Thau hu bruk iek glang pren yava tuk camereip lac kadha prong, sang saai Châu Thị Đỉnh daok di palei  Chăm Lương Tri, xã Nhơn Sơn, huyện Ninh Sơn hu blei Bảo hiểm y tế meng thun 2000.  Hadei di tuk tut angan, saai song gauk gar di saai hu brei yaok urang sa Thẻ bảo hiểm y tế. Labik tut angan iek ruak camereip di saai lac sang iek ruak Giao thông vận tải Tháp Chàm. Tuk ruak kik, sang saai bhian nao tal sang iek ruak ni piah iek ruak song hu bác sỹ tacei pato, brei jru menyum. Min tuk vak jiak di ni, kayua  jru iek ruak meeik saradang di saai takik veik, nan ye bruk brei jru oh ginup, saai njauk nao blei di gah langiu, abih jien tra. Saai Đỉnh lac : 

Oh lac hu sang iek ruak Giao thông Vận Tải, bo di dom  bilai  y tế xã, bruk suai pabak brei jru jeng dok rah tabiak.

Tui bilai  y tế xã Nhơn Sơn, huyện Ninh Sơn, dom jru prang song  Đông y bo bilai njauk  thầu dalam thun 2016 lac 161janih. Dalam nan, jru Prang lac 79 janih song jru Đông Y lac 64 janih. Dom janih jru lac yau nan, min bilan halei, bilai  jeng kurang jru. Abih di nyu nan lac 2 nyaom jru : cao huyết áp song dom ruak talang…Makna prong lac  pabak suai damuai song oh ginup.

Dalam tuk nan, urang mai iek ruak di Bilai dak harei dak rilo, ngan song rilo janih ruak. Bruk ni, ngak kan kandah oh sit tal bruk iek ruak akaok meti ka bhap bini. Bác sỹ Đạo Văn Thụy – Akaok  Bilai y tế xã Nhơn Sơn, huyện Ninh Sơn brei thau :

Thun halei hulin jeng blei  abih tuk vak, hulin blei gilac tra…

Dok Bilai y tế xã Phước Hữu, huyện Ninh Phước, tok hu dom janih jru iek ruak thông thường ,dok dom janih jru iek ruak yau ruak meeik saradang, tim mạch ye Bilai oh hu.  Kayua oh hu pabak brei ginup jru, nan ye, Bilai oh pachreih hu bhap bini mai iek ruak. Ong Kiều Văn Tứ , phụ trách  Bilai y tế brei thau :

Iek ruak tui harak bảo hiểm y tế, dom  thông tư bahrau di mintri y tế, karja ba tabiak urak ni biak mbuan lagaih ka mik va, abih di nyu lac  thông tuyến.

Bilai y tế Nhơn Sơn,  Bilai y tế Phước Hữu tok lac 2 dalam yaok ribau bilai y tế xã karei karei di tỉnh Ninh Thuận dok laik tame bruk suai hu pabak brei jru iek ruak. Makna di bruk kurang jru, suai hu jru di dom cơ sơ y tế tuyến xã, huyện lac kayua gah y tế tỉnh, huyện rami ramik, pabak  angan jru oh ka samu gauk, oh ka njuak tuk vak song oh ginup. Ndom ka bruk ni, ong Lê Minh Định – Giám Đốc Sở Y tế tỉnh Ninh Thuận brei thau :

 “Sở hu pok panuac likau mintri y tế brei peih prong jang danh mục jru, urak ni danh mục jru  tuyến xã di mintri ba tabiak jeng njauk lac dok takik. Cong khin anak tal  Cục khik ramik iek ruak jeng hu pasang iek veik  danh mục ni

Urak ni, tỉnh Ninh Thuận hu mintri  Y tế  sangka buh jien tabiak padang ngak rilo khoa vệ tinh, brei pandap panda bahrau piah iek glang pren yava tuk camereip ka bhap bini. Tapa nan, dong patagok  chất lượng iek ruak, patrun biak rilo bruk dok cang iek ruak, bruk ba tagok sang iek ruak praong, patrun yaom dịch vụ jru …Min, piah khik hu bruk ni, pabak hu jru iek ruak ka urang ruak, gah  y tế tỉnh Ninh Thuận njauk roh duah jhul pakhang bruk pabak dom  janih jru dok kurang, peih prong jang rilo janih jru karei piah pabak bruk iek ruak dak harei dak glong di bhap bini./.