Khan ao meng kan di urang kamei Mong mbong labik ini hu ao takuai pak mata, capha katut tal baoh patih, xà cạp trơn sambo màu juk, suek lauk rilo tal angaok akaok saong sa baoh tạp dề.

Bruk njauk biai nan lac dom mẫu bingu la meng kan ini tuk halei jeng hu sambo màu sup, oh hadah tanjak ngan haong dom candaih sambo màu prong. Nan lac kayua dom bingu la biak cầu kỳ, hu ngak tabiak meng ilamu pet pagam khan bai tui jalan meng kan mai di urang Mông mbong. Dom bingu la hu cih saong jik meng marai hui yau baoh bao bloh cakak haluh.

Tui yaok bhum palei, ilamu pet ini meda karei di gauk, min hu sa bruk yau gauk nan lac hu ngak biak tani tanat. Dom bingu la hu cih saong jik meng marai dạng xoắn ốc blaoh cakak haluh.

Hadei di nan, urang jang gheih tangin veih dom jhih bahrau cakak blaoh mek akaok jarum marai katut panak piah jik tame dalam dom labik khan bai tưa. Puac di abih, piah ngak hu blah khan pet, urang Mông mbong pandar talei marai mbong jik pagam veik di kreh dom jalan di labik nền sẫm daok mblo tabiak, ngak jeng dom bingu la gheih mekre.  

Tui nghệ nhân Sùng Thị Xé, dahlau diah, dom bingu la ini hu ngak meng dom janih pandap bhian pandar yau tathi kua mbuk, gilaong di mbaik jarum jik, baoh bau but, bingu hala, thaik binguk mbuan ceik, thaik binguk phun dương xỉ, lathung sai… mai meng thaik binguk di dom anek athur, pandap panda pandar vin taom dhar. Kandauk dalam nan, lac makna saong  biểu tượng karei, ndung ba dom yaom ilamo, hatai jia di bangsa.

Urak ini, Y Tý daok jeng labik du lịch bhap bani biak pachreih tuai damuai atah jaik, abih di nyu lac tuai damuai dunya mai rivang iek, duah thau. Dom jang menyim jeng pamaong tal cak rok patagok dom janih pandap bahrau laghaih haong hatai takre di tuai damuai saong hu yaom pandar glaong dalam rai diuk yaok harei yau kadung teik, khan me-om akaok, khan ao meng kan, váy, ví...

Mai tal Y Tý harei ini, tuai damuai meda hu tacei ngak dom bruk pet pagam khan bai biak tani tanat. Ini jeng lac jalan piah meyaih khan ilamo hadah krah di bangsa tal tuai damuai dalam negar saong angaok dunya./.