Di Sóc Trăng, meng lavik mai tamia rom vong hu bhap bani Khmer khik ramik saong patagok. Dalam dom rija, roya meng kan di bangsa Khmer, meng uranaih tal urang prong thei jeng tame tamia – daoh rom vong biak bui sambai, chreih chrai meng dom tangin, takai tamia tui yaok ragu ragam.
Dom nghệ sĩ Khmer brei thau, tamia rom vong hu makna lac tamia vin taom dhar, yaok gu likei kumei gam tamia, gam mbaiy mai mong mbaok gauk, brei mboh bruk anit ranam gauk. Dom động tác di urang kamei bhian njuan njac, lamin lamuac, tuk tamia dua gah tangin ba tabiak anak cada. Daok dom urang likei, dua gah tangin tuk halei jeng peih praong jang piah gam tamia gam pacang khik urang kamei; pambuak haong takai, takai halei gah anak ye tangin nan plaik biar saong takai halei gah likuk ye tangin nan pok glaong; palak tangik gah iew pandang tabiak ye palak tangin gah hanuak pakhuak tame saong cagar veik.
Tui Thạc sĩ Sơn Lương, tamia rom vong brei ngak njauk tui dom adat cambat yau ini: urang takik thun, umo sit, địa vị biar tabiak tamia dahlau, hadei di nan meng yam tal daa dom tuai damuai, urang prong thun, taha umo tabiak tamia haong gauk. Kapul tamia nao mai dak rilo vòng dak bui sambai, oh lac agama halei, bangsa halei jeng ba gauk tame tamia tui ragu ginang. Tuk ginang padeih, ye abih gauk padeih veik mek tangin salam gauk blaoh mai veik labik daok di drei. Dom ragam tamia Khmer biak lamin lamuac, njuan njac, yaok động tác hu ngak jeng yaok ragam tamia saong hu dom angan iew cambaih laih, ndung bak asal karei…
Tamia rom vong hu labik dang prong dalam rai diuk bhap bani Khmer, meng dalam bruk hit ngak mbang tal adat cambat tanarakun. Tapa ragam tamia, hutung hatai di anek manuac haong anek manuac dalam bhap bani urang Khmer dak siam gheih jang.
Ndom ka yaom dak rai sajarah, ini lac ragam tamia hu mbang dalam tame glo akaok di bhap bani Khmer tapa rilo rai rah. Ndom ka yaom ilamo, rom vong brei mboh hatai caong khin yam tal kadha siam gheih abih di bhap bani Khmer. Kayua ragam tamia ini hu padang tagok dalam bruk hit ngak mbang, dalam bruk ngak nong saong jaik taphia haong taong abih bol bhap rah ra nan ye rom vong nyu biak jaik taphia haong bhap bani Khmer, kuhria gam urang Yuan, urang Lo daok diukrai haong urang Khmer jeng thau tamia rom vong.
Tui Sở Ilamo – Padhih saong Rivang ma-in Sóc Trăng, tamia rom vong lac janih oh kurang hu dalam dom tuk lễ, tết, ndam lakhah mbang menyum di bhap bani Khmer. Nyu oh lac ndung bak ginreih bo daok lac bruk bui sambai hadei di tuk ngak bruk glaih glar di langiu mblang hamu, rik daong tame bein bingu ilamu bak sambo màu di bangsa Việt Nam. Meng dom yaom glaong siam mekre nan, tamia rom vong di urang Khmer hu Mentri Ilamo – padhih saong rivang ma-in ba tame angan inem krung ilamo oh mboh di meta pakat negar./.
Urang lang: Jasi
Viết bình luận