Pandap panda Tết thun ni hu rilo, yaom kaom tani tanat duh ka mikva bui sambai raok tết

Tui Cục Đầu tư negar langiu (Mentri Kế hoạch saong Đầu tư), dalam thun 2021, bhum taneran kraong Cuu Long pachreih hu 83 danak dak hu ngak tapak birau meng phun jien negar langiu, phun jien tut ngan labaih 5 tỉ 110 triệu USD, trun dut saong thun 2020. Gam haong nan, Bhum taneran kraong Cuu Long daok hu rilo siam lagaih taduan phun jien FDI thun 2022, meyah dom jalan ngak pasiam kinh tế hu peih ngak sumu gauk saong hu bruk pambuak bhum dalam dui pachreih urang buh jien tame ngak mbang, salih birau bruk buh jien tame ngak mbang pablei salih. Bhum taneran kraong Cuu Long daok dang anak rilo jalan lagaih piah patagok, dom tỉnh dalam bhum caong khin Quy hoạch pataom tame Bhum taneran kraong Cuu Long vaktu 2021-2030, pamaong tal thun 2045 samar hu pok tagok Rajaei brei tapa, piah ka dom bhum palei mek nan peih ngak quy hoạch lagaih saong quy hoạch haong gauk. Dom urang ilamu mai meng dom kapol nyaom dalam saong langiu negar mboh lac, ini lac quy hoạch hu pataom praong, rilo salih birau, nan ye meda pambuak sauk ka bhum taneran kraong Cuu Long cak rok patagok.

Piah dong patrun lạm phát song tani tanat drak pasa pandap panda, khik kajap bruk pabak ginup pandap pablei ka bhap bini, abih du nyu nan lac dom pandap pandar yaok harei dalam tuk Tết Nguyên đán anek sak rimon 2022, dom doanh nghiệp, hợp tác xã di tỉnh Tiền Giang kuhria caga pandap panda khik piahpablei ka drak pasa Tết jiak 402 tỷ đồng. Dalam kham merat pasiam veik bruk ngak mbang, tani tanat rai duik dalam tukvak bahrau, urang nong Tiền Giang jeng jar var caga vụ bingu, njam patam pablei ka drak pasa Tết Nguyên đán anek asak rimon 2022. Sở Công Thương tỉnh Tiền Giang tong yaom, pandap panda Tết thun ni hu rilo, yaom kaom tani tanat duh ka mikva bui sambai raok tết dalam siam mekre salamad piah ba gauk pasang iek hu siam jit ruak, pasiam veik saong patagok kinh tế - xã hội khang kajap thun 2022.

Page ini 4/1, anek saih 4 khối lac 7,8,10 saong 11 di Ban raya HCM hu tame veik sang bac tapak gam haong 2 khoi tal bac hu brei bac tapak dahlau di nan, lac tal 9 saong tal 12. Sang bac saong anek saih tuk halei jeng ba bruk pacang caga ruak hu salamat tagok dang akaok. Tui duah thau, dom sang bac dalam ban raya daok peih patao bac online brei ka anek saih hu amaik ame oh ka njauk hatai brei anek tame bac tapak di sanga bac. Gam haong nan, ngan saong dom khoi bac ini, bruk pato kanal hadar veik anak meta hu pataom tame dom môn yau Toán, Ngữ Văn, sap Anh, Vật lý, Hoá học. Dom môn daok veik , gru pato brei ba tabiak jalan pakacah angaok tal bac tui njauk hukum.

Piah patrun naong trak ka dom sang iek ruak dã chiến song labik taduan urang ruak tame taong ruak, meng kreik bilan 11-2021, tỉnh Trà Vinh hu peih labik iek ruak F0 oh mboh hagait atau hanjuan di sang. Tal Urak ni, dalam jiak 13.000 urang F0 di tỉnh dok iek ruak, hu jiak 10.000 urang dok iek ruak di sang . Piah hu dong, iek glang song brei jru njauk tuk ka F0 iek ruak di sang , tỉnh hu padang dom bialc y tế nao mai di taong abih dom xã, phường, ban sit di tỉnh. Bahrau ni, ban Trà Vinh padang kapul dam dara halan hatain dong ka F0 iek ruak di sang yau tacei jalan, pato tacei bruk iek ruak ka F0 di sang, brei jru iek ruak, dong nao drak, blei pandap panda. Taphia di nan, tỉnh dok jhul khang bruk pathau khan jak ba bhap bini, abih di nyu nan lac urang umo taha, urang hu ruak dahlau dalam rup nao klauk vaccine pacang COVID-19 piah patakik bruk metai lahik.

