Dom harei jhung thun, angaok tabung ceik Ngọc Linh langik la-an, gam haong ia kakua me-om bak dom tabung sang tual meng kan di urang Ca Dong (sa dhar di bangsa Xơ Đăng), mboh biak mekre di kreh ceik glai praong. Meng di tuk dah pagaiy, tuk ia kakua daok kandaong veik di angaok jhung hareik, taha mada, likei kumei angaok tabung ceik Măng Gry (xã Trà Vinh, huyện Nam Trà My), cuk ngui khan ao ngak meng khan bai rilo sambo màu hadah, chreih chrai ba gauk nao pataom mbaok dalam bruk praong di palei drei, lac: Adat cúng máng ia (Clá tác).

Piah ka adat hu peih ngak, bhap bini kuhria caga dom janih pandap dahlau di nan sa adit. Taha palei parabha bruk cambaih laih ka yaok urang. Urang caga dom jeik alak bingi di abih, urang pataom tame ngak phun nêu mekre di abih, dalam tuk nan, urang likei khang kadang ye nao duah dom nding la-a praong mekre piah ngak jalan nding ba ia meng akaok halau mai labik ngak adat. Hadei di tuk hagar hu taong tagok, urang ba gauk mai pataom di sang taha palei, haong rilo janih pandap yau ye phun nêu, jeik alak, kong chiêng, pabui, manuk.

Yaom lac umo taha, praong thun, min taha palei Hồ Văn Dề oh ka tuk halei oh hu mbaok dalam adat cúng máng ia di palei. Tuk abih janih hu caga blaoh blai, taha palei Hồ Văn Dề nao dahlau, dom urang likei ba tui pandap ngak adat saong phun nêu sit yam takai tui taha palei nao gah halau ia, daok di glai gah likuk palei. Tal labik, taha palei Hồ Văn Dề peih ngak dom adat cúng. Taha pok tangin, pok panuac likau dom yang haong abih hatai iek praong. Panuac likau di taha palei lac likau ka palei pala drak njauk, likau ka rahra ngak mbang hu mbuan lagaih, jum pataom gauk, likau brei ka menuac sia dalam palei hu halau ia jangaih siam luac thun.

Dom panuac likau hu patui di gauk, dahlau di tuk taha palei mek gai kreim haluak jarak tame mek darah drei pabui tui adat meng kan. Hasit darah pabui hu lai tame ia meng akaok halau nduac mai palei tapa dom nding la-a. Tuk ia mai tal máng, taha palei sik takuai sa drei menuk piah thau dhar phor yang hu brei ia mai ka menuac sia dalam palei. Di tapen máng ia, dom urang kumei daok caga piah ba ia bahrau mai sang pandar, ngak mbang huak.

Tuk taha palei ngak adat, dom likei dam dang vil val phun nêu, tui iek ia bahrau daok nduac mai palei. Hadei di tuk ngak adat blaoh, dom likei dam dalam palei ba gauk sik pabui saong parabha ka yaok baoh sang, caik veik hasit di máng ia. Menuac sia dalam palei pataom gauk di sang rông piah mbang menyum saong tadhau ayuh ka gauk dom panuac siam mekre di abih. Blaoh abih gauk tame tamia tui ragu cồng chiêng, dom panuac daoh ru jeng hu pok sap tagok tapen dom jeik alak pahe bingi./.