Pathau mikva urang ngak nông! Meng akaok thun 2016, kayua El Nino ngak ka pandiak bhang rah tabiak avar jang, ia kurang meng 15 tal 30%, ralo labik oh hu hajan yau Ninh Thuận, Bình Thuận ngak brei pandiak bhang trak. Anak bruk ini, di Ninh Thuận hu ralo jalan ngak piah pacang pandiak bhang yau bruk pruh ia patak pataom angaok phun ratak haluk, bruk salih phun pala angaok taneh padai. Kadha urang ngak hamu caong thau harei ini, kol dahlak likau khan  tal mikva saong taong abih gauk dom jalan ngak piah pacang cakak pandiak bhang.

Ong Hùng Ky daok di xã An Hải, huyện Ninh Phước tỉnh Ninh Thuận lac sa dalam dom urang nao dahlau dalam bruk pandar ia pruh patak pataom di puk palei thau cambaih laih dom kein laba meng bruk ngak ini ba mai. Ngan saong 2 ha taneh, ong buh jien tame 60 triệu đồng ngak hệ thống pruh ia sit sit, tapa nan, hadei di 1 thun pala dom phun takik harei yau sabei baoh, cà rốt, ratak haluk, ong mek veik u phun jien buh tame. Ong Hùng Ky brei thau ilamu yau ini: “pruh ia patak pataom nyu cadu biak ralo, oh hu hệ thống pruh ia patak pataom oh ngak truh labik ini, hu nyu drei cadu biak ralo saong jeng rik daong pacang veik bruk pandiak bhang daok rah tabiak”.

Ong Nguyễn Tin – giám đốc pasak pachreih nông tỉnh Ninh Thuận brei thau bruk salih tapa pala ratak naih angaok taneh padai di Ninh Thuận hu ba mai kein laba glaong ka urang nông dalam tuk pandiak bhang yau urak ini:

 “Meyah kol drei pala ratak naih ye tok pandar 20% duk saong pandar ia pruh ka phun padai, nan lac meyah 1 ha ye kol drei tok pandar 2000/10.000 m3 meyah ngak padai; ka dua kol drei pandar hu taneh, oh klak tasaoh; ka 3 daong ka urang nông hu jien mek tame, salih barau rai diuk, patrun naong trak di karja dalam bruk daong pacang eik lipa tuk cang bilan yuak kuak”.

Ong lê Trung Hoàng, urang nông huyện Tuy Phong, tỉnh Bình Thuận brei thau:

 “Kol dahlak ngak hu 2 bruk praong, sa bruk pala ratak haluk di taneh cuah saong jalan pruh ia patak pataom, ka dua lac salih janih phun pala ka nyu lagaih saong bhum pandiak bhang lac phun ratak naih di taneh padai, ye 2 bruk ini kol dahlak mboh biak siam piah kol dahlak bac megru saong ba pandar di puk aplei, abih di nyu nan lac bruk pruh ia meng jalan kuhria độ bốc hơi di taneh, ini lac sa bruk ngak barau bo kol dahlak mbang akaok meti hu thau saong dahlak jeng kham merat pandar di puk palei”.

Meng dom jalan ngak di Cục pala drak, Tổng cục thủy lợi dalam bruk pacang caga pandiak bhang di bhum Nam Trung bộ saong danak dak patrun asal pajaih padai pala drak kayua mintri ngak nông saong patagok palei pala peih tabiak hu daong ka urang nông bhum Nam trung bộ pacang cakak hu pandiak bhang, khik kajap bruk pala drak saong tani tanat rai diuk./.