Pambuak tal bruk yam ndoc CDC Bình Phước taduan “pandap alin” di Công ty Việt Á, Mentri Công an daok ngak bruk haong CDC Bình Phước. Tui yam ndoc Sở Y tế tỉnh Bình Phước di biar harei 3.1, Mentri Công an ngak bruk haong CDC Bình Phước saong tauk kareik veik dom tài liệu, harak gal pambuak tal. Kayua yau nan ye, Sở Y tế oh padang hội đồng langyah bruk ong Nguyễn Văn Sáu taduan “pandap alin” di Công ty Việt Á yau habar tui kuhria dahlau di nan hu khan brei thau bloh. Dalam thun 2021, CDC Bình Phước hu blei kit test Covid-19 saong kit test tách chiết di Công ty Việt Á, kuhria taong abih phun jien labaih 41 tỉ meteh. Dalam thun 2021, CDC Bình Phước daok blei mac dut iek ruak Realtime – PCR saong tách chiết tự động DNA/RNA di Công ty Việt Á saong yaom jien abih tih lac 2 tỉ 750 triệu đồng tui jalan tacei ba brei ngak samar. Abih dua jamriak nan daok ngak harak gal, oh ka bayar jien.

Đặc phái viên Nga hu mbaok tame ginum biai hạt nhân I-ran, Mikhail Ulyanov brei thau, Mbang ginum biai hạt nhân ka 8 di Viên (negar Áo) hu rah tabiak hadei di tuk padeih thun bahrau, tui jalan dom mbang nyaom oh chính thức. Bruk ginum biai mbang ni hu mong lac sami samar piah daong dui tagok thỏa thuận hạt nhân I-ran 2015. Tuk camereip bruk ginum ibiai hu ba mai dom siam lagaih song nao tui jalan siam mekre salamad. Hadei di mbang nyaom di Ủy ban pambuak bruk di I-ran song 5 taneh ia lac Nga, Anh, Đức, Trung Quốc sa. Prang, dom gah njauk gauk brei jhul samar bruk ngak Thỏa thuận dalam dom nyaom ngak bruk. Mbang ni tui kuhria lac mbang puac di abih song dom gah kuhria ngak salah bloh bruk ginum biai dalam bilan 2/2022.

Mbang palih ruah Tổng thống Prang thun 2022 daok yam tame tukvak khang tuk daok oh ka tal 4 bilan tra hu peih tabiak. Yau nan min, bruk njom mbak ruak Covid-19 daok tamuh khang di Prang ngak kan kandah tal dom bruk di Danak dak palih ruah, dom urang tame palih ruah njauk brei pasiam piah khik hu salamat saong meda dui pachreih hu cử tri pachreih tui. Tui dom urang ilamu langyah, dom bruk chính trị brei peih ngak dalam tuk jit ruak rah tabiak sraw kadau kan hu siam, oh brei mboh cambiac laic bruk urang cử tri njauk hatai kayua peih ngak dalam rilo bruk daok pakauk saong abih di nyu nan lac meda jhak meyah tamuh dom sruh jit ruak praong.

Sa mbang ribuk tuyết khang rah tabiak di gah Đông Nam song dom Trung - Đại Tây Dương negar Mỹ, ngak kan kandah tak yaok ribau menuac urang. Jabat langik tasik pakat nehgar Mỹ brei thau, mbang ribuk tuyết akaok bilan song hangin khang labaih 64 km/h ngak ka tuyết laik kapan meng 12-25 cm dalam dom labik njauk kan kandah. Ribuk tuyết ngak ka rilo jabat liên bang di ban ine Washington kreih pabah mbang. Bruk dreih yau nan jeng rah tabiak di yaok pluh sang bac dalam bhum. Langiu id ban ine Washington, ribuk tuyết jeng ngak kan kandah tal bruk nao mai, ba tal dom pluh mbang bala, saong ngak lahik điện di dom bhum karei karei yau Virginia, Maryland, Carolinas song Georgia. Hu jiak 3.000 mbang par brei padeih song labaih 5.000 mbang par njauk gar veik di Mỹ./.

Urang lang: Hani Pha - Bhumi - 04/01