Dalam nan mạng xã hội daok lac sa jalan brei thau praong piah ka dom urang kamei Tày meyaih khan asal ilamo bangsa di drei tal garuk labik di angaok dunya.

Amuk Nguyễn Thị San, lac urang bangsa Tày, menek tabiak saong prong tagok di bhum taneh Nghĩa Đô (huyện Bảo Yên, tỉnh Lào Cai). Amuk San khan lac, Nghĩa Đô lac bhum taneh yao klak, labik tamuh tabiak, patoa veik dom yaom glaong ilamo, ndung bak ilamu saong sap ndom panuac puac di bhap bani Tày. Bruk meyaih khan dom janih pandap di puk palei jeng yau dom janih pandap ilamo bangsa tal taong abih manuac urang nan lac kadha biak njauk ngak, abih di nyu lac dalam zaman công nghệ 4.0 yau urak ini.  

Langiu di bruk hu mbaok tame bruk ngak di urang kamei puk palei, bruk ngak hamu apuh, amuk Nguyễn Thị San tuk halei jeng caik tukvak piah duah pataom, cih vah gilac dom kadha daoh then, daoh cọi meng kan di Nghĩa Đô. Tal harei ini, amuk vah gilac hu 119 kadha daoh cọi meng kan di palei saong caong khin pato veik ka rai ranaih piah plaih lahik nao ragu daoh meng kan di ong akaok ong akei. Abih di nyu nan lac, dalam jaman công nghiệp 4.0 harei ini, bruk pambak tabiak dom yaom glaong ilamo meng kan dom bangsa hu mbuan laghaih jang biak rilo.  

Meng dom mạng xã hội yau: Facebook, Zalo, YouTube, TikTok hu jeng jalan daong biak siam dalam bruk pambuak pagam, pambak tabiak saong khik ramik yaom glaong inem krung ilamo pambuak pagam haong cakrok patagok bruk rivang ma-in ka bhap bani Tày. Tui TS. Nguyễn Anh Cường – Akaok khoa Ilamo Bangsa takik (Sang bac Đại học Ilamo Hà Nội), urak ini meng công nghệ 4.0 daok ngak brei salih bahrau taong abih gah dalam rai diuk di anek manuac. Tuk khaol drei thau pambak tame ye pren pambak tabiak tal bol bhap rah ra dalam bhum taneh, atau di dunya jeng hu mbuan laghaih jang biak rilo: “Jeng hu rilo jalan ngak piah khik ramik, meyaih khan min tui dahlak mboh, prong di abih jeng lac bruk khik veik dom thaot binguk. Nan lac dom thaot binguk hu số hóa. Meng công nghệ 4.0 urak ini ye bruk meyaih khan ka khan ao, ka ilamo bangsa lac biak mbuan meng rilo jalan ngak karei di gauk. Jeng mbuan ka bruk pambak tabiak dom thong tin nan. Dahlau diah payua sa blah thaot nao lac biak kan, urak ini drei tok click chuột tame lac thau abih”.

Urak ini facebook, tiktok daok dui pachreih hu biak rilo menuac sia di dunya pandar kayua dom tính năng thong minh yau like, share, follow, livestream… hu ngak jeng labik siam piah pambuak pagam, pambak praong ilamo. Dom blah fanpage meng nan jeng hu padang tagok tui yaok kadha cambaih laih yau: fanpage ka daoh then, daoh cọi, atau khan ao jih dalah bangsa, pandap panda kaya mbang…. Pak nan, pambuak pagam haong bruk meyaih khan ilamo, lac bruk patagok du lịch piah paglaong yaom inem krung, daong jhul patagok bruk cak rok kinh tế.  

Tui sa-ai Đồng Thị Vân Hà, urang bangsa Tày daok di ban Bắc Kạn (tỉnh Bắc Kạn), urak ini dom pandap panda pambuak tal ilamo bangsa di bhap bani bangsa takik dak harei dak hu meyaih khan dalam prong prang, rilo jalan tapa mạng xã hội. Rilo ayut ranaih bangsa Tày hu ba dom janih pandap nan tagok labik pablei salih điện tử, blaoh ba tagok facebook, zalo, tiktok piah meyaih khan tal taong abih manuac urang ka khan ao meng kan. Min ini jeng lac jalan ngak bo dom urang ini daok meyaih khan ka ilamo bangsa, ka pandap panda di bangsa Tày. Sa-ai Đồng Thị Vân Hà brei thau: "Đồng Vân Hà: Di ban hu rilo urang bhian randap blei pandap tapa mạng, dahlak jeng duah thau công nghệ, gam haong dom urang taha, ranaih, prong sit thaot binguk pandap panda piah ba tagok mạng, haong hatai caong khin pandap panda di drei ngak tabiak oh lac tok pablei hu dalam palei, dalam tỉnh, dalam taneh ia bo daok nao atah jang nan lac pablei tapa negar langiu".  

Harei ini, bruk cak rok patagok di dom mạng xã hội yam tapa jalan negar hu daong palagaih piah taom gaok dunya, hu jalan peih prong, ngan haong pren khang ka sap ndom negar langiu saong samar thau, rilo ayut ranaih palih ruah jalan padang dom blah YouTube haong asal kadha meyaih khan ilamo, du lịch Việt Nam hu phụ đề sap Anh daong ka ayut sahabat angaok dunya mbuan thau. Rilo blah peih ngak hu siam, daok jeng dom “địa chỉ ilamo” hu urang mong iek dalam saong langiu negar caik hatai sangka./.