Meng lavik mai, daoh Then di bangsa Tày, Nùng daok di palei Tân Sơn, xã Sông Bình, huyện Bắc Bình, tỉnh Bình Thuận hu jeng ragu daoh bhap bani hu palih ruah piah nao pakacah di dom mbang pakacah, harei pataom daoh tamia. Daoh Then pambuak pagam haong mbaik capi Tính yau pabak pren khang ka dom urang nong chreih chai ngak bruk saong hu jeng janih oh kurang hu di mikva. Kayua yau nan ye, piah khik ramik dom ragu daoh Then, xã Sông Bình brei padang kalup kapul daoh then - capi tính. Ong Long Văn Minh, daok di xã Sông Bình, huyện Bắc Bình, tỉnh Bình Thuận khan lac: “Umo 16 thun dahlak daok pak ini jeng hu Đảng, Karja sangka tal ilamu di bangsa drei yau daoh then saong hu ngui cuk khan ao meng kan di bangsa drei. Dahlak bhiak thau dhar phor bruk Đảng, Karja, puk palei sangka tal bangsa jang yau puk palei dahlak.”

Urak ini, kalup kapul hu 16 urang umo meng 30 tal 60 thun. Kayua bruk hit ngak mbang di yaok urang dalam kalup kapul nyu karei di gauk, hu urang lac gru pato padeih hưu, urang ngak nong, urang pablei salih nan ye bruk pataom gauk pathram bhian gaok rilo kan kandah min meng hatai anit ranam saong takre ilamu bangsa, dom urang dalam kalup kapul kham merat rami ramik bruk ngak di drei saong hu mbaok ginup abih tuk pasram atau parang ma-in.

Amuk Phan Thị Ẻn daok di xã Sông Bình, huyện Bắc Bình, tỉnh Bình Thuận brei thau,  Kalup kapul daoh then- capi tính” di palei Tân Sơn hu jeng baoh sang di dom urang ranam daoh then dalam xã Sông Bình. Kalup kapul oh lac ba bui sambai, daong ka dom urang dalam kalup kapul diuk rai chreih chai, khang kadang, hu kein bo daok daong ngak brei pambak tabiak dom ragu daoh then dalam bhap bani. “Dahlak hu mbaok tame kalup kapul daoh then- capi tính ini dahlak mboh biak bui sambai. Sa binah mai meng hatai takre, binah tra jeng caong khin tacei pato veik ka anek kamuan ilamu meng kan di bangsa drei, ngak habar ka rai rah harei hadei khik veik hu.”  

Taphia di bruk kham merat pathram, ma-in, Mban Chủ nhiệm kalup kapul daok hu duah, pataom saong ramik veik ragu daoh, ragam tamia jeng dom kadha daoh tamia saong parang ma-in angaok sân khấu.

Sa-ai Đinh Thị Yến,  Chủ nhiệm kalup kapul Daoh then, caphi tính xã Sông Bình brei thau, Kalup kapul daoh then capi tính palei Tân Sơn daong palaghaih piah cak rok patagok ilamu ma-in saong daoh then, capi tính dalam bhap bani di xã Sông Bình. Tapa nan piah mboh, pato pathram samar drah dom urang hu ilamu me-in janih nghệ thuật ini. “Anak tal dahlak haong dom urang dalam klup kapul kham merat peih ngak njauk jalan bo kalup kapul ba tabiak. Khik ramik, patagok saong tacei pato gilac veik ka dom rai hadei  dom ragu daoh bhap bani di bangsa Tày, Nùng daok di palei Tân Sơn jeng yau mikva dalam xã Sông Bình. Ngak habar piah ka ilamu di urang Tày, Nùng hu rilo menuac thau tal.”

 Amuk Hồ Nhộc Phấn, Phaok akaok UBND xã Sông Bình, huyện Bắc Bình, tỉnh Bình Thuận brei thau: “Klup kapul ini tabiak rai hu mikva dalam xã ini biak pachreih tui. Caong lac, dalam tukvak anak tal, kalup kapul daok patagok bruk khik ramik  ilamu bangsa. Saong peih ngak njauk jalan bo Kalup kapul hu ba tabiak. Patui bruk jak ba rilo jang dom urang hu mbaok tame kalup kapul.”

 Tân Sơn lac sa palei atah bayah dalam xã Sông Bình, huyện Bắc Bình, dalam palei hu labaih 400 baoh sang, mikva pak ini rilo meng lac urang daok di dom tỉnh gah Barak tame ini daok, tui nan hu biak rilo bangsa adei sa-ai yau: Kinh, Tày, Nùng, Hoa, Ngái…. Rah tapa thun bilan trun tagok di dom zaman dak rai sajarah, daoh then tuk halei jeng hu mbaok dalam rai diuk ilamu, hatai jia saong hu jeng sa janih ilamo nghệ thuật hadah krah di urang Tày, Nùng, yau brei mboh ka pren khang daok mait di hatai saneng saong ilamu bangsa.

Meng dom yaom galong ilamu hadah krah di drei, kalup kapul daoh then – capi tính hu daong ngak brei pachreih hatai anit ranam saong hatai caong khin yam tagok, dak padang rai diuk trei sil, haniem phol di mikva dom bangsa Tày, Nùng angaok bhum taneh xã Sông Bình ini./.

Urang lang: Jasi