Pak tỉnh Bình Thuận, akhar thrah daok hu pato di 12 sang bac tiểu học, ngan haong 137 tal, meng tal 1 tal tal 5 ngan haong labaih 3.340 anek saih Cam daok tui bac. Dalam nan, pataom ralo di 3 huyện: Bắc Bình, Tuy Phong saong Hàm Thuận Bắc. Piah taong yaom baoh jeng siam mekre  dalam bruk pato sap Cam, gah pato megru di dom puk palei hu pato sap Cam yaok thun jeng peih dom mbang pakacah: gru pato naih jioy sap Cam; anek saih vak akhar Cam gheih ... Kết quả, chất lượng bac megru sap Cam di dom adei yaok thun jeng hu patagok. Kết quả học kỳ I di thun bac 2017-2018, hu labaih 2.440 adei tamat siam danak dak tagok 900 anek saih dut haong thun bac 2015-2016, 779 adei tamat blaoh, daok veik 117 adei oh ka tamat. Kết quả lac yau nan, min mong rah tapa jeng daok biak ralo anek saih oh ka thau puac, oh ka thau vak akhar Cam.

Tui gru Văn Thu Thanh, gru pato sap Cam, sang bac tiểu học Phan Hòa 1, huyện Bắc Bình, tỉnh Bình Thuận: akhar Cam kan vak, ndom hu langkuk, ralo âm tố… Dalam nan, jaik abih dom anek saih ndom sap Cam oh hu langkuk, kayua nan ye lahik biak ralo tukvak meng thau cambaih sa câu sap Cam. Sa makna tra, lac tukvak bac sap Cam di dom adei biak takik, tok hu bac 4 tiết yaok adit. Daok veik tukvak dalam harei, dom adei njauk bac gam gam sap Yuan saong sap Anh. Kadha ini ba tal bruk dom adei mbuan van kadha bac saong bruk megru sap Cam di dom adei oh hu ralo.

Taphia di dom kan kandah dalam bruk phát âm sap Cam, kurang đồ dùng bac megru, dom thaik binguk minh họa dalam tapuk pato sap Cam daok pandar dalam sang bac tiểu học mboh biak klak. Kayua nan ye, bruk ứng dụng bài vở tame thực tế piah ka dom anek saih tiểu học tiếp thu jeng lac sa bài toán kan. Biak di nyu, dalam ndom puac nao mai yaok harei di urang Cam haong gauk jeng daok nyim ralo sap Yuan. Kadha nan brei mboh dom rào cản ka panuac ndom sap puac dalam bhap bani urang Cam.

Tui thống kê bahrau abih, dalam 4 ribau urang umo meng 15 thun tagok tok hu 4% lac puac, vak cambaih akhar Cam, 14,85% hu thau min oh ka puac cambaih, oh ka vak jeng akhar Cam saong hu 80,45% oh thau akhar Cam. Dalam nan, dalam rai diuk bhian harei meng dom bruk ngak adat cambat, ndam lakhah, ndam metai di urang Cam njauk pandar panuac ndom, akhar vak di bangsa drei. Anak bruk yau nan, dom halaw janeng saong dom gru pato sap Cam di dom puk palei Cam halar tian peih tal pato sap Cam di sang drei piah pato veik akhar Cam ka anek kamuan drei jeng yau mikva halei caong khin bac sap Cam. Yau nan min, số lượng dom tal bac ini biak takik, tok yaok angaok akaok tangin. Ini lac kadha daok ngak ka ralo urang Cam Bình Thuận saneng kuhria, abih di nyu lac dom halaw janeng, dom urang trí thức…

    Kadha khik ramik panuac ndom, akhar vak urang Cam urak ini, nan lac chính bản thân urang Cam njauk paglaong akaok saneng khik ramik panuac ndom, akhar vak di bhap bani drei. Taphia di nan, Karja jeng hu dom sarak peih prong quy mô patao sap Cam ka anek kamuan urang Cam meng pakat bac  trung học cơ sở tal  trung học phổ thông; đầu tư padang ngak sang ilamo bhap bani labik hu ralo urang Cam, piah hu labik bac megru, sinh hoạt ilamo. Hu yau nan, bruk khik ramik ilamo meng hu peih ngak siam, asal ilamo bangsa Cam oh lahik nao./.