Bilan pataom cỏ hồng Lang Biang thun 2022 hu peih tabiak di đồi cỏ hồng, dalam tiểu khu 112A, labik Đankia-Suối Vàng, huyện Lạc Dương, atah di pasak ban Đà Lạt labaih 15km. Dalam dom bruk ngak di harei pataom, hu dom danak dak, yau ye dom bruk ilamo, dom kadha main meng kan ndung mbak ilamo di urang Cơ Ho pak ini; bruk main thể thao team building pambuak gauk di urang Cơ Ho saong tuai damuai; danak dak daoh tamia “Lạc Dương hội mở”, taom gaok ndom biai nao mai haong kapul daoh takơ DaLaB – lambaok ka ilamo saong du lịch huyện Lạc Dương; parang iek dom thaot binguk mek hu giải di dom mbang dahlau ka cỏ hồng Lang Biang, pandap OCOP di huyện...

Di harei pataom ini, mBan peih bruk hu ba tabiak bruk pacacah thaot binguk online “Cỏ hồng trao duyên” meng harei 1 tal 25/11.

Cỏ hồng lac janih hareik glai hu sambo mau hồng lai haong tím, tok “lai sambo” sa mbang dalam thun di tuk akaok bilan brak. Phó Akaok Ủy ban bhap bini huyện Lạc Dương Cil Poh brei thau: “tapa harei pataom, kol dahlak caong yaih khan tal tuai dalam saong langiu di taneh ia ka anek manuac, prein khang di cak rok patagok du lịch Lạc Dương, abih di nyu nan lac dom ilamu hadah krah di bhap bini daok di bhum cao nguyên huyền thoại ini”.

Gam haong bruk meng kan “Mùa hội cỏ hồng Lang Biang”, daok dalam dom bruk ngak pachreih tui Festival bingu Đà Lạt mbang ka IX thun 2022, mbang camriep huyện Lạc Dương peih bruk pacacah asaih oh hu yên, harei pataom ilamo mbang huak saong alak tapai Lang Biang.

Pacacah asaih oh hu yên lac bruk pakacah biak chreih chrai, bhian hu peih tabiak sit, brei mboh prein khang saong hadah mbaok meta di dom likei dam bangsa Cơ Ho Lạch daok di mangaok cao nguyen Lang Biang. Mbang ini, 32 urang nduac asaih haong 32 drei asaih nduac pacacah, hu pilih ruah dalam labaih 200 drei asaih di dalam huyện piah pacacah 4 mbang, di sang pacacah asaih di danak dak Kiwuki Park (xã Đạ Nhim, Lạc Dương) hu peih tabiak meng harei 26/11.

Harei pataom ilamo mbang huak saong alak tapai Lang Biang hu angan ieu lac “hương vị ceik glai Lang Biang”, hu mbaok di 12 kapul pacacah, lac pandap mbang di puk palei saong pandap mbang di nhà hàng. Dalam nan, alak tapai lac pandap manyum oh kurang hu dalam dom harei riya roya di dom puk palei di Nam Tây Nguyên saong “Alak tapai Lang Biang” hu tut angan khik ramik angan. Harei pataom hu peih tabiak di harei 27/11 di Kiwuki Park.

Tui Phó Akaok Ủy ban bhap bini huyện Lạc Dương Cil Poh, Harei pataom pacacah nduac asaih saong harei pataom ilamo mbang huak, alak tapai Lang Biang meda hu khik tani tanat, cak rok patagok jeng harei ilamo meng kan, tapa nan, hu pabak pandap du lịch biak karei di pak ini, rik daong khik ramik saong patagok ilamo meng kan di rahra daok meng kan mai di mangaok cao nguyên huyền thoại Lang Biang./.