan haong jalan daoh khan, ndom tagok hatung hatai di drei ye Ai-lơi lac dom kadha daoh katut panak, hu ragam tani tanat saong rilo ragu. Kayua hu rilo ragu, nan ye Ai-lơi bhian hu dom yau likei kumei Raglai pilih ruah piah daoh nao mai, brei mboh hatai ranam, gaok mai daok pandar piah cải lý haong gauk…

  Meblah sa binah prong dalam ragu daoh bhap bani Raglai nan lac dom kadha daoh “Ru ana, ru adei”. Dom ragu daoh bingi pang, yamen la-an piah ru adei sit.

 Jeng yau dom bangsa adei sa-ai karei, daoh ru di urang Raglai ndung bak hatai anit ranam saong biak ginreih di amuk, di amaik, di sa-ai kamei brei ka anek bhik di drei tuk daok sit. Asal kadha dalam panuac ru bhian hu urang amaik mek dalam dom janih pandap panda, kayau patau, anek athur vin taom dhar piah ka uranaih mboh hu rai diuk yaok harei. Kayua yau nan ye, dom kadha daoh ru di urang Raglai brei mboh ka rai diuk mbang angui saong bruk ngak mbang pala drak di bhap bani pambuak pagam haong langik tasik, haong ceik glai,…

 Urang Raglai mong tangei yau anek likei saong padai yau anek kamei. Dalam panuac daoh ru, padai saong tangei hu salih meng anek likei saong anek kamei. Ini lac dom kadha daoh ru tok hu daoh tagok dalam tuk ngak adat mbang akaok padai bahrau. Ini lac harei pataom prong di urang Raglai.

 Dom kadha daoh ru di urang Raglai oh lac tok brei mboh hatai anit ranam ngan haong anek bhik di drei bo gaok tuk mai daok daoh ka rup drei atau payua ka urang halei nan. Abih di nyu lac, urang Raglai hu 2 kadha daoh ru biak karei, takik mboh dalam gilang kadha daoh bhap bani di dom bangsa karei nan lac daoh ru tangei saong daoh ru padai.

  Dom kadha daoh bhap bani Raglai tuk halei jeng pambuak pagam haong rai diuk di bhap bani urang Raglai. Asal kadha daoh bhap bani Raglai jeng biak mbuan mbiah saong cambaih laih, min jeng brei mboh biak ginup dom hatung hatai anit ranam di anek manuac ngan haong langik tasik, taneh riya saong bhol bhap rah ra. Ndom ka gah ragu ragam, jaik abih dom kadha daoh Raglai daok veik tal harei ini hu daoh tui jalan daoh khan, daoh nao mai, oh hu atau biak takik pandar alat ragam. Dom kadha daoh bhap bani Raglai bhian hu âm vực biak panak, ragu lai la-ar, bingi pang, biak laghaih piah daoh khan brei thau ka hatung hatai anit ranam taneh aia, puk paga, palei negar, baoh sang, dam dara likei kumei.

Ragu daoh bhap bani di urang Raglai lac yaom glaong brei hu khik ramik  saong patagok. Kayua yau nan ye, langiu di bruk kham merat di dom urang taha umo pato veik ka rai rah dam dara thau daoh kadha daoh bhap bani  Raglai,  jeng caong hu bruk ba tangin tame, tame bruk biak khang di dom pakat dom ngành. Hu yau nan, asal ilamo, yaom glaong ilamo di urang Raglai meda hu khik ramik patoa veik tal rai hadei./.

Urang lang: Jasi