Mac ATM brei brah ka urang kathaot dalam tukvak jit Covid-19

Meng dom harei camereip peih bruk brei daok atah di gauk, di sa labik sit angaok jalan Ngô Quyền (quận 10, TPHCM), dom pok lisei brei saoh hu kuan lisei chay Bình An haong kapul ngak pah la Cát Tường brei tal tangin dom urang pablei vé số, urang ngak kan kathaot atau dom urang oh hu sang danaok. Yaok harei, tal tukvak 9 tuk page saong 2tuk biar harei, urang mboh sa talei atah, oh meriak gauk, oh jul gauk, yaok urang dang atah gauk dua mét cang taduan mek dom pok lisei ba nao sang. 

Bruk siam dane atah, dak harei dak hu rilo urang thau tal kuan mbang oh mek jien brei ka urang kathaot nan ye ba gauk mai daong pren, brei brah, urang ini brei thùng mì, urang diah brei thùng ia tasau… Meng 100 pok lisei di harei camereip, blaoh nyu tagok tal labaih 1.000 saong meda tagok jang dalam dom harei anak tal. Sa-ai Trần Mộng Phương Thảo, akaok kapul ngak pahla Cát Tường brei thau: yaom lac glaih glar min tuk mong mboh mbaok meta haniem phol di dom urang pablei vé số, urang oh hu sang danaok… dom urang dalam kapul yau hu pabak jang pren yava. Langiu di sa pok lisei, drei daok hu brei gam sa kalaok aia saong sa bịch ia tasau piah pabak dinh dưỡng ka mikva urang ngak kan kathaot, urang pablei vé số, dom urang oh hu sang daok oh hu jien mek tame, oh hu van lsei huak trei tian. Bruk ngak di gah drei tok caong khin klah rabha, daong veih gauk tuk gaok kan kandah.

  Gam haong nan, jaik 3.000 urang kathaot taduan hu brah brei saoh saong jaik 4-5 tấn brah hu brei nao yaok harei nan lac kadha biak siam mai meng bruk ngak mac “ATM brah” brei saoh peih tabiak luac harei melam di labik 204B Vườn Lài, quận Tân Phú, TPHCM. Hatai saneng biak gheih ini kayua sa-ai Hoàng Tuấn Anh, po sa công ty gah cảm biến rak tangin ngak tabiak. Tok dalam 8 mong, sa-ai haong dom ayut sahabat ngak tabiak mac ini, hu sa bồn caik brah hu ba caik di angaok tabung sang saong jalan nding pagam haong gheng mac caik di tapen jalan. Bhap bani tok kateik tanut angaok mac, brah nyu nduac tabiak, yaok mbang mek hu jaik 1,5kg. Hatai saneng biak gheih ini hu daong ka urang ngak kathaot hu lisei huak dalam tuk kan kandah bo jeng khik hu bruk pacang caga jit Covid-19 tuk oh taom gaok tapak saong plaih bruk pataom rilo manuac urang.

Mac "ATM brah" ini oh njauk lac tok pruh tabiak brah bo daok bak hatai anit ranam tuk dak harei dak hu rilo urang ngak pah hala ba brah mai pak ini rik daong, gam haong dom urang kathaot yam tapa kan kandah. Urang ini dom pluh  ký, urang diah labaih sa tạ, jeng hu urang brei dom tạ... Tui nan, gilang brah piah daong ka urang kathaot bak tagok. Sa-ai Hoàng Tuấn Anh ndom lac, yaok ký brah hu ndung bak hatung hatai "hala siam me-om hala tahak" di bhap bani bal raya HCM: Di tukvak kan kandah ini ye taong abih dom urang rik daong brah thei jeng lac urang ngak pahla, yaom lac hu brei 5kg, 10kg ye jeng njauk iek prong, biak bui. Dom urang ini jia tame drei ye drei kham merat ngak habar brei hu ka rilo urang jang, kham merat peih rilo jang labik brei brah di dom quận 9, quận 12 saong xã Vĩnh Lộc B, huyện Bình Chánh.

Ngan haong kadha “daong ka rai diuk, daong ka manuac sia pambak prong kadha siam gheih", meng sa nyaom urang ngak pah la ba dom pok lisei brei saoh ka urang oh hu sang danaok atau peih dom bruk ma-in sambai ka dom uranaih ruak di Sang iek ruak Uranaih 2, ye urak ini dom ayut ranaih dalam nyaom G9 – Ba cambuai klao ka uranaih, daok ndua pandiak, nao grauk labik dalam bal raya ba dom pok pandap tal tangin  dom urang kathaot dalam bal raya. Yaok pok pandap, hu: mì, menyek mbang, aia mesil, saradang, ia tasau, har saong khẩu trang hu yaom jaik 150 ribau đồng sa pok. Yaom lac kuhria tabiak yaom jien oh prong min min ngak brei dom cei, dom anai pablei vé số, dom urang ngak kan kathaot, oh hu sang danaok mboh bui hatai, var meneing nao dom duh hatai dalam dom harei gam haong taneh aia pacang caga jit Covid-19. Sa-ai Tống Hoàng Quân, Akaok nyaom G9 – Ba cambuai klao ka uranaih, ndom lac: urak ini, nyaom hu jak ba saong hu ba brei 300 pok pandap ka dom urang hu rai diuk biak kan kandah. Nyaom jeng hu pambuak bruk tapak haong UBND phường piah hu dom angan njauk daong piah ba brei dom pok pandap. Khaol dahlak jeng caong khin klah rabha hasit haong dom cei dom anai piah ba gauk yam tapa kan kandah urak ini.

  Bruk daong ba gauk, sa hatung hatai haong gauk pacang caga it ruak Covid-19 di bhap bani bal raya HCM daok hu tagok khang jang tapa dom baoh bảng cih vak “Meyah ayut kan kandah, da-a mek sa pok. Meyah ayut mboh ginup, likau caik veik ka urang karei” di rilo labik brei saoh pandap mbang huak dalam bal raya. Saong, kadha ka bruk klah rabha tuk gaok kan kandah daok hu pambak prong - dalam tal grauk labik piah oh caik ka sa urang halei klaak veik gah likuk dalam bruk mesruh pacang jit Covid-19./.

Urang lang: Jasi-18/4