Dom bác sĩ kakei, yaok harei yaok urang siam di abih pandar meng 920 - 2.300mg. Yau nan min kol drei bhian pandar ralo jang nan ngak brei oh siam ka rup babhap, yau ye:

Ruak glaong huyết áp: Urang hu tiền sử glaong huyết áp bo daok mbang mbak ye meda ngak ka ruak trak jang saong biak mbuan njauk tai biến.

Ruak tim: Mbang mbak ba tal menyum ralo aia ngak brei tagok rilo darah nao mai ye tim njauk ngak bruk ralo jang, lavik harei tim thất gah iew prong tagok blaoh ba tal suy tim. Meyah drei mboh drei thau bloh takik mbang sara veik ye tim thất gah iew nyu siam veik.

Sara ngak lahik canxi: Mbang biak ralo sara meda ngak brei tagok canxi njauk tathuak tabiak tui khak. Kayua yau nan ye menuac mbang mbak mbuan njauk limin talang saong mbuan jaoh talang jang dom urang mbang taba.

Ruak suyễn: Dom urang njauk ruak suyễn meyah mbang ralo sara ye suyễn meda trak jang saong bhian mboh jang, meda ba tal đột tử meyah jeng daok khik kadha bhian randap nan.

Ruak thận: Mbang mbak nyu ngak ka darah tagok tal cầu thận ngak ka thận ngak bruk ralo jang ba tal suy thận. Urang njauk ruak thận meyah mbang ralo sara meda ngak brei thận khut samar jang, daok meyah mbang takik sara ye chức năng thận hu siam jang. Lingiu di nan sara daok lac makna ba tal  sỏi thận, thận njaom limek.

Ruak xương khớp: Mbang ralo sara, menyum ralo aia, nao ma-ik ralo mbang meda tathuak tabiak ralo canxi tapa jalan aia ma-ik, ba tal limin talang.

Ruak jalan tung pruac: Pandar ralo sara yaok harei mbuan njauk ruak ung thư dạ dày biak ralo jang dut haong urang mbang takik sara.

Umo thun: Urang mbang mbak hu umo thun katut panak jang urang takik mbang mbak.

Anek sit di drei tok brei hu biak takik sara dalam mbang menyum. Oh brei ka anek sit mbang biak ralo sara nan lac drei daok daong ka anek sit randap haong mbang taba, daong ka nyu takik mbang mbak tuk prong tagok.

Sara brei ka anek sit yaok harei lac: umo 1 thun – ala 1g; meng 1 tal 3 thun – 2g . Hadei di 11 thun meda brei mbang tagok 6g yaok harei.

Khaol drei jeng njauk thau lac, aia tasau amaik saong aia tasau công thức ka uranaih umo ala 6 bilan hu ginup sara ka ranaih. Juai buh pabak sara, aia mesil, … tame pandap mbang ka uranaih umo ala 1 thun;  kayua thận di uranaih oh “xử lý” hu abih dom  sara ini; saong sara hu blaoh dalam brah, rilo, njam patam,... oh ka ngak tasak, ginup sara di uranaih. Yaom lac drei mboh nyu biak taba, saong saneng lac “biak kan luan”, jeng jhuai buh pabak hasit hagait tame tra! Anek sit di drei oh ka thau tal sara nan ye nyu mbuan mbang saong ngak randap haong bu, tapung brei ka uranaih./.