Mintri Ilamu Thể thao saong Du lịch hu tabiak sarak ka bruk padang ngak danak dak khik ramik, padang ngak veik saong patagok yaom glaong ragu daoh, ragam tamia di dom bangsa takik, pambuak haong patagok du lịch vaktu 2021 - 2030. Tui Mintri Ilamu, Thể thao saong Du lịch, danak dak hu padang ngak piah taong yaom bruk khik ramik, padang ngak veik saong patagok yaom glaong ragu daoh, ragam tamia, ragu ragam di dom bangsa takik, pambuak haong patagok du lịch. Meng nan, ba tabiak dom jalan ba tame pandar, patagok yaom glaong khik ramik hu siam lagaih, hu jak jeng. Min piah ngak dom bruk ini, jeng meda gaok biak rilo kan kandah. Amuk Nguyễn Thị Hải Nhung, Vụ trưởng Vụ Ilamu bangsa, Mintri Ilamu, Thể thao saong Du lịch khan lac: “Kayua ilamu bhap bini oh samu gauk, nan ye bruk ieu pataom prein ngak, pandap panda di karja jeng yau puk palei bhum bhap bini dom bangsa takik dalam khik caga dom yaom glaong ilamu daok gaok rilo kan kandah. Bruk sangka di dom pakat, dom gah dalam khik ramik ilamu hu tuk, hu labik oh ka lagaih, oh ka thau hu ginup yaom glaong di bruk ilamu bangsa, abih di nyu lac bruk pathau khan, jak babhap bini hu gam gam saong praong dalam”.

Khik ramik ragu daoh, ragam tamia, ragu ragam meng bruk pambuak haong cakrok du lịch hu maong lac jalan ngak gheih. Kayua yau nan ye, dom ragu daoh ini hu diuk dalam raidiuk bahrau. Min dahlau di abih, brei padang dom jalan ngak, dom sarak cambaih laih. Dalam nan, biak caik hatai tal bruk pato pakai, daong ka dom nghệ nhân khik ramik ilamu: “Daong ka dom nghệ nhân, urang hu angan je dalam bhap bini hu mbaok tame ba akaok dalam dom kalup kapul pato tacei ilamu, nghệ thuật bangsa atau sahneng tabiak dom yaom glaong ilamu nghệ thuật bahrau piah duh ka bhap bini saong dom bangsa pambuak haong du lịch saong paglaong bruk hưởng thụ ilamu ka bhap bini dom bangsa takik”.

Di tỉnh Thái Nguyên, meng kham merat di dom urang abih hatai haong bruk daoh tamia di palei bo dom adei sit urang Dao daok di palei Suối Bốc, xã Yên Ninh, huyện Phú Lương daok thau lac bruk bac sap di bangsa drei, bac ragu daoh Pả Dung nan lac sa jalan ngak piah thau jang ka halau gha di bangsa drei. Jalan daoh, jalan puac panuac habar ka nyu njauk ragu, hu dom amuk, dom sa-ai kumei dalam palei pato tacei biak tani tanat. Meng dom kadha daoh Pả Dung panuac klak, tal urak ini, rilo nghệ nhân urang Dao thau caik panuac ka ragu daoh ini, piah hu lagaih haong raidiuk bahrau urak ini, pok meyaom puk paga, palei negar, pok meyaom Đảng, Wa Hồ haong hatai jia tame bruk salih bahrau. Amuk Phạm Thị Lan Anh, Akaok jabat Ilamu Brei thau huyện Phú Lương, tỉnh Thái Nguyên khan lac: “Tapa bruk padang dom kalup kapul khik ramik ini, kol dahlak hu daong padang veik dom ragu daoh, ragam tamia, dom adat cambat di bhap bini bangsa Dao. Gam haong nan, jeng lac sa bruk piah kol dahlak patui jalan pato pasram paglaong ilamu ka dom nghệ nhân bhap bini”.

Hu tabiak rai meng biak lavik, tabiak meng bruk ngak mbang, ngak huak, dalam adat cambat tanarakun pok kakuh muk kei, ragu Pả Dung ndung bak sa yaom glaong ilamu, hatai sahneng saong makna biak praong ngan saong urang Dao. Bruk hadah krah di Pả Dung daok dalam dom janih daoh. Yaok janih hu tacei tabiak labik saong sap ndom puac karei, brei mboh hatung hatian karei di gauk. Ong Đặng Phúc Lương, dahlau daih ngak Chủ tịch Hội Văn học nghệ thuật dom bangsa takik tỉnh Thái Nguyên brei thau:  "Dom ragu Pả Dung di dom kapul Dao nyu karei di gauk. Tok hu Dao Quý Lâm haong Dao Bhong lac jaik haong gauk. Jalan mek sap, ragu atah panak ye meda lac nyu karei gauk. Min labik gheih abih di Pả dung lac ragu di urang Dao Bhong”.

Meng jalan khik ramik tapa du lịch, dom ragu daoh, ragam tamia gam hu khik ramik, yaih khan, gam hu rik daong paglaong jien mek tame ka mikva, jeng yau patagok bruk ngak kinh tế du lịch khang kajap./.