Harei ariya Việt Nam thun 2024 hu peih ngak haong hatai caong khin ba tal  “bản hòa âm thơ ca” rilo sambo màu dalam rai diuk, anek manuac Việt Nam di grauk labik dalam taneh aia, gam haong nan, ini jeng lac harei pataom bruk gheih mekre dalam rai diuk saong ilamo di taong abih dom bangsa adei sa-ai tapa ariya.

Ban Chấp hành Kapul urang vak văn Việt Nam brei thau, ngan haong kadha “Bản hòa âm taneh aia”, Harei Ariya Việt Nam thun 2024 meda lac harei pataom di urang cuak ariya dom bangsa Việt Nam, gam haong nan jeng lac sa jalan peih ngak siam sarak gul pataom bangsa di Đảng saong Karja.

Tui nan, dalam danak dak, Kapul urang vak văn Việt Nam meda daa dom urang cuak ariya, urang vak văn lac urang bangsa takik yau Thái, Mường, Dao, Tày, Khmer, Ê Đê, Chăm, Hoa… meng grauk labik dalam taneh aia mai Hoàng thành Thăng Long, ban ine Hà Nội piah ba gauk daoh tagok dom “kadha daoh” ka anek manuac, ka bangsa saong ka dom kadha siam gheih di abih; hu mbaok tame ginum biai, ndom biai nao mai ka ilamo bangsa dalam bruk cuak ariya, dom jalan ngak piah gam khik hu ilamo bangsa, gam ba ilamo bangsa taom gaok haong jaman bahrau, yam tabiak dunya…

Piah kuhria caga ka Harei pataom ariya ngan haong asal kadha “Bản hòa âm taneh aia”, lambaok Ban Chấp hành Kapul urang vak văn Việt Nam hu ngak bruk haong Mban khik iek Hoàng thành Thăng Long, peih bruk palih ruah saong daa dom urang cuak ariya hu mbaok tame, palih ruah dom inem krung ariya, akayat gheih yaih khan dalam melam Ariya Nguyên tiêu, piah ka bhap bani hu pang urang bangsa takik dak dalikan dalam dalah apui ka dak rai sajarah di bangsa drei.

Gam haong nan, Kapul urang vak văn Việt Nam jeng hu harak ieu UBND dom tỉnh, ban tacei pato saong daong palaghaih siam di abih ka dom Kapul Văn học nghệ thuật tỉnh ban peih ngak siam Harei Ariya Việt Nam 2024 di dom puk palei, dom tinh ban dalam taneh ia./.