Di huyện Ba Chẽ hu 14 bangsa daok haong gauk, dalam nan bangsa Dao hu rilo di abih, hu 3 nyaom lac: Dao Thanh Y, Dao Thanh Phán, Dao Lô Gang. Yaom lac bangsa Dao haong gauk, min yaok nyaom jeng karei di gauk ka khan aw ngui cuk saong adat cambat tanarakun.

Bruk njauk caik hatai di abih tuk mai tal palei Dao Lô Gang, lac blah khan aw ngui cuk meng kan hu pet meng tangin biak gheih. Khan aw di urang Dao Lô Gang rilo meng pandar sambo mau bhong meriah saong kanjik katam meng urang likei tal urang kumei,  meng ta-mo ma-aom akaok, yếm, aw, capha, talei ka-ing. Daok veik lac sambo hijao hala kayau, sambo mbong patih, sambo jhuk di mangaok blah khan bai jhuk. 

Urang Dao Lô Gang sahaneng lac, sambo bhong meriah lac sambo di ia harei ba mai bruk caih manek, cak rok patagok, patuah jamo saong haniem phul. Sambo kanjik katam lac sambo di padai hamu, puh cakak pambuak pagam miat miat haong urang Dao.

Dut saong nyaom Dao karei, khan aw ngui cuk di Dao Lô Gang hu pet bingu hala biak tani tanat, gheih makre. Gah dalam hu yếm, mikva ieu lac aw anek hu pet bingu la saong pagam dom baoh patuk meng paraik. Capha ống praong, capha atah glaong mangaok mata takai, jhih capha hu pet bingu la.

Tamo ma-aom akaok hu kak meng dom tal khan bai gah dalam, anak tamo taong abih hu sambo bhong deih yau tabung sang, angaok tamo hu tuan klaih khan pet baoh patuk, phun hala, bingu kak vil val tamo, meng talei baoh  njuk rilo sambo mau. Talei ka-eng sambo mbong patih atah 2m hu pet bingu la di dua akaok.

Daok khan aw di pangantin kumei, deih yau khan aw yaok harei, min njauk ndem tal di abih lac di khan pacang mbaok saong khan ma-om akaok hu ngak meng dom talei len sambo bhong, pet bingu hala biak gheih.

Khan aw di pangantin likei hu tamo ma-aom akaok, aw, capha. Tamo  gul vil hu pet bingu la hu binguk baoh ceik, bingu 4 seok, thaot anek manuac, asal tamekai puh. Aw hu 4 kadung gah anak, yaok gah aw hu dua kadung mangaok mala hu pet abih rup aw, bingu la jeng deih yau aw kumei pambuak haong langik tasik, raidiuk mbang ngui yaok harei. Langiu di nan, pangantin likei daok hu cuk tagok gah langiu sa blah aw atah sambo hijao, gam tui di nan lac sa blah khan 4 mata hu pacang anak mbaok.

Ong Triệu Sinh Kim, Bí thư chi bộ, Akaok palei Khe Ốn, xã Thanh Lâm brei thau, urang kumei Dao Lô Gang biak tari taring, hu tangin gheih pet. Min, tal rai ranaih urak ini oh sangka tal bruk cuk khan aw yau meng kan, kayua dom kamuan nao bac atah sang, nan ye bruk pato pet oh hu gam gam.

Dalam dom thun tapa, huyện Ba Chẽ tuk halei jeng iek praong tal bruk khik ramik yaom glaong ilamo bangsa saong abih di nyu nan lac khik ramik khan aw ngui cuk meng kan, dalam nan hu khan aw ngui cuk di urang Dao Lô Gang meng dom jalan ngak lac: peih dom tal pato pet khan bai, parang iek khan aw ngui cuk bangsa, jak ba mikva bangsa Dao cuk khan aw bangsa dalam dom harei rija, roya, tết, harei pataom mbaok, dalam var chào cờ akaok adit di Sang bac phổ thông bangsa gam bac gam daok di huyện, di harei ngak adat cấp sắc. Khan aw ngui cuk di bangsa Dao Lô Gang lac ilamo siam gheih dalam bhap bini 14 bangsa di huyện Ba Chẽ, ndung bak ilamo di sa bangsa./.