Danak dak “Halan hatian sa hatung hatai haong gauk” brei pandap Tết 2021

Ong Hoàng Bình Quân, urang pan akaok mBan Đối ngoại pakat negar brei thau: Nyaom roya Đảng mbang ka XIII hu 1.587 urang lambaok ka labaih 5 triệu 100 rabau urang đảng. Dalam nan hu 67,67%, urang hu ilamu bac megru meng thạc sĩ tagok, lac glaong di abih kuhria meng dom mbang roya dahlau mai. Tui ong Hoàng Bình Quân, bruk hu rilo urang hu bac megru meng thạc sĩ tagok yau urak ini, lac lagaih haong bruk cakrok di taneh ia, lagaih haong bruk patagok di gah pato pakai, patagok menuac ngak di Việt Nam”.

Dom harei ni, langik la-an oh siam ka prein yava, bhap bini brei thau khik ka rup pandiak,, pacang la-an ka rup drei saong ka gauk gar. Piah pacang caga ruak tuk langik salih karei, bhap bini njauk cuh aw la-an, plaik dom labik hu hangin tame... Dom urang praong thun, plaih bruk daok di labik pandiak blaoh tabiak chip di labik la-an, yau ye meng dalam sang pandiak tabiak langiu laar. Kayua lac yau nan, meda ngak ka drah tagok trun samar, mbuan ba tal tai biến rak darah gilo akaok. Mayah njauk laar bo oh samar pacang, meda ba tal ruak viêm phổi, kan suak yava, var drei jan, mbuan metai.

Di Đồn Biên phòng Thông Bình , Bộ Chỉ huy Bộ đội biên phòng Đồng Tháp haong UBND xã Tân Hộ Cơ, huyện Tân Hồng, Đồng Tháp, Đồn Biên phòng Thông Bình pambuak bruk haong karja palei, haong doanh nghiệp peih danak dak “Halan hatian sa hatung hatai haong gauk” brei pandap Tết 2021. Tui nan, kapul “Halan hatian sa hatung hatai haong gauk” (TP Hồ Chí Minh) hu nao brei 260 pok pandap Tết, dalam nan hu: brah, mì tôm, saradang, ia tasau, ia yamen, menyek mbang, ia  tương… yaok pok yaom 400 rabau đồng brei ka dom sang kan kathaot daok dalam xã.

Đồn Biên phòng Thổ Châu, Bộ đội Biên phòng tỉnh Kiên Giang bahrau cap khik ong Phan Văn Giỏi (umo 44 thun), daok di xã Tân Phước, huyện Gò Công Đông, tỉnh Tiền Giang ka bruk pajeng manjek oh thau cambaih meng halei mai. Tui nan, dalam tuk ngak bruk di tasik, kapul pasang iek Biên phòng Đồn Thổ Châu mboh gilai ikan TG - 90659TS mboh medil tuk pataok tame tapen sa sruh gilai karei di bhum tasik kayua kapul khik ramik. Tapa pasang iek, kapul jaka duah mboh jaik 140 ribau lít manjek hu caik bak dalam labik hu pandar piah caik ikan, oh hu harak gar brei thau asal di menyek nan.

Mesup ini (19/1), TAND TPHCM langyah mbang camereip bruk Tôn Nữ Thị Huyền haong 7 urang gam tal bruk pablei salih thận tapa negar ka duas “Pablei salih tai jai dalam rup menuac”. Gah pasang iek duah thau mboh lac, meng bilan 4/2017 tal harei 21/1/2019, menuac di Tôn Nữ Thị Huyền duah hu 100 urang pablei thận ba nao ngak dom dut iek, Huyền hu ba tapa Campuchia 37 urang pablei thận. Huyền saong menuac di nyu duah laba oh njauk hukum rilo tỷ đồng. Dom urang daok veik kayua oh ka duah hu menuac blei nan ye oh ka ba tapa Campuchia piah blac mek. Panuac di Viện Kiểm sát bhap bini TPHCM ndom lac, bruk ngak nan di dom urang nan biak jhak ka menuac sia, mbuan metai, suan haong jalan ngak pahal dalam bruk alin hadiah, mek, pagam tai jai dalam rup menuac, kayua yau nan ye njauk langyah catang piah pato pakai, piah tapa nan urang mboh huac oh ngak mblah tui saong piah pacang caga./.

Tapa yaok pataom di jabat pasang iek saong pacang caga jit ruak Hàn Quốc (KDCA) harei 19/1 brei mboh negar ni hu 386 urang njom bahrau, dalam nan hu 351 urang njom ruak dalam rahra, patagok dom urang njom di negar ni tal 73.115 urang. Dom urang njom bahrau yaok harei di Hàn Quốc tagok glaong abih di harei 25/12 meng blaoh, tuk hu 1.240 urang, min jeng mboh yau daok dang veik. Dom urang njom bahrau dalam sa harei daok di tanut 500 urang dalam adit tapa dahlau di tuk trun daok di tanut bier abih di jaik 2 bilan tapa ngan haong 389 urang di harei 18/1 meng blaoh.

Rajaei Kling brei thau, meng tuk klauk vắc xin COVID-19 di puac adit blaoh, yaok pluh rabau menuac oh mai klauk jru. Di ban ine New Delhi, bahrau hu 53% menuac hu ieu, mai klauk jru, dalam tuk bruk ini di dom tỉnh daok biar jang. Kling urak ini dang ka 2 di dunya ka menuac njaom COVID-19 tuk hu labaih 10,5 urang njom. Rajaei negar ini hu brei tapa 2 janih vắc xin, dalam nan hu 1 janih oh ka ngak blaoh bruk ngak iek angaok menuac.

Jabat iek bruk dalam di sang patao Japon brei thau lac klaak bruk ngak uan harei manek ka patau Japon Naruhito di văng patao dalam thun ka dua gam gam piah pacang bruk njom mbak di COVID-19. Harei uan harei manek mbang ka 61 di patao Japon Naruhito tui kuhria hu peih tabiak di harei 23/2 anak tal. Tui bruk ba tabiak dahlau di nan, patao Japon Naruhito meda tabiak mbaok gam haong diuk lac Hoàng hậu Masako saong dom urang dalam sang yer tangin salam bhap bini. Mbang jaik di abih, sa bruk uan harei manek di patao Japon brei klaak lac di thun 1996. Patao Japon Akihito tuk nan hu panuac ieu brei padeih bruk ni kayua bruk srau kadau cap khik manuac di jabat lambaok negar Nhật Bản di Peru  harei 17/12/1996 ngak tatuan megei dunya./.

Urang lang: M. Phương – T. Thảo – 19/01/2021 15:46:05