Umo jaik 70 thun min rilo thun ini mai nghệ nhân Lò Thị Sọn, bangsa Lự, daok di bản Nà Khum, xã Bản Hon, huyện Tam Đường, tỉnh Lai Châu jeng daok abih drei haong dom tal bac pato ilamu. Dalam yaok tal bac di dom sang ilamu, dom kadha tamnia meng kan atau dom ragu daoh bhap bini gam haong sap khlei, sap chiêng chreih chrai grauk bhum palei:“Dalam tuk peih taneh bilau, ngak hamu ngak apuh, amuk paneh hu kadha daoh ye pato ka anek taco nyu daoh. Anek taco daok sit oh thau daoh ye amuk pato brei thau daoh, thau tamnia. Urak ini dom anek taco thu paneh kadha daoh saong thau daoh tamia. Amuk taha ye min jeng daok hu mbaok tame bruk daoh, tamia, biak bui sambai...

Langiu dom tal pato ilamu oh mboh di mata, lac biak kurang meyah oh ndom tal ilamu hadah tanyak dalam dom blah khan ao meng kan di bangsa Lự. Khan ao meng kan di bangsa Lự ngak ka urang biak caik hatai kayua nyu hu ngak meng dua palak tangin gheih ngak di urang kamei haong dom bingu la biak gheih, biak mekre. Abih di nyu lac urang kamei bhian cuk ao sambo màu chàm, blah anak cada, jhih gah iu kateik tagok jhih gah hanuak saong hu kak meng dom talei merai hadah tanyak.

Sa-ai Lò Thị Đi, urang jakar ilamu xã Bản Hon, huyện Tam Đường brei thau: Yaok harei urang kamei Lự bhian cuk khan ao pek mbuan mbiah piah lagaih ngak bruk. Tuk lễ, tết, atau tuk sang hu tuai praong, urang kamei cuk khan dua tal haong bingu la 3 tal biak mekre mata. “Harei 30/4 yaok thun, xã kol adei hu ngak harei pataom Sú Khon Khoài, hu gam bruk menyim khan bai saong daoh tamia. Harei pataom nan kol adei khik ramik piah hadei ini anek taco thau lac saman dahlau ong muk drei ngak hamu pandar kabao piah la-ua. Tuk drei yuak kuak blaoh ye ngak adat thau dhar phor kabao. Saman dahlau yaok sang eng drei ngak, min urak ini pataom veik ngak ka abih palei.”

Dalam 20 bangsa daok dalam tỉnh, Lai Châu hu 4 bangsa hu menauc oh ka tal 10 rabau urang, lac: Cống, Mảng, Si La saong Lự. Dalam nan, urang Lự daok di Lai Châu hu labaih 1.300 sang, jaik 7.000 menuac, daok di huyện Tam Đường, Sìn Hồ saong daok khik hu rilo yaom ilamu meng kan siam mekre yau ye: dom harei pataom, bruk padang ngak sang tuan meng kan, bruk menyim meng tangin takai, khan ao, sap ndom biai, ilamu daoh, tamia... Ong Trần Mạnh Hùng, Phaok Yam ndok Sở Ilamu, Thể thao saong Du lịch Lai Châu brei thau:“Urak ini dom rija roya di bangsa Lự hu ba tame angan daong jien sahui piah padang ngak veik saong khik ramik. Dom yaom ilamu yau khan ao saong dom bruk ngak meng tangin, dom ngữ văn bhap bini daok hu tỉnh ba tame pato. Tỉnh jeng sangka padang ngak harak hồ sơ piah pok angan dom nghệ nhân bhap bin, nghệ nhân ưu tú, dom urang daok khik ramik inem krung, patagaok bruk pato pakai, brei thau dom yaom ilamu meng kan di bhap bini”.

Panuac daoh meng ragu daoh dam dara di anai kamei Lự hu pok sap tagok meng hatai sahneng mboh di nghệ nhân Lò Thị Sọn yava tagok dalam biar harei joa palao ayut sahabat. Yaom lac daok gaok rilo kan kandah min meng sarak njauk piah “khik ramik, patagok ilamu meng kan siam mekre di dom bangsa, pambuak haong cakrok” di Tỉnh ủy Lai Châu, dom ilamu di bangsa Lự daok lai tame ilamu di 54 bangsa, ngak jeng ilamu Việt Nam gheih, mekre./.