Dahlau deih, dalam huyện Hoàng Su Phì tok hu 3 darak lac Vinh Quang, Bản Máy saong Nậm Dịch, hu meng saman France, dalam nan darak Vinh Quang praong di abih. 3 darak ini ini jeng hu peih di harei adit yaok adit, lac labik pablei salih kaya nong di mikva daok di dom bhum dalam huyện.

Urak ini, abih tih dom xa dalam huyen jeng hu nyaom darak pasa, harei peih, harei padeih. Jalan mbak hu peih tal dom puk palei, rahra hu raidiuk tani tanat cak rok patagok jang, nan je bruk blei hu radaih mac piah nao mai saong pajeng pandap panda, kayua yau nan ye bruk trun dom darak pasa hu nao gam gam jang saong yaok tuk trun darak rilo meng lac di dah page. Yaom lac bruk pablei salih di nyaom darak pasa Hoàng Su Phì hu rilo salih bahrau dut saong dahlau deih, min jeng daok khik hu dom ilamo gheih mekre di pak ini, sa dalam dom bruk ngak nan lac bruk taom gaok di darak pasa. Di mangaok dom jalan haluk sit jaik labik darak pasa, bhian mboh dom urang likei, urang kumei bangsa Dao, Tày, Nùng, Mông padeih takai di tapen jalan piah rami ramik veik khan aw ngui cuk di drei blaoh meng yam takai tame darak.

Di dom nyaom darak pasa di huyện Hoàng Su Phì, bruk mbang huak rah tabiak dalam chreih chrai ngan haong dom pandap mbang meng kan yau ye thắng cố, pacuk matham, baoh kraoh rilo janih saong oh kurang hu panyin alak men hala. Bruk mbang huak di mikva pak ini  jeng mboh karei, rilo urang ba tui paok lisei, diuk hu caga dahlau meng sang, tal quan ye blei jaluk phở atau mì tôm saong kalaok alak piah manyum. Gam mbang gam ndem mayai, nan ye sa jaluk phở sit haong dom panyin alak min dui atah tal dom maong.

Di darak Vinh Quang, sambo mau di dom khan aw ngui cuk lac hijao, jhuk di bangsa Tày, Nùng, La Chí; di darak Nậm Dịch rilo meng lac sambo kanjik katam, meriah bhong gam haong dom sap leng keng di dom pandap cuk ngak gheih meng paraik atau samo hijao di dom blah khan aw saong kadung bak ngak meng khan bai di dom urang kumei atau sambo bhong maraik di dom talei kak kaeng di mangaok tanyiak sambo hijao di dom blah khan aw di bangsa Dao ngan haong aw tah. Dalam tuk nan, di darak Thông Nguyên rilo meng lac sambo meriah bhong di mangaok sambo hijao ngan haong dom hala bingu biak gheih di dom blah khaw ma-om akaok saong sambo bạc hadah jangaih mangaok kadung lùi ton tual di anak cada di dom urang kumei bangsa Dao bhong.

Bruk pablei salih pandap panda jeng biak gheih mekre, abih di nyu nan lac di nyaom dom pandap thủ công mỹ nghệ. Urang kumei atau urang likei praong thun par di mangaok tangin dom blah khan bai, marai pứt rilo sambo, pandap ngak gheih meng pariak atau drei manuk, drei pabui anek, paok njam atau ikan di dom jalan nao, nan lac jalan pablei salih dạo bo tuai du lich bhian ndom bui sambai lac pandap tanyak tangin atau pandap plah di pa-ak. Dom bruk pablei salih rah tabiak dalam bui sambai, chreih chrai, oh hu kamlah gauk, maraik gauk blei, pablei.

Urak ini, bruk di nyaom darak pasa di huyện Hoàng Su Phì hu rilo salih karei, min jeng daok khik hu dom yaom glaong ilamo gheih mekre di nyu. Ini jeng lac sa dalam dom kaya pandap du lich angan je di huyện daok hu gah Du lịch pambak tame, yaih khan piah dui pachreih tuai du lich saong pabak ka bruk cak rok patagok kinh te di bhum palei./.