Manek tabiak saong praong tagok di xã Đạ Ploa, huyện Đạ Huoai, tỉnh Lâm Đồng, meng sit urang likei bangsa Cơ Ho hu ngak randap haong thaot binguk di urang amaik, urang nai di drei daok tapen khung cửi ngak tabiak dom blah khan bai manyim. Blaoh tal tuk praong tagok, hatai caong ka khan bai manyim tuk halei jeng daok dalam hatai sahaneng di K’Jona.

Meng naih gheih gah hội họa nan ye hadei di tuk bac tamat blaoh THPT, K’Jona tui bac gah Thiết kế thời trang di Sang bac Cao đẳng Mỹ thuật trang trí Đồng Nai. “Hadei di tuk bac tamat blaoh di thun 2011, dahlak tapa Malaysia daong bruk ka urang thiết kế Ridzuan Bohari di Ban ine Kuala Lumpur haong yaom jien bilan biak glaong”, K’Jona khan lac yau nan.

Di Malaysia, K’Jona hu mbaok tame rilo Adit thời trang di Kuala Lumpur (Kuala Lumpur Fashion Week) di dom thun 2013, 2014, 2016 saong Adit thời trang Malaysia 2015 (Malaysia Fashion Week 2015)... Dalam tukvak ngak bruk di pak ini, saai bac magru hu rilo ilamo di gah Thiết kế thời trang, dalam nan, K’Jona biak caik hatai tal janih khan bai song kiệt (lac janih khan bai meng kan di urang Malaysia) jaik dreih yau janih khan bai di Việt Nam, yaom biak glaong. Urang kumei ngak lakhah bhian cuh khan aw jhik meng khan bai song kiệt hu manyim marai kanjik di aw, biak gheih ghang.

Ngak bruk di negar langiu min hatai sahaneng di K’Jona jeng pamaong tal palei negar. Saai caong khin ngak hagait nan piah patagok yaom glaong di khan bai manyim di bangsa drei hu yam nao atah jang. Kayua yau nan ye, “hadei di jaik 10 thun ngak bruk di Malaysia, dahlak hu mai Ban Đà Lạt peih sa cửa hàng aw lakhah”, K’Jona brei thau yau nan.

Tukvak camriep mai Đà Lạt, K’Jona ngak tabiak dom blah khan aw  lakhah, aw Vest piah pablei atau brei pah. Lavik lavik harei, meng dom bingu hala khan bai manyim di urang Cơ Ho, saai hu pambuak khan bai manyim haong tanyiak bahrau piah ngak tabiak jeng dom blah aw lakhah, aw tah biak  gheih, makre.

Urang thiết kế K’Jona khan lac, khan aw ngui cuk meng kan di urang Tây Nguyên biak đơn giản, tok hu khan saong aw takoi vil. Mayah cuh abih bộ aw manyim meng angaok trun mala, maong biak trak damak. Kayua yau nan ye, saai tok pandar manieng khan bai manyim dalam dom thiết kế di drei.

Piah ngak jeng bruk siam gheih di bộ aw lakhah, K’Jona pambuak haong dom bingu hala khan bai manyim haong dom janih karei yau ye tanyiak cotton, tanyiak lưới, vải voan, nhung, nỉ... Jalan ngak ini biak gheih, biak mekre. Meng dua palak tangin gheih ngak, K’Jona ngak tabiak dom pandap panda biak mekre, hu tuai damuai biak takre yau aw lakhah, aw khoác, Gile, khan aw uranaih… Dom blah aw lakhah, aw atah kayua K’Jona ngak tabiak hu pandar saong parang iek dalam tuk rija roya praong di tỉnh Lâm Đồng.

Pandap ngak tabiak di saai hu dam dara taong yaom lac biak gheih, kan duah hu. “Dom urang blei bo kol dahlak pamaong tal lac tuai damuai negar langiu saong dom urang ranaih takre ngui cuk biak karei”. Rilo tuai kumei saong tuai damuai negar langiu biak takre saong bhian kakei blei”, K’Jona brei thau.

Piah ka blah khan bai manyim dak harei dak hu rilo janih bingu la, langiu di duah blei khan bai di pak palei Đạ Ploa, huyện Đạ Huoai, saai daok nao tal dom puk palei yau ye: Đam Pao (xã Đạ Đờn), Păng Tiêng (xã Lát), xã Đưng K’Nớ di huyện Lạc Dương, tỉnh Lâm Đồng piah duah thau saong blei pandap tame.

Anak tal, K’Jona kuhria  peih cửa hàng di ban Đà Lạt piah pablei salih khan bai manyim pambuak haong khan tauk ban, kik Sofa, pandap caik ly panyin, patal… Saai caong khin peih jalan nao bahrau ka bruk manyim khan bai, rik daong paglaong jien mek tame ka rahra, gam khik ramik ilamo bangsa.