Bangsa Lào di huyện Tam Đường, yaom lac rahra oh hu rilo min raidiuk, ilamo hu rilo siam makre, parilo ndung mbak ilamo meng kan dalau di urang bangsa Lào bhum Tây Bắc.

Meng jaman dalau mai, anek manuac manusia pok praong glaong ia, ia nyu hu makna biak praong dalam raidiuk di anek manuac jeng ye anek athur di dunya. Meng hatai sahaneng yau nan, mikva urang bangsa Lào hu pambak tame “phà,” “đin” (ieu lac langik tasik – taneh riya) piah caong ka hajan siam hangin lagaih, manusia dunya hu haniem phul, phun kayau glao rom jeng hu tamuh siam. Inilac asal kadha tabiak rai, hu caik veik ka rai hadei adat ieu yang lakau hajan di urang bangsa Lào saong hu ieu lac Harei raya Bun Vốc Nặm atau Harei raya thac ia.

Harei Bun Vốc Nặm di urang bangsa Lào hu peih tabiak yaok thun piah caong hu hajan siam hangin lagaih, pala padai hu padai, pala tangei hu tangei, manusia hu sihat khang kadang. Harei Bun Vốc Nặm hu 2 janih hanok hasa ngak yang raya mbun tui adat mang kan, yang ka dua ngak raya pataom gauk ma-in bui bai.  

Dalam mbang ngak adat cambat meda parang ngak veik adat ieu yang lakau ka bruk ngak mbang,lakau hajan, tamia xòe saong thac ia. Dahlau di abih, dom urang taha hu angan je di palei meda pok tagok dom pandap panda tagok kadai tuan kakuh yang meban. Hanok ieu yang hu pabui, manuk, ahar tapei nung, alak, ndiuk, tabau, patei, bingu, baoh karaoh, ahar meneng.

Hadei di tuk ieu yang lakau du-a blaoh, kapul manuac hu dom urang taha hu angan je di palei saong dom urang likei, urang kumei hu prein yava biak khang kadang, kambuan salut but nao tui nyaom kapul piah likau ia hajan piah ieu yang kakuh patau Bhat dalam paha. Kapul nao likau ia di dom baoh sang hu puk palei pilih ruah, dom sang ini di thun blaoh mada ngak mbang hu ginup hu kaya, hu trei sil, haniem phul di abih dalam palei.

Di mangaok jalan nao, dom sang dalam palei ba ia hajan tabiak dang di 2 gah jalan piah thac ia tame kapul raok caong maong ka sang drei thun bahrau hu patuah jamo selamat, hu prein yawa khang kadang, ngak mbang hu ginup kaya mada.

Tuk kapul raok ia saong bingu mai tal paha ye gru ieu yang meda taduan ndap nda hanok ieu yang tame paha. Adat njauk hu dom pandap paba yau ye ahar, tabau saong baoh karoh.

Hadei di tuk pok bingu tagok, 15 urang likei hu prein yava khang kadang di abih dalam palei pan nding ia piah ka gru ieu yang da-a ngak adat rao patau Bhat ngan haong hatai caong lac rao hacih dom mun thur, tachrauk di dunya. Patui veik, gru ieu yang meng peih ngak adat cambat caong hajan. Gam nao, gru ieu yang saong dom urang taha di palei gam ieu yang piah brei mboh hatai biak iek glaong saong likau po yang brei ka rahra hu peih ngak harei raya thac ia caong hajan.

Hadei di tuk likau po yang, langik tasik, taneh riya tasik blaoh, gru ieu yang meng brei ka yaok urang hu daoh tagok dom kadha daoh, chat tamia anak sang paha. Dom kadha tamia, dom kadha xòe gam haong dom kadha daoh di rahra bhap bini, ragu ragam hu danei tagok, yaok urang gam saong gauk daoh tamia piah caong hu ka sa thun bahrau bak bui sambai, trei sir, haniem phul, hu patuah jamo selamat.

Di labik thac ia hu sa phun patei klauk padang blaoh di kreih ribaong ia, piah brei thau lac phun kayau daok hu tamuh siam, tabiak baoh. Urang likei puk angaok, urang kumei puk mala, oh pilih taha atau uranaih gam ba gauk tabiak thac ia. Ngan haong hatai sahaneng lac pathak biak rilo, patuah jamo jeng mai biak rilo, nan ye thei jeng caong ka drei hu pathak dak biak rilo dak siam.

Ong Đỗ Trọng Thi, Akaok Jabat Ilamo saong Khau tin huyện Tam Đường, brei thau lac: Harei raya Bun Vốc Nặm ieu lac harei raya hu makna praong dalam raidiuk, ilamo di mikva urang bangsa Lào. Kayua ieu lac langiu di brei mboh hatai thau dhar phol tal muk kei, yang po, ini daok ieu lac masa tukvak piah ka gauk gar dalam sang, mikva dalam puk palei jumpataom gauk taom mbaok gauk. Harei raya hu peih tabiak pok mayaom dom siam gheih ilamo, patagok dom yaom glaong ilamo meng kan di urang bangsa Lào saong paglaong hatai sahaneng di mikva dalam bruk khik ramik, patagok dom yaom glaong ilamo di bangsa./.