Bahrau ini, mikva haong karja  xã Đắk Dục chreih chrai tuk “Sang parang iek alat ragam bangsa Gié Triêng” hu peih tabiak saong jao brei. Sang parang iek hu padang ngak dalam mblang bein sang di taha palei, lac nghệ nhân Brol Vẻ, urang hu hatai takre, duah pataom, kak kajap haong dom alat ragam ilamu bangsa Gié Triêng.

Taha Brol Vẻ khan lac: “dahlau daih, dahlak hu sa baoh sang kayau klak, parang tabiak dom alat ragam, dom pandap di bangsa Gié Triêng. Urak ini, hu Karja sangka buh jien padang ngak brei baoh sang tual piah parang iek dom pandap, dahlak chreih chrai lo. Tuai mai me-in, dahlak bui sambai peih pabah mbang brei ka urang tame ravang iek. Baoh sang glaong, laneing lahơi saong hacih sa-at lo”.

Ong Bloong Hâm, Phaok akaok UBND xã Đắk Dục brei thau: bahrau ini, huyện hu daong 50 triệu đồng piah padang ngak sa baoh sang parang iek dom  alat ragam, pandap ilamu di bangsa Gié Triêng. Yaom jien ini oh ginup piah blei pandap ngak, nan ye xã hu blei veik baoh sang meng papan di bhap bini, blaoh tuh gheng bê tông salih ka gheng kayau. Langiu di nan, xã hu jak ba bhap bini rik daong jaik 100 harei ngak piah padang sang parang iek 23 janih alat ragam.

Amuk Y Két, palei Đắk Si khan lac: Meng kan mai, dom tuk salah bruk ngak nong ye dahlak ba kik tabiak menyim. Dom baoh kadung tagok puh, dom blah khan cuk harei roya… jeng kayua tangin dahlak menyim tabiak. Oh lac ta-eng dahlak bo jaik abih urang kumei di pak ini jeng daok takre bruk menyim.

Langiu di bruk menyim meng kan, bruk pak yot jeng daok hu mikva Gié Triêng labik ini khik ramik. Ong A Lếu, sa urang pak yot naih joi di palei Đắk Si khan lac: Urang Gié Triêng saman dahlau, kumei brei thau menyim, daok likei brei thau pak yot. Baoh yot lac pandap oh kurang hu tuk urang Gié Triêng tagok puh, tame glai. Langiu di yot, urang Gié Triêng daok pak kadung saong dom janih pandap pandar karei karei…

Urak ini, dalam xã Đắk Dục hu 68 urang thau ngak saong me-in alat ragam bangsa, 68 urang khik bruk menyim, 70 urang khik bruk pak yot, hu 10 jaing tari, 30 urang khik bruk ngak alak, 45 urang ngak haning, 11 urang ngak ralo pabui ta-ơ thak pui ging, 3 urang sarak rup kayau.

Tukvak tapa, UBND xã hu pambuak bruk haong pasak pato bruk ngak saong Pato megru thường xuyên huyện gam haong dom nghệ nhân palei Đắk Răng peih 2 tal bac, dalam nan hu 1 tal pato ngak du lịch cộng đồng hu 29 urang tame bac saong 1 tal pato taih kong chiêng.

 Ong Bloong Hâm brei thau: “Kol dahlak daok pathau khan bhap bini khik ramik saong patagok dom inem krung ilamu bangsa; pambuak haong dom baoh sang, dom nghệ nhân dalam xã jak ba dom rai ranaih tame dom tal tacei pato ilamu, bac ngak alat ragam, bruk ngak meng kan di ong muk, amaik ame piah ka ilamu bangsa Gié Triêng daok hu khik ramik saong patagok dalam harei hadei”./.