Umo 34 thun, min saai Hoàng Thị Thu Ngân, bangsa Chăm daok di phường 8, quận Gò Vấp lac po cơ sở gia công bóp ví kalik pablei tabiak taneh ia langiu, ngan saong 30 urang ngak ngak bruk tani tanat. Hu jak jeng yau harei ini, taphia bruk daong di kapul Liên hiệp urang kumei ban raya, lac sa bruk kham merat yam tagok kan kandah biak praong di saai Ngân. Saai praong tagok lac sa urang ngak jhik kadung kalik, hadei di tuk hu kapul Liên hiệp urang kumei quận Gò Vấp ba jalan ka saai mesraiy hu 10 triệu đồng. Meng phun jien ini, saai peih cơ sở gia công kadung kalik di sang. Meng tari tarieng bac megru, duah thau, sáng tạo rilo mẫu mã gheih, mekre yau nan ye kadung kalik di saai Ngân hu urang blei dalam saong langiu taneh ia takre. Saai Thu Ngân brei thau,  yaok bilan, cơ sở bóp kadung kalik pablei tabiak taneh ia langiu di saai ngak saong pablei labaih 3.000 baok kadung dom janih. Jen mek tame tani tanat meng 200 – 300 triệu đồng/ sa thun. Oh lac thau ngak meda, ba bruk ngak ka adei saai kumei dalam bhapbini Cam, saai Thu Ngân daok hu mbaok ngak pahla di puk palei. Barau ini, saai Ngân gam saong urang dang akaok, hội viên di kapul urang kumei dom pakat di ban raya nao ravang saong alin pandap panda ka dom adei di kapul uranaih metui, dom adei jaoh jo, daok sa drei saong dom sang kumei kathaot bhum atah bayah di tỉnh Đắc Lắc. Yaom pandap hu daong abih tih tagok labaih yaok ratuh triệu đồng. Tukvak tal, saai Ngan kuhria ba bruk ngak ka dom adei saai kumei Cam kathaot di huyện Củ Chi, ban raya Hồ Chí Minh, daong adei saai hu jien mek tame tani tanat. Saai  Ngân khan lac :  Dahlak hu jak jeng harei ini  jeng hu dom adei saai kumei, kapul urang kumei hu daong adei. Dom saai hu brei ka dahlak pambuak saong 5 darak di quan piah parang iek, yaih khan pandap di drei ngak tabiak, hu urang blei saong hu dom đơn hàng piah ngak mbang kein laba jang. Bruk ngak anak tal di dahlak lac peih sa tổ tra piah ka adei saai urang Cam tui amaik ame mai Cử Chi thau hu bruk ngak, hu jien mek tame ye dahlak.

Jeng lac bruk daong urang kumei tani tanat raidiuk, saai Phatima, akaok dhar kapul urang kumei bangsa Cam di khu phố 2, phường 12 quận 10 ye hu jalan ngak karei. Nan lac, labaih 2 thun dang akaok dhar kapul, saai hu ba tagok kapul urang kumei phường ngak harak ka pluh adei saai kumei Cam sang kan kandah hu mesraiy jien piah pablei salih sit, paglaong jien mek tame. Taphia di nan, saai daok yaih khan ka hội vien urang kumei Cam pataom tame dom bruk ye “ urang kumei daong gauk ngak kinh te”,  “ urang pablei salih barau…” tapa nan, daong rilo adei saai hu taom gaok, bac megru, thau alamu piah ba tame patagok kinh te sang, tư tin rilo dalam raidiuk. Oh lac ngak siam bruk di kapul, saai daok lac sa urang thợ jhik naih joi, urang amaik, urang diuk đảm đang. Hu thau hasit bruk jhik, tukvak padheih daok di sang, saai taduan mek gia công dom pandap akhan ao mengkan di bhapbini Cam Islam ye : ao, sarong, khan…meng di nan, kinh te sang jeng laneng lanoi, dom urang anek hu nao bac ginup. Meng dom bruk ngak siam nan, saai Phatima hu karja puk palei, kapul urang kumei dom pakat rilo mbang pok meyaom.

Daok amuk Đào Thị Lang, akaok kapul urang kumei Khmer di phường 10, quận Tân Bình yaom lac daok sa drei, pren yava ph khang kajap kayua praong thun, min tuk mboh rilo sang urang kumei kan kandah, anek saih klak bac glaong, dam dara nghiện ngập ma túy, amuk var abih dom bruk kan kandah di drei, ba abih hatai piah daong dom urang ini yam tagok, padang veik raidiuk. Amuk khang hatai ba tagok karja puk palei, kapul urang kumei daong ka 20 hội viên urang kumei hu mesraiy jien patagok kinh te; alin 3 paok jien bac ka dom adei hu nao bac veik; taphia nan, jak ba rilo urang dam nao cai nghiện ma túy, ngak veik raidiuk. Meng bruk abih hatai di amuk Lang, bruk daong drah samal di kapul urang kumei, karja puk palei bo tukvak tapa, raidiuk di bhapbini Khmer di ini hu tani tanat, dak harei dak paglaong jien mek tame. Eng amuk jeng hu kapul urang kumei dom pakat pok meyaom..amuk Lang lac :  “ Drei ngak bruk di tổ, kalup kapul urang kumei di phường, dom saai hu kan kandah ye drei daong atau lac hu taong paoh dalam sang lac drei pato pahadar; blaoh hu ruak kik, pandik pandoa lac drei ieu urang kumei phường, quận daong. Pagap ye anek saih lac klak bac nan drei ba tagok kapul urang kumei brei hu jien bac piah adei nan oh klak bac…urak ini hu tani tanat paje, mengkan lac kan kandah rilo. 

Uan tabuan ka dom hội viên urang kumei bangsa takik hadah trah, amuk Đỗ Thị Chánh, Phó akaok kapul Liên hiệp urang kumei ban raya Hồ Chí Minh ndom lac : “ Adei saai kumei bangsa takik tự tin jang dalam bruk ba drei tame bhapbini, kham merat yam tagok kan kandah dalam raidiuk saong hu dom rik daong ka xã hội, ka bhapbini. Brei mboh tapa dom bruk ye : daom saai pataom tame patagok kinh te, dak apdang dom Tổ hợp gia công…gam patagok kinh te sang, gam daong adei saai dalam Tổ, khu phố hu bruk ngak, bo jeng khik hu ilimo di bangsa drei. Taphia nan, dom saai daok pataom tame dom bruk di kapul ye : bruk urang kumei ngak bruk sáng tạo, dak padang sang haniem phuan; bac megru saong ngak tui Wa meng dom bruk ngak cambaih laih. Meng dom bruk ngak di kapul nan, dom saai hu jak jeng, dom saai ngak nồng cốt dak padang raidiuk ilimo di puk palei.”

Dom adei saai kumei bangsa takik di ban raya HCM rilo meng lac sang kan kandah, min meng ý chí, nghị lực, hatung hatian di drei, rilo urang yam tapa hu dom kandah, hu mbaok tame dom bruk di kapul urang kumei saong dom bruk di puk palei, dak padang sang haniem phuan. Bruk kham merat yam tagok gam dom bruk ngak siam lagaih di dom saai Hoàng Thị Thu Ngân, PhatiMa saong Đào Thị Lang nan biak njauk pok meyaom. Dom urang nan daok ngak brei hadah mbaok meta urang kumei di ban raya angan Wa Ho anit ranam ./.