Dalam ragu ragam chreih chrai, 6 urang kamei Mông ngui cuk khan ao hadah tanyak la-min lamuac tamia ragu Sênh Tiền. Sa-ai Ma Thị Huế, daok di xã Cư Króa, huyện Mrắk, brei thau: Sênh Tiền lac sa ragu tamia meng kan di urang Mông, bhian hu tamia dalam tuk rija, roya atau harei pataom, ngak adat. Yaom lac yau nan, min di palei bahrau Đắk Lắk, ragu tamia ini takik hu pandar. Tuk hu bruk pataom pakacah dam dara daoh ragu bhap bini saong me-in alat ragam, dom sa-ai kumei meng hu pasram saong hu thau jang ka ragu tamia biak gheih ini.

" Kapul adei hu 6 urang, pasram labaih 1 bilan meng hu yau ini. Urak ini pasram ye dom ong muk pato brei. Adei mboh biak uan tabuan, tuk pasram kadha ini adei meng thau lac bangsa drei hu sa ilamu biak gheih mekre. Drei mboh lac ilamu di bangsa drei hu biak rilo, drei oh ka thau hu abih".

Daok adei H Chuyên Knul, daok di buôn Mblơt, xã Ea Bông, huyện Krông Ana brei thau, pakacah lac tuk piah brei mboh bruk hadah mbaok meta haong kadha chiêng gheih karei di urang Êđê Bih. H Chuyên khan lac, meng bilan hè thun dahlau, adei pasram taih chiêng Jhô. Meng tacei pato di dom nghệ nhân dalam palei, adei thau lac tok hu urang Êđê Bih meng hu chiêng Jhô brei ka urang kumei taih.

" Adei mboh anit ranam bangsa drei jang saong ilamu di drei. Adei caong pambak tabiak ilamu meng kan di bangsa drei tal taong abih menuac sia".

Bruk pakacah dam dara daoh ragu daoh bhap bini saong me-in alat ragam bangsa lac sa dalam dom bruk ngak di Harei pataom dahlak hulin anit ranam palei negar hulin dahlak, hu Tỉnh đoàn Đắk Lắk bahrau peih ngak. Jaik 30 kadha, 300 urang me-in “không chuyên” lac dom urang đoàn, dam dara saong uranaih daok di 15 huyện, ban sit dalam tỉnh hu daoh dom ragu daoh bhap bini, dom ragu tamia meng kan, me-in dom alat ragam di dom bangsa daok di rilo bhum palei dalam taneh ia. Meng dom ragu ragam bhian randap di chiêng Jhô, chiêng ban,  chiêng kreim, capi T’rưng, kadait “đing năm” tal sap capi tính, sáo mèo, dom ragu ay-ray, daoh then, daoh lý, ví dặm, ragu daoh bhap bini Nam bộ… hu ngak jeng sa labik ragu ragam chreih chrai, gheih mekre. Sa-ai H Tuyết Niê, daok di buôn Cuôr Dăng A, xã Cuôr Dăng, huyện Cư Mgar ndom lac: "Dalam dom bruk pakacah yau ini nyu daong ka drei bac megru hu rilo ilamu meng dom kapul nyaom karei. Nyu jeng daong ka drei hu thau rilo jang piah pabak ilamu, mboh takre jang ka bruk taih kong chiêng, takre jang  ka dom alat ragam bangsa, thau rilo jang ka dom alat ragam bangsa di drei".

Tui taong yaom di mBan giám khảo, tapa pakacah brei mboh hu biak rilo ilamu di dom bangsa daok dalam tỉnh Đắk Lắk. Yaok kadha hu padang ngak biak tani tanat, meng asal kadha tal khan ao ngui cuk saong jalan padang ngak, ragu ragam. Gam haong nan, bruk patui veik di dom kapul pakacah hu brei mboh cambaih meng bruk hu mbaok di dom adei uranaih dalam rilo kadha tamia kapul nyaom. Ong Lê Văn Hồng, sang bac Cao đẳng Văn hóa Nghệ thuật tỉnh Đắk Lắk, akaok mBan Giám khảo brei thau:  "Mban giám khảo thun ini taong yaom biak glaong bruk hu mbaok di dom kapul, nyaom, abih di nyu lac binah pakacah me-in alat ragam bangsa, hu ceik veik dalam hatai urang maong iek saong hu rilo kadha biak gheih. Abih di nyu lac dom kadha hu mbaok di dom adei sit mai meng dom huyện bhum atah bayah yau ye Krông Bông, Lắk. Dom adei yaom lac daok sit min hu bluh suan yava tame dalam dom ragu daoh bhap bini saong dom sap chiêng, ragu tamia, ba mai jak jeng ka harei pataom". 

Jak jeng di harei pataom pakacah hu daong ngak brei madeih tagok saong pambak praong dalam urang đoàn, dam dara, uraniah tỉnh Đắk Lắk hatai takre dom janih ragu ragam, ilamu bhap bini, piah khik ramik saong cakrok, patagok./.