Dalam kadha dom bangsa adei saai adit ini, daa mikva saong taong abih gauk pang kadha vak hu ba tagok Harak Mbao Bangsa saong patagok hu ndem ka harei pataom siam gheih ini:

Ngan haong urang Mông, Tết hu maong lac peih mbaok di sa thun bahrau, lac bilan siam abih dalam thun. Urang Mông bhian mbang Tết aval jang Tết Nguyên đán labaih sa bilan. Hadei di tuk salah abih sa bilan yuak kuak, tal jhung bilan 12 saka ia harei yaok thun, urang Mông mbang Tết piah peih akaok sa bilan pala bahrau hu rilo siam mekre jang.

Ngan saong urang Mông daok atah palei, oh hu taom gaok gauk gar di harei praong ini. Piah cadu meneing hatai uan palei, dom SV Mông oh hu nao palei mbang Tết haong amaik ame gauk gar, ba gauk ngak “Tết Mông trun jalan" piah ka urang Mông daok diukrai saong bac megru di Hà Nội ba gauk mbang Tết atah sang, gam haong nna, piah yaih khan ilamu di urang Mông tal dom bangsa karei.

“Tết Mông trun jalan” lac bruk ilamo di urang Mông hu peih tabiak yaok thun meng thun 2016 tal urak ini piah mayaih khan, pambak ilamo meng kan di bangsa Mông tal yaok urang, abih di nyu nan lac piah ka rahra pak Ban ine hu thau jang ka Tết di bangsa Mông daok di dom tinh, ban bhum ceik gah barak di negar drei.

Danak dak "Tết Mông trun jalan" thun 2024 bahrau hu peih tabiak ngan haong  kadha “Ilamo di urang Mông daok di dom bhum palei – pambuak pagam bhap bini”. Bruk Tết Mông trun jalan 2024 hu peih tabiak haong bruk daoh tamia di dom tinh, ban, kapul nyaom, manuac urang, binah pakacah ini lac bruk piah ka dom anek saih sinh viên bangsa Mông dom tinh daok diukrai saong ngak bruk di Hà Nội, takre daoh tamia hu brei mboh bruk naih gheih, bruk hu thau ka ilamo di urang Mông, saong ndung bak ilamo di tinh drei piah ngak jeng sa labik ilamo mbak carak ilamo di bangsa.

Hu mbaok tame Danak dak “Tết Mông trun jalan” thun 2024, tuai mai rivang iek hu ba drei tame dom labik parang pablei saong mayaih khan pandap panda di bhum palei, yau ye khan aw ngui cuk di bangsa Mông, pandap panda angan je di bhum palei urang Mông meng dom tinh bhum ceik gah Barak. Tuai hu mbaok dalam Danak dak “Tết Mông trun jalan” oh lac hu duah thau dom ilamo hadah krah di bangsa Mông bo daok hu maong iek dom labik pablei dom pandap panda di bangsa Mông…

Akaok Mban peih ngak Danak dak “Tết Mông trun jalan” thun 2024, Hoàng Tân Nam khan lac: “Tết Mông trun jalan biak lac labik taom gaok saong pambuak gauk di rahra urang Mông daok bac taa saong diukrai di Hà Nội, lac mblang ma-in siam makre piah ka dom adei saai bac taa, pabak ilamo di bangsa drei, gam haong nan, hu thau jang ka ilamo bangsa Mông di dalam taneh ia. Tapa nan, patagok bruk pambuak gauk di urang bangsa Mông haong dom bangsa karei, rik daong khik ramik saong patagok dom yaom glaong ilamo meng kan di bhap bini dom bangsa takik”.