Bộ Chỉ huy Bộ đội Biên phòng tỉnh Đắk Lắk alin brei pandap daong anek saih kan kandah di dalam tỉnh

Dom harei jiak di ni, bruk blei tapuk bac da-a tagok glong nan ye rah tabiak bruk kurang tapuk di dom labik di NXB pato pakai Việt Nam song dom labik pablei tapuk siphau .Urang pal akaok NXB pato pakai Việt Nam hu panuac sinya dok ba tame pablei piah pasiam bruk kurang tapuk, saong brei in pabak piah hu ginup tapuk dalam  2- 3 harei tal.

Vietnam Airlines birau brei thau paok jien biak praong buh tame ka dom mbang par daong pajeng urang Việt gilac veik mai negar meda tagok tal 10 tỉ đồng sa mbang par. Jien buh tabiak glaong jang rilo mbang dut saong mbang par pajeng tuai tuk oh ka hu jit. Tui Vietnam Airlines, piah peih mbang par gilac veik mai negar, hãng kapal haok jak ba, kuhri kuhria dom jalan ngak siam di abih piah gam khik hu salamat prein yawa ka urang gam langyah hu dom bruk oh bhian mboh…yau brei pagam pabak rilo pandap y tế daong urang ruak yau mac hlang yawa langik, mac suak yawa, gaiy laneing ndik dã chiến…

Di mbang  họp báo online  ka bruk  kinh tế - xã hội song an ninh quốc phòng 8 bilan akaok thun  2020 kayua Ubbhap bini ban raya  .HCM peih tabiak di beir harei sup  9-9, ong Hà Phước Thắng, chánh văn phòng Ubbhap bini ban raya brei thau dalam bilan  9 hu ngak  dom harak gar  piah brei padeih bruk giám đốc Công ty IPC di ong Phạm Phú Quốc-urang hu 2 quốc tịch. Langiu di nan, dom jabat chức năng jeng peih bruk pasang iek veik tuk vak ngak bruk di ong Quốc dalam tuk dok ngak di  Công ty IPC.

Tame thun bac birau 2020-2021, Bộ Chỉ huy Bộ đội Biên phòng tỉnh Đắk Lắk peih bruk alin brei pandap daong sang bac saong dom anek saih hu raidiuk kan kandah di bhum taphia negar dalam tỉnh. Ta-eng di xã xã Ea Bung, huyện Ea Súp, Đồn Biên phòng pabah mbang negar Đắk Ruê alin brei labaih 200 bộ tapuk, pandap bac da-a saong 1.000 baoh siphau ka sang bac tiểu học Ea Bung,  …Thun bac ini, gah Bol lin Biên phòng tỉnh Đắk Lắk taduan daong 42 anek saih di Danak dak “ Pandon takai adei nao bac” saong 4 adei lac anek raong Đồn Biên phòng. Taong abih dom adei hu alin pandap dalam nan hu tapuk, siphau, khan ao, pandap bac da-a.

Phòng Cảnh sát Kinh tế Công an ban raya HCM bahrau pambuak bruk song  Cục khik ramik drak pasa  ban raya HCM pasang iek sa boh sang di jalan Nguyễn Văn Tạo, xã Hiệp Phước, huyện Nhà Bè di melam 8/9. Tapa pasang iek,  duah mboh jiak gần 4.500 thung carton hu labaih 3,5 triệu hagum tangin cao su oh hu harak gar hagait, oh thau asar di nyu.Tui gah chức năng, lô pandap ni mboh lac ngak ja angan hagum tangin y tế Khải Hoàn. Urak ni, po lô pandap nduac klaak oh ka tabiak mbaok di công an..

Dom gru pato daok di takik abih lac klau bang di Mỹ metai kayua Cobid-19 kuhria meng tuk yam tame thun bac birau, daok ngak haduh hatai ralo ka bruk salamat ka dom urang gru pato bac, urang ngak bruk gah pato megru jeng yau anek saih meyah oh ngak tui dom jalan pacang caga ruak lagaih.

Harei  9/9, Prang hu labaih  8 ribau  500 urang njom bahrau  vi rút Sars-CoV-2, saong hu dom urang tame sang iek ruak cấp cứu kayua jit  Covid-19 glong di abih meng di tuk klaak bruk paatah di gauk dalam negar. Biak di nyu jit ruak Covid-19 di Prang dok kanyah jhak biak samar. Tui nan, Rajaei Prang meda batabiak dom sarak kan kandah dalam labaih  10 harei tal.

Pasak Chỉ huy Quốc phòng negar Nga brei thau, kapal haok mesuh Sukhoi-27 di gah kapal haok Vũ trụ Nga harei kabroi taong cakak sa kapal haok do thám di Mỹ angaok tasik Biển Đen. Hadei di nan, kapal haok mesruh di Nga par gilac veik mai labik căn cứ. Dahlau di nan harei 5/9, Akok mentri Quốc phòng Nga Séc-gây Sôi-gu khan brei thau, dom kapal haok do thám di NATO peih par rilo mbang taphia negar Nga tagok labaih 30% dut saong tukvak ini thun blaoh. Gah Kapal haok Vũ trụ Nga peih labaih 10 mbang kapal haok par piah taong cakak dom kapal haok do thám di bhum Ban-tíc Ban-tíc, Ba-ren saong Biển Đen./.

Urang lang: Hani Pha – Ái Nghiêm – 10/09 10:31:12