Dalam sang ging di sang drei, anak dom mbao padai haong café, amuk H’Krông, daok di palei Yôk Ju, xã Nâm Nung, daok ngak adat ieu yang uan bilan pala. Pandap ieu yang tok lac sa ché alak, sa drei menuk tuk tasak, sa jam baoh kayau saong njam patam baoh kraoh di bein sang. Amuk khan lac, thun bloh sang mek tame hu 40 mbao padai, labaih 2 tấn cafe asar, raidiuk jeng hu trei sir. Bruk ngak adat uan padai bahrau lac bruk oh kurang hu dalam ilamu di urang Mnông, piah likau ka thun anak tal raidiuk hu siam mekre jang: " Uan padai bahrau, hadei di tuk yuak bloh ba padai mai sang, raok suan padai mai, urak ini daok hu café tra. Ba abih dom pandap ngak nong mai sang, raok yang padai mai, piah likau ka abih gauk dalam sang hu prein yava khang kadang, oh ruak kik pandik harao, thun hadei ngak mbang siam jang, hu rilo padai saong café jang…"

Dom adat uan padai bahrau, likau ka prein yava hu khang kajap hu ngak di dalam sang, atau harei pataom di puk palei parang me-in kong chieng, daoh ragu bhap bini…, lac dom ilamu siam mekre meng kan daok hu urang Mnông di xã Nâm Nung khik ramik. Gam haong nan, mikva jeng khik hu dom bruk ngak meng kan yau ye menyim khan bai, pak yot…

 Pamedeih tagok dom siam mekre dalam ilamu meng kan di bangsa, thun meng bloh, karja xã Nâm Nung hu daong ka bhap bini patagok bruk du lịch cộng đồng. Ong Y Krêu, phaok akaok palei Yôk Ju brei thau, mikva padang hu dom nyaom homestay, nyaom mbang menyum, nyaom ilamu bhap bini piah duh ka tuai damuai. Dom HTX menyim khan bai, HTX ngak alak tapai jeng hu rilo janih alak pablei tabiak darak pasar: " Padang bruk du lịch, ka 1 lac caong khik ramik ilamu di bangsa drei, ka 2 lac patui bruk ngak meng kan yau pak yot, menyim khan bai ... saong mbang huak di dom bangsa, bloh yaih khan kaya nong di drei ngak tabiak, yau ye café, baoh kayau, njam patam... piah duh ka tuai du lịch, ba jien tame ka mikva."

 Xã Nâm Nung (huyện Krông Nô, tỉnh Đắk Nông) lac bhum căn cứ jaman Anh hùng N’Trang Lơng dang tagok mesruh taong Prang meblah taneh ia, saong hu patui veik dalam 2 mbang mesruh peih paha bangsa, labik hu căn cứ B4 – liên tỉnh IV hu dak angan inem krung sajarah cách mạng pakat negar. Angaok jalan du lịch “Ariya atah di ia haong pui” di Mblang bein địa chất dunya UNESCO Đắk Nông, labik căn cứ Nâm Nung lac "labik bhong meriah” pato pakai ilamu cách mạng meng kan, labik inem krung duh katuai damuai angaok jalan mai duah halau gha.

Meng hu rilo baoh craoh nduac tabiak meng glai ram, di Nâm Nung hu biak rilo kali ia mekre yau Leng Kum, Leng Ôông, Leng Gungtao… Taphia nan, lac bruk gheih mekre di mblang hamu mala takai ceik pui, bein phun mbang baoh mangaok mbon patau. … Amuk H’Thương, Phaok akaok UB bhap bini xã Nâm Nung khan lac, inem krung sajarah cách mạng, dom gheih mekre meng langik tasik gam haong ilamu meng kan di dom bangsa, lac siam lagaih piah ka palei peih jalan patagok du lịch: "Siam lagaih di abih ka bruk du lịch cộng đồng ini, lac di xã hu biak rilo nghệ nhân, gah kong chieng, menyim khan bai, pak yot, saong nghệ nhân daoh ragu daoh bhap bini, daoh khan akayat… Saong tui dahlak mboh, meng bruk patagok di mikva ye lavik lavik harei meda ngak hu".

Meng hu rilo ilamu, rilo sajarah, hu labik mekre meta meng langik tasik alin brei, gam haong dom anek menuac slut mbut, rap ar tuai damuai, Nâm Nung biak lagaih piah ngak du lịch. Yaom lac yau nan, min bhum taneh ini daok biak caong hu bruk buh jien tame ngak ka nyu samu, ka nyu njauk, piah pamedeih, patagok dom prein khang hu blaoh, lac labik nao tal angaok jalan ravang me-in Mblang bein địa chất dunya UNESCO Đắk Nông./.