Bangsa Mảng urak ini hu labaih 4.600 urang, daok di dua huyện Nậm Nhùn saong Mường Tè, tỉnh Lai Châu. Meng ngak nong lac bruk praong, nan ye tuk blaoh bruk yuak kuak, atau salah sa thun ngak bruk glaih glar, mikva hu peih Harei roya mbang lisei bahrau piah thau dhar phol ong muk ong kei, langik tasik saong piah salam uan  sa thun bahrau siam mekre, salamat.

Ong Pàn Văn Dao, daok di puk Nậm Sẻ, xã Vàng San, huyện Mường Tè brei thau: Urang Mảng saneng langik lac po ngak tabiak, dua po yang Mon ten, Mon ong lac dom po glaong di abih. Kayua yau nan ye, gam haong bruk pok kakuh muk kei, but pajaih, lac dom adat ngak nong pambuak tal suan padai. Meng ini, adat Uan lisei bahrau hu tabiak rai, hu ngak di puac bilan 9 saka ia bilan yaok thun saong lac adat cambat oh kurang hu dalam raidiuk ilamo di urang Mảng:  “Urang Mảng sahaneng lac meng kan dahlau, tuk peih bruk uan lisei bahrau lac daa ong taha mai ndem mayai haong drei brei ngak puh bahrau hu brei padai rilo. Piah plaih oh kurang, piah oh eik lipa, brei ka anek taco khkam marat ngak puh cakak. Ndang pan akaok ndem lac mai tal ini daok pataom jeng puk palei saong bui sambai, manyum sa panyin alak tapai haong gauk, mbang hagait jeng mbang haong gauk ka nyu bui sambai”

Dom tuk salah bruk ngak nong, adei saai kumei ba gauk jhik, pứt. Khan aw di urang kumei Mảng hu rilo labik dreih yau urang Thái, aw talah blah di cada saong khan atah. Yaok blah aw jeng hu ngak mekre meng talei tacing praik, ngak jeng bingu la gheih meta. Min, janih gheih mekre karei di khan aw ngui cuk di urang kumei Mảng lac blah khan pacang vil rup sambo mbong, hu dom bingu la hu pưt meng marai bhong.

Amuk Lò Thị Chướng, daok di puk Nậm Sảo I, xã Trung Chải, huyện Nậm Nhùn brei thau: Ngan haong dom urang kumei Mảng, khan aw ngui cuk oh lac piah brei thau ka bangsa, bo praong jang nan lac tapa dom jalan pứt, urang taong yaom hu bruk tari taring, gheih tangin di urang kumei nan.

Tui ong Trần Mạnh Hùng, Phó yam ndok Sở Ilamo, Thể thao saong Du lịch Lai Châu, meng hu Sarak 04 di Tỉnh ủy saong Sarak 59 di HĐND tỉnh patabiak dom bruk khik ramik, cak rok patagok dom yaom glaong ilamo pambuak haong cak rok patagok du lịch, tal urak ini, mikva bangsa Mảng padang ngak hu veik rilo rija, roya hu peih ngak yaok thun jang yau dom bruk ngak meng tangin meng kan .

" Ngan haong bangsa Mảng jeng daok khik ramik saong bhian peih ngak dom  rija siam gheih, yau ye adat Uan lisei barau, adat tame sang bahrau, blaoh harei roya ia bilan bak baoh bilan sa. Gam haong nan lac khik ramik dom bruk ngak meng tangin hu meng kan mai bo bangsa Mảng hu, nan lac bruk pak meng kreim, hu brei mboh dalam ilamo biak siam gheih, daok hu rahra bangsa Mảng khik ramik saong cak rok patagok".

Puk palei urang Mảng harei ini tuk halei jeng bui sambai chreih chrai. Mikva biak bui sambai, chreih chrai kayua bruk eik lipa hu kadun likuk meng hu dom sarak lagaih di Ndang, Kanja saong di pakat uỷ kanja dom pakat. Mikva urak ini daok ba gauk khik ramik dom ilamo siam gheih di bangsa saong jumpataom gauk, ba gauk dak padang puk paga, palei negar dak harei dak trei sir, haniem phul, cak rok patagok jang./.