Tuk bilan Thu tal mai, tuk sambo kanyik katam bak abih hamu apuh lac tuk brei thau ka bilan yuak padai bahrau di bhap bani dom bangsa bhum Tây Bắc. Urang Thái di Phong Thổ chreih chai cang raok dom harei ini piah peih ngak Adat Kin lẩu khẩu mẩu, likau ka bhap bani dalam palei, dalam puk saong tuai damuai hu rilo kadha siam mekre, khang tangin kajap takai, trei sil; angin siam hajan laghaih, ngak padai hu padai, pala tangeiy hu tangeiy, patuah jamo mai haong yaok baoh sang saong anek taco.  

Ong Bùi Quang Lịch, Phaok Akaok UBND xã Mường So, huyện Phong Thổ brei thau: Harei pataom ngak adat Kin lẩu khẩu mẩu daok iew lac Harei pataom ngak adat Cốm bahrau hu peih ngak yaok thun dalam tuk puac bilan Thu saong akaok bilan Brak angaok mblang hamu Mường So. Ini lac tukvak piah ka bhap bani brei mboh hatai thau dhan phol langik tasik, dom po yang hu brei ka puk palei, bhap bani pala hagait hu nan saong rilo kadha siam mekre karei. Harei pataom ngak adat daok lac tukvak piah ka bhap bani dom bangsa dalam tỉnh Lai Châu mai pataom gauk, ndom biai nao mai, dak padang rai diuk ilamo khang kadang, patagok pren khang gun pataom bangsa, daong dak padang saong cak rok patagok ilamo Việt Nam hadah krah, mbak carak ilamo bangsa.

Harei pataom ngak adat Kin lẩu khẩu mẩu hu dua binah, binah ngak adat saong binah pataom gauk me-in bui sambai. Peih mbaok ka binah ngak adat lac raok suan padai, ini lac adat ginreih brei mboh bruk iek praong suan yava di padai, iek prong Yang nong. Tuk nao raok  suan padai mai ngak adat ye brei palih ruah harei siam. Angaok jalan nao daok hu adat hèm, nan lac gaok thei salam drei jeng oh brei javap jaleiy, oh ndom hagait nao tapak tabiak mblang hamu. Patui di nan lac adat kakuh yang padai saong adat thaok brah cốm, likau sron mbon. Brah cốm thaok blaoh hu tapaok tame hala patei that hijao, gam ngak brei patagok sambo màu hijao di cốm, gam khik hu pahe di aia tasau padai.

Binah ngak adat hu tamat haong bruk kakuh yang, likau patuah jamo saong thau dhan phol. Hadei di tuk manuac urang ngak blaoh adat di labik kakuh yang, gru iew yang mek pandap iew yang tabiak langiu parabha brei mek patuah, likau hu sron mbon, likau ka bhap bani dalam palei, dalam puk hu khang kajap pren yava, ngak mabng hu ginup meda.

Blaoh binah ngak adat, bhap bani Thái haong tuai damuai tame ma-in dom kadha ma-in meng kani, ragam tamia yau: katung talei, chat sạp, parah còn saong tamia xòe. Dom bruk nan hu ngak brei bhap bani, tuai damuai mai jaik gauk jang saong iek prong dom ilamo meng kan di bangsa Thái dalam ilamo dom bangsa Việt Nam.

Dalam huyện Phong Thổ hu 11 bangsa, dalam nan bangsa Thái meblah jaik 20%. Huyện daok daong khik ramik 8 adat cambat di bhap bani bangsa Dao, Thái, Mông piah pachreih bhap bani khik ramik, patagok ilamu bangsa  pambuak haong dak padang rai diuk ilamo, patagok bruk rivang ma-in.

Amuk Mai Thị Hồng Sim, Phaok akaok UBND huyện Phong Thổ brei thau: Harei pataom ngak adat Kin lẩu khẩu mẩu nan lac sa adat cambat meng kan di bangsa Thái labik Mường So. Adat hu padang ngak veik, piah khik ramik ilamo saong pachreih mikva kham merat dalam bruk ngak mbang pala drak. Tapa nan, daong ngak brei paglaong hatai sahneng di bhap bini saong patagok trách nhiệm ka dom rai rah dalam bruk khik ramik, patagok yaom glaong inem krung ilamo bangsa./.  

Urang lang: Hani Pha – 28/10