Ngan saong urang Ca Dong, bruk metai lahik bingi sanang di abih lac metai tuk taha, hu ginup mbaok anek taco. Tuk nan, suan yava di urang metai hu tagok langik saong hu daok di glai but khamot. Urang huac di abih lac metai kayua njauk bala, labuh metai oh kayua ruak kik hagait, metai atah di sang. Kayua tui adat cambat tanarakun, urang Ca Dong metai di labik halei brei dar pak di labik nan, oh brei cakaong menuac metai mai palei.

Ndam metai ngan saong urang Ca Dong lac sa adat cambat ndung bak bruk di bhap bini. Meyah metai kayua ruak kik, gauk gar dalam sang saong mikva puk palei ngak ndam metai saong ba nao dar. Hu ngak ndam metai njauk tui adat cambat meng kan mai di urang Ca Dong. Hu mikva dalam palei, langiu palei mai ravang, klah rabha pandik harao haong gauk gar urang metai.

Ong Nguyễn Thanh Phương, urang Ca Dong daok di palei 2, xã Trà Mai, huyện Nam Trà My, Quảng Nam brei thau, tuk nan, gauk gar, ayut sahabat mai hia caok. "Urang hia, piah hadar veik dom hagait meng tuk daok sit, tuk daok ranaih, tal tuk praong, hu diuk hu pasang, hu anek. Gauk gar, menuac krein randap, hadar veik, khan veik, yaom lac urang metai daok ndih pak nan, min urang hia hadar veik dom hagait dahlau daih, tal tuk urang metai nao. Meyah tuk daok diuk hu bruk hagait oh njauk hatai gauk, urang jeng klaak abih, oh daok hu bruk hagait tra".

Hadei meng metai blaoh, gauk gar dalam sang phlaih khan ao ka urang metai, ngak adat ba urang metai caik tame dalam pati. Dalam sang praong, urang metai hu caik ndih takai pamaong tabiak gah pabah mbang tame tabiak. Pandap panda dar tui urang metai hu caik di mangaok akaok, daok pandap mbang ka but khamot hu caik di gah mela takai. Urang Ca Dong hu adat parabha drap ar ka urang metai, caong lac tapa lot daih, urang metai jeng hu raidiuk ginup meda.

Dalam dom harei ngak ndam metai di sang, menuac dalam palei jeng hu mbaok ginup abih. Yaok urang jeng ba tui drei menuk, atau kadung brah, atau pok njam glai… Bruk njauk biai nan lac, dalam ndam metai di urang Ca Dong, langiu di sap hia anit ka urang metai, daok hu sap daoh di dom urang mai palao piah pachreih ba gauk gar daok diuk saong palao urang metai.

Palei di urang Ca Dong hu sa labik piah dar urang metai. Nan lac glai but khamot, lac bhum taneh ginreih oh brei thei lih tame. Hatai sahneng ka bruk metai di urang daok diuk lac cakak klaoh abih talei pambuak bruk haong urang metai. Meyah oh cakak klaoh talei pambuak bruk nan, ye suan yava di urang metai meda tui mai palei ngak ka mikva oh ngak mbang hagait hu. Kayua yau nan ye, tuk ba menuac metai nao dar, urang Ca Dong oh hu adat khik kubo, ao hu adat cải táng. 

Urang likei dalam palei nao dar menuac metai bloh brei peih sa jalan glai karei piah mai sang, oh brei nao tui jalan klak. Dalam luac 3 harei, rahra dalam palei oh nao puh, oh tagok hamu, bo brei daok di sang sik pabui, ngak menuk mbang menyum piah pateok nao bruk duh hatai di metai lahik. Abih di nyu nan lac, dom urang cakaong menuac metai nao dar brei daok di sang urang metai dalam 10 harei. Hadei di 10 harei nan, po sang sik menuk ngak adat pathau khan po yang lac yaok bruk hu ngak salah blaoh, tuk nan urang ba menuac metai nao dar meng hu nao sang. Sang halei kaya meda ye sik ngak kubao. Hadei di 10 harei nan, meyah oh sik menuk, sik kubao ngak adat, hadei nan khamot urang metai meda mai ndok. Oh ngak adat, menuac dalam sang meda njauk ruak kik, pandik harao./.