Xã Trường Tây, ban sit Hòa Thành, tỉnh Tây Ninh lac labik hu rilo  urang Khmer daok, hu rilo janih ilamo ndung bak ilamo bangsa, brei mboh tapa sap phleing ngũ âm, dom labik me-in bui sambai di bhap bini. Abih di nyu nan lac, urang Khmer di xã Trường Tây hu ragu tamia ginang Chhay-dăm biak gheih, hu Mintri Ilamo, Thể thao saong Du lịch pok brei angan lac Inem krung ilamo oh mboh di mata pakat negar thun 2014.

Ini lac ragu tamia oh kurang hu dalam dom harei rija, harei tết yau ye Chôl Chnăm Thmây, Sene Dolta, Oóc om bok saong meda ba tabiak me-in di yaok labik meng sân khấu, mblang paha atau mblang sang ngan haong dom ragam tamia biak chreih chrai, bui sambai.

Ginang Chhay-dăm lac janih ginang tauk kalik sa mbaok, rup ginang hu ngak meng dhar phun paneing taha cao mek tai, yaok kadha tamia ginang Chhay-dăm bhian hu meng 4-6 baoh ginang Chhay-dăm, dua baoh Cuôl (chiêng) gam haong Chul (chũm chọe) saong Krap (gõ sênh).

Piah tamia hu dom ragam dalam kadha tamia Chhay-dăm, urang tamia brei hu prein yava khang kadang, thau pambuak tame sap ragu di ginang saong mbeik rup tamia. Tuk tamia, urang tamia cuk ginang anak tung, blaoh taong ginang, tamia ginang meng tangin, meng takei biak gheih ghang.

Tamia ginang Chhay-dăm hu taong ginang, tamia ginang saong tamia tangin, hu tuk tamia sa drei, tuk tamia dua urang, tamia klau urang, tamia pak saong tamia rilo manuac. Bruk taong ginang jeng mbuan yau pah tangin tagok mbaok ginang atau paoh meng kuk kieng, meng kadol laiy atau taih tame ginang di gauk, blaoh gam tamia gam ngak xiếc haong ginang.

Bruk kan abih di urang tamia ginang lac paoh saong tamia biak lamin lamuac, biak njauk. Tuk taong ginang meng tangin, meng kuk kien, kadol laiy njauk pambuak gam haong chat, plaong min jeng khik ka sap danei tagok, oh lahik sap, gam tui di nan jeng chat njauk khik kajap ginang tame rup plaih gaok trun mblang haluk, ba tal sap lốp cốp, oh mekre ka urang maong iek.

Tukvak tapa, kanja xã Trường Tây hu sangka, daong palagaih ka mikva urang Khmer di puk Trường An khik ramik ragu tamia ginang Chhay-dăm. Xã hu padang Sang ilamo Bangsa Khmer piah ka mikva hu labik ma-in saong pasram; saong hu daong jien blei ginang, khan aw cuk tamia.

Anak tal, piah khik ramik saong patagok yaom glaong Inem krung ilamo oh mboh di mata tamia ginang Chhay-dăm, Sở Ilamo, Thể thao saong Du lịch  pachreih bruk pato, peih labik parang iek Inem krung ilamo tamia ginang Chhay-dăm dalam dom bruk praong di dalam saong langiu tỉnh, tapa bruk ilamo pakat bhum, pakat negar. Gam haong nan, jeng daok pambuak bruk haong dom kapul hu pagam tal, ba inem krung ilamo tamia ginang Chhay-dăm tame duh ka dom labik du lịch.

Gam haong bruk peih ngak Danak dak bruk ngak negar cak rok patagok kinh tế-xã hội bhum bangsa takik di dalam tỉnh Tây Ninh, Sở Ilamo, Thể thao saong Du lịch pambuak haong palei ngak pasiam veik, blei pandap panda ngak bruk ka Sang ilamo bangsa Khmer piah paglaong bruk ngak, dalam nan hu bruk pato tamia ginang Chhay-dăm./.